ބޮލީވުޑްގެ ކާމިޔާބު އެކްޓަރު އާމިރު ޚާންގެ ދަރިފުޅު ޖުނައިދު ޚާން އަދި ކުރީގެ ބަތަލާ ސްރީދޭވީގެ ހަގު ދަރިފުޅު ޚުޝީ ކަޕޫރު އެކީގައި ކުޅޭ ފިލްމު "ލަވްޔާޕާ"ގެ ޓައިޓްލް ލަވަ ބެލުންތެރިންނަށް ދައްކާލައިފިއެވެ.
މިދިޔަ ޑިސެމްބަރު މަހުގެ 26ގައި އިއުލާނުކުރި "ލަވްޔާޕާ"އަކީ ދެ ތަރިން އެކީގައި ސްކްރީނުން ފެންނާނެ ފުރަތަމަ ފިލްމެވެ. މިއީ ދެ ތަރިން ވެސް ފިލްމު އިންޑަސްޓްރީއަށް ތައާރަފުވުމަށް ފަހު މަސައްކަތްކުރާ ދެވަނަ ފިލްމު ވެސް މެއެވެ. ލޯބީގެ ރީތި ވާހަކައެއްގެ މައްޗަށް ބިނާކޮށް އުފައްދާފައިވާ މި ފިލްމުގެ 'ލަވްޔާޕާ ހޯ ގަޔާ' ލަވައިން ދެ ތަރިންގެ ކެމިސްޓްރީ ވަރަށް ރަނގަޅަށް ދައްކުވައިދޭ ކަމަށާއި މިއީ ޒުވާނުންނާ ގުޅޭ ވަރަށް ތަފާތު ވާހަކައެއް ގެނެސްދޭނެ ފިލްމަކަށް ވާނެ ކަމަށް ބައެއް ބެލުންތެރިން ވަނީ ބުނެފައެވެ.
ފިލްމު "ލަވްޔާޕާ"ގެ ޓައިޓްލް ލަވައިގެ މަންޒަރެއްގައި ޚުޝީ އާއި ޖުނައިދު--ފޮޓޯ/ޕިންކްވިލާ
މި ޒަމާނުގެ ޖެން-ޒީ ކުދިންނާ ގުޅޭ ލޯބީގެ ތީމެއް ފެންނަ މި ފިލްމު ސިނަމާތަކަށް ގެންނަން ނިންމާފައިވަނީ މި އަހަރުގެ ފެބްރުއަރީ މަހުގެ ހަތްވަނަ ދުވަހެވެ. މި ފިލްމުގެ ޓައިޓްލް ލަވަ އިންސްޓަގްރާމްގައި ހިއްސާކުރަމުން ބަތަލާ ޚުޝީ ކަޕޫރު ބުނެފައިވަނީ މިއީ ހިތްގައިމު ލޯބީގެ ގުޅުމެއްގެ ފެށުން ދައްކުވައިދޭނެ ފިލްމެއް ކަމަށެވެ.
ޖުނައިދު ޚާން ބޮލީވުޑަށް ތައާރަފުވި ފިލްމު "މަހާރާޖް"ގައި ޒުވާން އެކްޓަރު ކުޅެފައިވާ ރޯލަށް ގިނަ ބައެއްގެ ތައުރީފު ލިބުނުއިރު ޚުޝީ ކަޕޫރުގެ ފުރަތަމަ ފިލްމުގައި ދެއްކި އެކްޓިން ވެސް ގިނަ ބަޔަކު ވަނީ ބަލައިގެންފައެވެ. ޖުނައިދާއި ޚުޝީއަކީ އުޖާލާ ކުރިމަގެއް އިންޑަސްޓްރީގައި އޮތް ދެ ތަރިން ކަމަށް ގިނަ ބަޔަކު ބުނެފައިވާއިރު ދެ ތަރިންގެ ދެވަނަ ފިލްމުގެ މި ލަވަޔަށް ފާޑުކިޔުނު މީހުން ވެސް މަދެއް ނޫނެވެ.