ޗައިނާގައި ފެތުރޭ ނޭވާލާ ނިޒާމުގެ ބައްޔަކީ މޫސުމީ ބައްޔެއް ކަމަށާއި އެ ގައުމުގެ ހާލަތު މޮނިޓާކުރަމުން އަންނަ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)އިން މިއަދު ބުނެފިއެވެ.
މިހާރު ޗައިނާގައި ނޭވާލާ ނިޒާމުގެ ބަލިތައް އިތުރުވެ، އިމަޖެންސީ ހާލަތު ވެސް އިއުލާނުކޮށްފައިވާ ކަމަށް ބައެއް ފަރާތްތަކުން އަންނަނީ ބުނަމުންނެވެ.
އެ ވާހަކަތަކާ ގުޅިގެން އެޗްޕީއޭއިން ބުނީ، ޗައިނާގައި އިމަޖެންސީ ހާލަތު އިއުލާނުކޮށްފައިނުވާ ކަމަށެވެ. އަދި، މިދިޔަ އަހަރާ އަޅައިބަލާއިރު ޗައިނާގައި މި މޫސުމުގައި ނޭވާލާ ނިޒާމުގެ ބަލިތައް ފެންނަ މިންވަރާއި، ބަލީގައި ބޮޑު ވަރުވާ މީހުންގެ ނިސްބަތް މަދު ކަމަށް އެޗްޕީއޭއިން ބުންޏެވެ.
ދުނިޔޭގެ ސިއްޙަތު ޖަމްއިއްޔާއިން، ޗައިނާ ސީޑީސީއާ ހަވާލާ ދެއްވާ މައުލޫމާތު ދެއްވި ގޮތުގައި ޗައިނާގެ އެކި ހިސާބުތަކުގައި ނޮވެމްބަރު މަހުގެ ދެވަނަ ހަފުތާއިން ފެށިގެން ނޭވާލާ ނިޒާމުގެ ބަލިތައް އިތުރުވަމުންދާކަން ވަނީ ފާހަގަކުރެވިފައެވެ.
އެޗްޕީއޭއިން ބުނީ ފިނި މޫސުމާ ދިމާކޮށް ޗައިނާ އަދި ފިނި މޫސުން އަންނަ އެހެން ގައުމުތަކުން ވެސް ނޭވާލާ ނިޒާމުގެ ބަލިތައް އިތުރުވާކަން ފާހަގަކުރެވިފައިވާ ކަމަށެވެ.
ޗައިނާގައި ފެތުރެމުންދާ ބަލިތަކަކީ އާއްމުކޮށް ވެސް ދައުރުވާ ނޭވާލާ ނިޒާމުގެ ބަލިތައް ކަމަށް އެޗްޕީއޭއިން ބުންޏެވެ. މީގެ ތެރޭގައި އެންމެ ގިނައީ އިންފްލުއެންޒާއެވެ. މީގެ އިތުރުން، އާރްއެސްވީ، ރައިނޯވައިރަސް، އެޑިނޯވައިރަސް، މައިކޯޕްލާސްމާ ނިމުއޯނިއާ އަދި ހިއުމަން މެޓަނިއުމޯވައިރަސް ހިމެނެއެވެ.
އެޗްޕީއޭއިން ބުނީ، މި ހާލަތު މޮނިޓާކުރަމުން އަންނަ ކަމަށެވެ.
މި ދުވަސްވަރަކީ ވަރަށް ގިނަ މީހުން ޢުމްރާއިންނާއި އެކި ސަރަހައްދުތަކަށް ދަތުރުކުރުމަށް ފަހު އެނބުރި އަންނަ ދުވަސްވަރުކަމުން، ނޭވާލާ ނިޒާމުގެ ބަލިތައް މި ދުވަސްވަރު ރާއްޖޭގައި ވެސް އިތުރުވެދާނެ ކަމަށް އެޗްޕީއޭއިން ވަނީ ލަފާކޮށްފައެވެ.
އެހެންކަމުން ސަމާލުކަންދިނުން މުހިންމު ބައެއް ކަންކަން:
- ރޯގާ އަދި ކެއްސުން ފަދަ އަލާމާތްތައް ހުންނަ ފަރާތްތަކުން އާއްމު ތަންތަނަށް ނުކުންނައިރު މާސްކް އަޅައިގެން އުޅުމާއި، އުމުރުން ދުވަސްވީ މީހުންނާއި، ތުއްތު ކުދިންނަށް ޒިޔާރަތްނުކުރުން
- ނޭވާލަން އުނދަގޫވުން، މޭގައި ރިއްސުން، އާދަޔާ ޚިލާފަށް ވަރުބަލިވުން، ނުވަތަ އަލާމާތްތައް ގިނަ ދުވަހަށް ދެމިގެންދާނަމަ ޑޮކްޓަރެއްގެ ލަފާ ހޯދުން
- ބަލިޖެހިގެން ބޮޑުވަރު ވެދާނެ މީހުން (ނޭވާހިއްލުންފަދަ ނޭވާލާ ނިޒާމުގެ ބަލި ހުންނަ މީހުން، ދިފާއީ ބާރު ބަލިކަށި މީހުން، އުމުރުން ދުވަސްވީ މީހުން، ކުޑަކުދިން، މާބަނޑު މީހުން) ބަލީގައި ބޮޑުވަރު ނުވިކަމުގައި ވިޔަސް އަވަހަށް ސިއްހީ ފަރުވާ ހޯދުން