އުރަމަތީގެ ކެންސަރަށް ފަރުވާ ހޯދަމުން އަންނަ އިންޑިއާގެ މަޝްހޫރު ޓީވީ ބަތަލާ ހީނާ ޚާން ވެބް ސީރީޒަކަށް ތައްޔާރުވަމުން އަންނަ ކަމަށް ރިޕޯޓުތައް ބުނެފިއެވެ.
މަޝްހޫރު ޓީވީ ޑްރާމާ "ޔޭ ރިޝްތާ ކިޔާ ކެހެލާތާ ހޭ"އިން ބޮޑު މަޝްހޫރުކަމެއް ލިބުނު ބަތަލާ ތައްޔާރުވަމުން އަންނަ ވެބް ސީރީޒްގެ ނަމަކީ "ގްރިހަ ލަކްޝްމީ"އެވެ. މި ވެބް ސީރީޒަކީ މިދިޔަ އަހަރު ކެންސަރު ބައްޔަށް ފަރުވާ ހޯދަމުން އަންނަކަން އިއުލާނުކުރުމަށް ފަހު ހީނާ އެނބުރި ސިނަމާއަށް އަންނާނެ ފުރަތަމަ ފަހަރެވެ.
ވަރަށް ވަރުގަދަ ތުރިލާއެއް ކަމަށްވާ މި ވެބް ސީރީޒްގެ މުހިންމު ތަރިންގެ ތެރޭ އެކްޓަރު ޗަންކޭ ޕާންޑޭ އަދި ރާހުލް ދޭވް ހިމެނޭއިރު ހީނާ ފެންނާނީ ލަކްޝްމީ ނަމަކަށް ކިޔާ ކެރެކްޓާއަކުންނެވެ. މި ސީރީޒްގައި ހީނާ ފެންނާނީ އަމިއްލަ ވިޔަފާރިއެއް ކުރާ އަދި އާއިލާއަށް ދިމާވާ ނުރައްކާތަކުން ސަލާމަތްކުރަން ކޮންމެފަދަ ގުރުބާނީއެއް ވެސް ވާން ތައްޔާރަށް ހުންނަ ޖެހިލުން ކުޑަ އަންހެނެއްގެ ރޯލުންނެވެ.
ވެބް ސީރީސް "ގްރިހަ ލަކްޝްމީ"ގެ މަންޒަރެއްގައި ހީނާ--ފޮޓޯ/ޓެލެގްރާފްއިންޑިއާ
މި ސީރީޒް ސްޓްރީމްކުރަން ހަމަޖެހިފައިވަނީ މި މަހުގެ 16 ވަނަ ދުވަހުން ފެށިގެން އެޕިކް އޮން ނަމަކަށް ކިޔާ ޕްލެޓްފޯމެއްގައެވެ.
ހީނާއަށް ކެންސަރު ބަލި ޖެހިފައިވާކަން ދެނެގަނެވުނުއިރު އެ ބަލި ހުރީ ސްޓޭޖް ތިނެއްގައެވެ. ވަގުތުން ބައްޔަށް ފަރުވާ ހޯދުމުގެ މަސައްކަތް ބަތަލާ ވަނީ ފަށާފައެވެ. ކެންސަރު ބައްޔާ ހަނގުރާމަކުރަމުން ދިޔަ ނަމަވެސް ހީނާ ފާހަގަކުރެވިފައިވަނީ ވަރަށް ހިތްވަރު ގަދަ މީހެއްގެ ގޮތުގައެވެ.
ކެންސަރު ބައްޔަށް ފަރުވާ ހޯދަމުން ދިޔަ ނަމަވެސް ބަތަލާ އަންނަނީ ބައެއް ފެޝަން ޝޯތަކުގެ އިތުރުން ފިލްމު އިންޑަސްޓްރީން އިންތިޒާމްކޮށްގެން ބާއްވާ ހަފުލާތަކުގައި ބައިވެރިވަމުންނެވެ. ހީނާ ވަނީ މިދިޔަ އަހަރު ތެރޭ ދެ ފަހަރެއްގެ މަތިން ޗުއްޓީއަށް ރާއްޖެ ވެސް ޒިޔާރަތްކޮށްފައެވެ.