އޮސްޓްރޭލިއާގެ ސިޑްނީން، މެލޭޝިއާގެ ކުއާލަލަންޕޫރުން، އިންޑިއާގެ ނިއުދިއްލީން، ޔުނައިޓެޑް އަރަބް އިމަރޭޓްސްގެ ދުބާއިން، ސޫރިޔާގެ ވެރިރަށް ދިމިޝްގުން، ޔޫރަޕްގެ ލަންޑަނާއި ޕެރިހުން އަދި އެމެރިކާގެ ވޮޝިންޓަނާއި ނިއުޔޯކުން މީލާދީ 2025 ވަނަ އަހަރަށް ދުނިޔެ މަރުހަބާކީ އެކިއެކި ކުޅިވަރުތަކާއި ހަވާއެރުވުމާއި ކުލަކުލައިގެ އަލިތަކާއި އުފާ ފާޅުކުރުންތަކުންނެވެ.
ނަމަވެސް ފަލަސްތީނުގެ ޣައްޒާގައި އިސްރާއީލުން ނަސްލު ނައްތާލަމުން ގެންދާ ނިކަމެތި ރައްޔިތުން މީލާދީ އައުއަހަރާ ކުރިމަތިލާންޖެހުނީ 46އަށް ވުރެ ގިނަމީހުން ޝަހީދުކޮށްލި ތިން ގަތުލުއާންމަކުންނެވެ. ހައިހޫނުކަމާއި ގަދަފިނީގެ ސަބަބުން ޣައްޒާގައި މަރުވަމުންދާ ފަލަސްތީނުގެ ތުއްތު ކުދިންގެ ހަށިތަކުންނެވެ.
ފާއިތުވި މީލާދީ އަހަރަށް ދުނިޔެ އަލްވަދާއު ކިޔާފައިވަނީ އިސްރާއީލުގެ ގަތުލުއާންމުތަކާއި ޔަހޫދީ ޓެރަރިޒަމްގެ ބިރުވެރިކަމާއި ޓްރަމްޕްގެ އިންޒާރުތަކުގެ ބިރުވެރިކަމުގައި ދުނިޔެ އޮއްވައެވެ.
އެމެރިކާގެ ވެރިކަމަށް ހަރުކަށި ފިކުރުގެ ޕޮޕިއުލިސްޓެއް ކަމަށްވާ ޑޮނަލްޑް ޓްރަމްޕް، ދެވަނަ ފަހަރަށް އިންތިޚާބު ކުރުމާއި، ސޫރިޔާގެ ޚުދުމުޚްތާރު ވެރިޔާ ބައްޝާރުލްއަސަދު ގައުމު ދޫކުރައްވައި ފިއްލެވުމާއެކު ޓެރަރިސްޓް ޖަމާއަތެއްގެ ގޮތުގައި ދުނިޔޭގެ ގައުމުތަކުން ސިފަކުރާ އައިއެސް ޖަމާއަތުގެ ގޮތްޕެއްކަމަށްވާ ޖަބްހަތުއްނުސްރާ (މިހާރުގެ ނަމުންނަމަ ހައިއަތު ތަހްރީރް އައްޝާމް)ގެ އަތްދަށަށް ސޫރިޔާގެ ވެރިކަން ދިޔުންފަދަ ބޮޑެތި ކަންކަމާއެކުގައެވެ.
މި 2025 ވަނަ އަހަރުގައި ދުނިޔެ އިންތިޒާރު ކުރަނީ ޓްރަމްޕްގެ ވެރިކަމުގައި އެމެރިކާ ގެންގުޅެފާނެ ނުރައްކާތެރި ސިޔާސަތުތަކާ މެދުގައެވެ. އެސިޔާސަތުތަކުގެ ސަބަބުން ދުނިޔެ ވެއްޓިގެން ހިނގައިދާނެ ބިރުވެރި ހަލާތަކާ މެދުގައެވެ. ޣައްޒާގައި ޔަހޫދީ އިސްރާއީލު ހިންގާ ނަސްލު ނައްތާލުމުގެ ގަތުލުއާންމުތަކަށް ނިމުން އަންނާނެ ދުވަހަކާމެދު ގައެވެ. ޓެރަރިސްޓް ޖަމާއަތެއްގެ އަތްދަށުގައި އޮތް ސޫރިޔާއަށް ވެގެންދާނެ ގޮތަކާމެދުގައެވެ. ޔުކްރެއިން ހަނގުރާމައަށް ވެގެންދާނެ ގޮތަކާމެދުގައެވެ.
މިއީ ހައްތާވެސް އެކަމުގެ އަސަރު ދުނިޔެއަށް ކުރާނެ ބޮޑެތިކަންކަމެވެ. ނަމަވެސް ޑެންމާކުގެ ސަރަހައްދެއް ކަމަށްވާ ގްރީންލެންޑާއި ޕެނަމާކެނެލް އަށް އެމެރިކާ ވެރިވެގަންނާނެ ކަމަށް ޓްރަމްޕް ދެއްވާފައިވާ އިންޒާރުތަކަކީވެސް ކުޑަކަމެއް ނޫނެވެ.
ކެނެޑާ، އެމެރިކާގެ 51 ވަނަ ސްޓޭޓަކަށް ހެދުމާބެހޭގޮތުން ޓްރަމްޕް ދައްކަވާފައިވާ ވާހަކަތަކަކީވެސް ގިނަ ބައެއްގެ ނަޒަރުގައި އަޅާނުލައި ދޫކޮށްލެވޭވަރުގެ ވާހަކަތަކެއް ނޫނެވެ. މަސްތުވާތަކެއްޗާ ދެކޮޅަށް ހަނގުރާމަ ކުރުމަށްޓަކައި މެކްސިކޯގެ ހުއްދައަކާނުލައިވެސް އެގައުމަށް ސިފައިން ފޮނުވައި ހަނގުރާމަކުރާނެ ކަމަށް ޓްރަމްޕް ދެއްވާފައިވާ އިންޒާރުތަކަކީވެސް ދުނިޔެއަށް ބަލާނަމަ ކުޑަކަމެއް ނޫނެވެ.
އެމެރިކާއާއި އިސްރާއީލުގެ ސަރަހައްދު ބޮޑުކުރާނެކަމުގެ ވާހަކައަކީ ޓްރަމްޕް ކުރިން ދައްކަވާފައިވާ ވާހަކަ ތަކެކެވެ. އެމެރިކާގެ ސްޓްރެޓީޖިކް ރޭވުންތައް ރާވާ ސީއައިއޭ އާއި ޕެންޓަގަންފަދަ އެމެރިކާގެ އަޑީދައުލަތުގައި ހިމެނޭ ބާރުގަދަ ފަރާތުގެ ތާއީދު ނެތި މިފަދަ އިންޒާރުތަކެއް އެމެރިކާގެ އިންތިޚާބީ ރައީސް ޑޮނަލްޑް ޓްރަމްޕް ދެއްވާނެކަމަށް މުހައްލިލުން ގަބޫލެއް ނުކުރައްވައެވެ.
ޔޫރަޕާއި އުތުރު އެމެރިކާއާ ދެމެދު އޮންނަ ގްރީންލެންޑަކީ ޗައިނާއާއި އެމެރިކާ އާ ދެމެދު އެންމެ ބޮޑު ވާދަވެރިކަމެއް އޮންނަ ޙައްސާސް، ޓެކްނޮލޮޖީގެ އުފެއްދުންތަކަށް އިންތިހާއަށް ބޭނުންވާ ނާދިރު މައުދަންތަކުން މުއްސަނދި ވެފައިވާ ވަރަށް ބޮޑު ބިޔަ ސަރަހައްދެކެވެ.
އެންމެ 56 ހާސް ވަރަކަށް މީހުން ދިރިއުޅޭ މިސަރަހައްދަކީ ޑެންމާކުގެ ސަރަހައްދެއްގެ ގޮތުގައި އޮތްނަމަވެސް އެއީ ލާމަރުކަޒީގޮތުން މުޅިން އަމިއްލަ ވަކި ވެރިކަމެއްކުރާ ވަރަށް މުއްސަނދި ސަރަހައްދެެކެވެ. ސްޓްރެޓީޖިކް ލޮކޭޝަނެއްގައި ނާދިރު މައުދަންތަކުން ފުރިފައި އޮތް ބޮޑު ޖަޒީރާއެކެވެ. ޔޫރަޕްގެ ދެބައިކުޅަ އެއްބައި ވަރުގެ ބޮޑުމިންހުރި ޖަޒީރާއެކެވެ.
ދުނިޔޭގެ ބޮޑެތި ބާރުތަކުގެ މެދުގައި އުފެދިފައިވާ ސްޓްރެޓީޖިކް ވާދަވެރިކަން މިހާރު ހުރި ހިސާބަށް ބަލާއިރު ޓްރަމްޕްގެ ވެރިކަމުގައި އެމެރިކާގެ ބާރުގެދަށަށް އެސަރަހައްދު ގެނައުމުގެ މަސައްކަތްކުރުމަކީ ގާތްކަމެއްކަމަށް ވަނީ ބެލެވިފައެވެ.
މި، ބިޔަ ބިން އެމެރިކާގެ ބާރުގެ ދަށަށް ގެނައުމަކީ ކުރިންވެސް އެމެރިކާގެ ޑީޕް ސްޓޭޓުން ވިސްނާފައިވާ ކަމެއްކަމަށް ރިޕޯޓްތައް ބުނެއެވެ. މީގެ ދެ ގަރުނެއްހާ ދުވަސްކުރިން އެމެރިކާގެ ބިމުގެ ސަރަހައްދު ބޮޑުކުރީވެސް ގަދަބާރުން އެހެން ގައުމުތަކުގެ ބިންތަކަށް ވެރިވެގަނެގެންނެވެ. މިސާލަކަށް ބަލާނަމަ އެމެރިކާގެ ހުޅަނގު ދެކުނުގެ ސްޓޭޓްތައްކަމަށްވާ ޓެކްސަސް ނިއުމެކްސިކޯ އަދި އެރިޒޯނާ، އަދި ކެލިފޯނިއާގެ ދެކުނާއި ނެވާޑާގެ ދެކުނުގެ ސަރަހައްދުތަކަކީ ގަދަބާރުން އެމެރިކާ އަތުލާފައިވާ މެކްސިކޯގެ ބިންތަކެވެ.
އަނެއްކޮޅުން ކެނެޑާގެ އިގްތިސާދު ފުނޑާލައިގެން އެގައުމު އެމެރިކާގެ ބާރުގެދަށަށް ގެނައުމުގެ ސްޓްރެޓީޖިކް ރޭވުންތަކެއްވެސް އެމެރިކާގެ ޑީޕްސްޓޭޓްގެ ބެކިންއާއެކު ޓްރަމްޕްގެ ޒައާމަތުގައި އެމެރިކާ ރޭވުމަކީ ދުރުކަމެއް ނޫންކަމަށް ވެއެވެ. ސަބަބަކީ ކެނެޑާގެ ބިމުގެ ބޮޑުކަމާއި އާބާދީގެ ކުޑަކަމާއި ކެނެޑާގައިވާ ގުދްރަތީ ޚަޒާނާގެ ބިޔަކަމެވެ.
މީގެއިތުރުން ދުނިޔޭގެ ސްޓްރެޓީޖިކް ޕޮއިންޓެއްކަމަށްވާ ޕެނަމާ ކެނެލް އެމެރިކާގެ ކޮންޓްރޯލްގެ ދަށަށް ގެނައުމާއި އަވަށްޓެރި މެކްސިކޯއަށް އަސްކަރީ ގޮތުން އެމެރިކާ ވަދެގަތުމަކީވެސް ޓްރަމްޕްގެ ޒައާމަތުގައި އެމެރިކާ ކޮށްފާނެކަމުގެ ގޮތުގައި ބެލެވޭ ސަބަބުތަކެއް ހަގީގަތުގައިވެސް އެބަހުއްޓެވެ.
ގްރީންލޭންޑާއި ކެނެޑާ އެމެރިކާގެ ބަޔަކަށް ހެދުމާއި ޕެނަމާ ކެނެލް އެމެރިކާ ތަނަކަށް ހަދާނެކަމުގެ ވާހަކަތަކަކީވެސް ސަމާސާ ސިފައެއްގައި ޓްރަމްޕް ދެއްކެވި ވާހަކަ ތަކެއްކަމަށް ބެލެވޭކަށް ނެތެވެ. މިއީ ކުރިންވެސް ކުރަން އެމެރިކާވިސްނާފައިވާ ކަންތައްތަކެއްކަންްވަނީ ހާމަވެފައެވެ. ކުރަން ވިސްނާފައި އެހެން ނަމަވެސް އެކި ސަބަބުތަކާ ގުޅިގެން ނުކުރެވި ހުރިކަން ކަމެވެ.
ބާރުދުވެލީގައި ހުރިހާ ދާއިރާއެއްގައި އެމެރިކާއާ ފައިހަމަކުރަމުން ގެންދާ ޗައިނާއާ ވާދަކުރުމަށް ޓަކައި މިކަންކަމަކީ އެމެރިކާ މިހާރު ކޮށްފާނެކަންކަމަށް ބެލެވޭނެ ކަންކަމެވެ. އެހެންކަމުން 2025 ވަނަ އަހަރަށް ދުނިޔެ ވަދެފައިމިވަނީ މިކަންކަމުގެ ބިރުތަކާ އެކުގައެވެ. މިކަންކަމާ ގުޅިގެން ދުނިޔެއަށް އަންނާނެ ބަދަލުތަކާއި ފެށިދާނެ އަރާރުންތަކުގެ ކަންބޮޑުވުންތަކާ އެކުގައެވެ.