ރާއްޖެއަށް މިހާރު ކުރަމުންދާ ވިއްސާރައިގައި ބޯކޮށް ވާރޭވެހުމުގެ އިތުރުން އުދައެރުމުގެ ސަބަބުން ހަ ރަށެއްގައި ފެންބޮޑުވެފައިވާ ކަމަށް ނޭޝަނަލް ޑިޒާސްޓާ މެނޭޖްމެންޓް އޮތޯރެޓީ (އެންޑީއެމްއޭ)އިން މިއަދު ބުނެފިއެވެ.
އިއްޔެ ވަނީ ރާއްޖެއަށް އިރުވައި މޫސުން ފެށިފައެވެ.
އެންޑީއެމްއޭއިން ބުނީ، ރޭ ކުރި ވިއްސާރައިގައި ބޯކޮށް ވާރޭ ވެހުމާއި އުދައެރުމުގެ ސަބަބުން މިހާތަނަށް ހަ ރަށެއްގައި ފެންބޮޑުވެގެން ރިޕޯޓުކޮށްފައިވާ ކަމަށެވެ.
އެގޮތުން ރިޕޯޓްކޮށްފައިވާ ރަށްތަކުގެ ތެރޭގައި:
- އުދައަރައިގެން: ށ.ނަރުދޫ އަދި ރ. އިނގުރައިދޫ
- ވާރޭވެހި ފެންބޮޑުވެގެން: ދ. ކުޑަހުވަދޫ، ދ.މީދޫ ފ.ނިލަންދޫ އަދި ފ. މަގޫދޫ
ބޯކޮށް ވާރޭވެހި އުދައެރުމުން ގެއްލުންވެ 6 ރަށަކުން ރިޕޯޓްކޮށްފި -- ފޮޓޯ/ އެންޑީއެމްއޭ
އެންޑީއެމްއޭއިން ވަނީ ފެންބޮޑުވެފައިވާ ބައެއް ރަށްރަށުގައި ފެން ހިއްކުމުގެ މަސައްކަތުގައި ސިފައިން ހަރަކާތްތެރިވަމުން އަންނަ ކަމަށް ބުނެފައެވެ. އެއްވެސް ހާދިސާއެއްގައި ބޯހިޔާވަހިކަން ގެއްލި އިންސާނީ އެހީތެރިކަން ފޯރުކޮށްދޭން މިހާތަނަށް ޖެހިފައިނުވާ ކަމަށް ވެސް އެންޑީއެމްއޭއިން ވަނީ މައުލޫމާތު ދީފައެވެ.
ބޯކޮށް ވާރޭވެހި އުދައެރުމުން ގެއްލުންވެ 6 ރަށަކުން ރިޕޯޓްކޮށްފި -- ފޮޓޯ/ އެންޑީއެމްއޭ
އެމްއެންޑީއެފްއިން ވަނީ އދ. މާމިގިއްޔަށް ބޯކޮށް ވާރޭވެހި ބައެއް ގޭގޭގައި ފެން ބޮޑުވެގެން، އެހީތެރިކަން ފޯރުކޮށްދިނުމުގައި އެމްއެންޑީއެފް މާލެ އޭރިއާ ކޮމާންޑް، އދ. މާމިގިލި ފަޔާ ސްޓޭޝަންގެ ސިފައިން ހަރަކާތްތެރިވަމުން އަންނަ ކަމަށް ބުނެފައެވެ.
އަދި، ށ. ނަރުދޫއަށް އުދައަރައި ރަށު ތެރޭގައި ފެންބޮޑުވެފައިވާތީ އެހީތެރިކަން ފޯރުކޮށްދެމުން އަންނަ ކަމަށް ބުނެފައިވާއިރު ފ.ނިލަންދޫ އަދި ދ. ކުޑަހުވަދުއަށް ބޯކޮށް ވާރޭވެހި މަގުތަކުގައި ފެން ބޮޑުވެގެން އެހީތެރިކަން ފޯރުކޮށްދިނުމުގައި ހަރަކާތްތެރިވަމުން އަންނަ ކަމަށް ވެސް އެމްއެންޑީއެފުން ވަނީ ބުނެފައެވެ.
ބޯކޮށް ވާރޭވެހި އުދައެރުމުން ގެއްލުންވެ 6 ރަށަކުން ރިޕޯޓްކޮށްފި -- ފޮޓޯ/ އެންޑީއެމްއޭ
މިހާރު ރާއްޖެއަށް ކުރަމުން މި އަންނަ މޫސުމީ ވިއްސާރައިގައި ގުގުރުމާ އެކު ބޯކޮށް ވާރޭވެހި އުދައަރާނޭ ކަމަށް މޫސުމާ ބެހޭ ގައުމީ އިދާރާއިން ވަނީ ލަފާކޮށްފައެވެ.