ކުރީގެ ނައިބު ރައީސް އަހުމަދު އަދީބު ދައުލަތައް ދައްކަން ޖެހިވަޑައިގަންނަވާ އެއް މިލިއަން ރުފިޔާ އެއް މަސްދުވަހުގެ ތެރޭގައި ދައްކަން ސިވިލް ކޯޓުން އިއްޔެ ހުކުމް ކޮށްފިއެވެ.
އެމްއެމްޕީއާރުސީގެ ހިޔާނާތުގެ މައްސަލައިގައި އަދީބުގެ މައްޗަށް 20 އަހަރުގެ ޖަލު ހުކުމެއް އިއްވައި، ދެ މިލިއަން ރުފިޔާއިން ވަނީ ޖޫރިމަނާ ކޮށްފައެވެ. މީގެ ތެރޭގައި ފަހެއް އޮކްޓޫބަރު 2020އިން ފެށިގެން މަސްދުވަހުގެ ތެރޭގައި އެއް މިލިއަން ރުފިޔާ ދައުލަތަށް ދައްކަން ކްރިމިނަލް ކޯޓުން ކުރި ހުކުމެއް ހިމެނެއެވެ.
މި މައްސަލައަކީ އެ ފައިސާ މިއަދާ ހަމައަށް ވެސް ދައްކާފައިނުވާތީ، މައްސަލައިގެ ހުކުމްކުރާ ތާރީޚުން ފެށިގެން ކުރިޔަށް އޮތް މަސްދުވަހުގެ ތެރޭގައި އެ ފައިސާ ދައްކައި ޚަލާސްކުރުމަށް އަދީބުގެ މައްޗަށް ހުކުމްކޮށްދިނުމަށް އެދި ދައުލަތުން ހުށަހެޅި މައްސަލައެކެވެ.
މި މައްސަލައިގައި އަދީބުގެ ފަރާތުން ބުނެފައިވަނީ، އެކީ އެއްފަހަރާ އެ ފައިސާ ދެއްކުމަކީ ދަތިކަމެއް ކަމަށެވެ. އެ ގޮތުން ފައިސާ ދެއްކުމަށް ބޭނުންވާ ގޮތް ލިޔުމުން އެޓާނީ ޖެނެރަލްގެ އޮފީހަށް ހުށަހެޅުމަށް ޓަކައި ހަތް ދުވަހުގެ ފުރުސަތެއް ދިނުމަށެވެ. އެހެން ނަމަވެސް ދައުލަތުން އެ ކަމަށް އެއްބަސްވެފައިނުވާތީ، މައްސަލަ ނިންމަވާއިރު، ޝަރީއަތުގެ އަޑުއެހުމަކާ ނުލައި ހުކުމްކޮށްދިނުމަށް އެދިފައިވެއެވެ.
މި މައްސަލައިގައި ސިވިލް ކޯޓުމް ހުކުމްކުރީ ދައުލަތުން އެދުނު ގޮތަށް، މަސްދުވަހުގެ ތެރޭގައި އަދީބު ދައުލަތަށް އެއް މިލިއަން ރުފިޔާ ދައްކައި ޚަލާސް ކުރުމަށެވެ.
އެހެން ނަމަވެސް މި މައްސަލައިގެ ހުކުމާމެދު ހިތްހަމަނުޖެހޭނަމަ، ހުކުމް ކުރާ ދުވަހުން ފެށިގެން މަސްދުވަހުގެ ތެރޭގައި އެ ހުކުމެއް ހައިކޯޓުގައި އިސްތިއުނާފު ކުރުމުގެ އިޚްތިޔާރު ލިބިދީފައި އޮވެއެވެ.
އެމްއެމްޕީއާރުސީގެ ބޮޑު ހިޔާނާތަކީ ދުނިޔޭގެ ސަމާލުކަމަށް އައި މައްސަލައެކެވެ. އެ މައްސަލައާ ގުޅޭގޮތުން އަލް ޖަޒީރާ ނޫހުން ތަފްސީލީ ޑޮކިއުމެންޓްރީ އެއްވެސް ގެނެސް ދިނެވެ.
ކުރީގެ ރައީސް އިބްރާހީމް މުހައްމަދު ޞާލިޙް 2018 ވަނަ އަހަރު ވެރިކަމާ ހަވާލުވެވަޑައިގެންނެވިއިރު އަދީބާއި އެމްއެމްޕީއާރުސީގެ ކުރީގެ ވެރިޔާ އަބްދުﷲ ޒިޔަތު ވެސް ހުންނެވީ ޖަލު ބަންދުގައެވެ. ނަމަވެސް ޞާލިޙް އެ ދެ ބޭފުޅުން ގޭ ބަންދަށް ބަދަލު ކުރެއްވިއެވެ. އޭގެ ފަހުން އެ މަނިކުފާނު އެ ދޭބުޅުންނަށް ވެސް މާފު ދެއްވީއެވެ.