ރީތި ލޯބީގެ ލަވަތަކުން ގިނަ ބައެއްގެ މަގުބޫލުކަން ހޯދި އިންޑިއާގެ މަޝްހޫރު ލަވަކިޔުންތެރިޔާ އަރުމާން މަލިކް ކައިވެނިކޮށްފިއެވެ.
އަރުމާނާއި ލޯބިވެރިޔާ އާޝްނާ ޝްރޮފް ކައިވެނިކޮށްފައިވަނީ ދެ މީހުން އެންގޭޖްވިތާ އަހަރެއްވެފައި ވަނިކޮށެވެ. އަރުމާނާއި އާޝްނާގެ ކައިވެނީގެ ފޮޓޯތައް ސޯޝަލް މީޑިއާގައި ހިއްސާކުރުމާ އެކު ގިނަ ބަޔަކު ވަނީ ދެ މީހުންނަށް ކައިވެނީގެ ހެޔޮ އެދުމާއި ތަހުނިޔާ ކިޔާފައެވެ.
އާޝްނާއަކީ ފެޝަން ޑިޒައިނިންގްގެ އިތުރުން އިންޓީރިއާ ޑިޒައިނުން މަތީ ތައުލީމު އުނގެނި ފެޝަން ދުނިޔޭގައި މަސައްކަތްކުރަމުން އަންނަ މީހެކެވެ. އަމިއްލަ ޔޫޓިއުބް ޗެނަލްއެއްގެ އިތުރުން އޭނާއަކީ އިންޑިއާގެ ފެޝަން ދުނިޔޭގައި އެންމެ ނަން ހިނގާ މަޝްހޫރު ބްލޮގާއެކެވެ.
އަރުމާނާއި އާޝްނާގެ ލޯބީގެ ގުޅުން ދެ މީހުން އެންގޭޖްވުމާ ހަމައަށް ވެސް ގިނަ ބަޔަކަށް ނޭނގި ތިއްބާ އެންގޭޖްމެންޓަށް އަހަރެއްވީ ތަނާހެން ސަޕޯޓަރުން ސިއްސުވާލާފައިވަނީ ކައިވެނީގެ ފޮޓޯތަކާ އެކުއެވެ. މި ކައިވެނީގައި ބައިވެރިވުމަށް ދައުވަތު އެރުވީ ދެ ފަރާތުގެ އާއިލާގެ ގާތް މެންބަރުންގެ އިތުރުން ގާތް އެކުވެރިންނަށް އެކަންޏެވެ.
އަރުމާން އާއި އާޗްނާގެ އެންގޭޖްމެންޓް ހަފްލާގެ ފޮޓޯއެއް--ފޮޓޯ/ބޮލީވުޑްހަންގާމާ
ޢުމުރުން 29 އަހަރުގެ ޒުވާން ލަވަކިޔުންތެރިޔާ އަރުމާނަކީ އިންޑިއާގެ މަޝްހޫރު މިއުޒީޝަން އަދި ލަވަކިޔުންތެރިޔާ އަނޫ މަލިކަށް ބޮޑު ބޭބެ ކިޔާ މީހެކެވެ. މިހާތަނަށް ބޮލީވުޑްގެ ވަރަށް ގިނަ ފިލްމުތަކަށް ލަވަ ކިޔައިދީފައިވާ އަރުމާންއަކީ މިއުޒިކް ކޮމްޕޯސް ވެސް ކުރާ ލަވަކިޔުންތެރިއެކެވެ.
މިއުޒިކް ކޮމްޕޯސްކުރުމުގެ އިތުރުން މިއުޒިކް ޑައިރެކްޓްކުރުމުގެ މަސައްކަތް އަރުމާން ކުރަނީ ބޭބެ އަމާން މަލިކާ ގުޅިގެންނެވެ. އަރުމާނު މިއުޒިކް ކޮމްޕޯސް ކޮށްދީފައިވާ ބައެއް ބޮލީވުޑް ފިލްމުތަކުގެ ތެރޭ "ހޫބުސޫރަތު"، "ސަނަމްރޭ"، "ކަޕޫރު އެންޑް ސަންސް"، "ބާޣީ"، "ކަބީރު ސިންގް" އަދި "ބޫލް ބުލައްޔާ 2" ހިމެނެއެވެ.