ރާއްޖެއަށް ވަންނަ ޑޮލަރު، ރާއްޖޭގެ ބޭންކުތައް މެދުވެރިކޮށް މާރުކުރަން މަޖުބޫރުވާގޮތަށް އެކުލަވާލަވާލި ބޭރު ފައިސާއާ ބެހޭ ގާނޫނަށް މިއަދުން ފެށިގެން އަމަލުކުރަން ފަށައިފިއެވެ.
ރައްޔިތުންގެ މަޖިލީހުން ފާސްކޮށްފައިވާ ބޭރު ފައިސާއާ ބެހޭ ބިލު ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ތަސްދީގު ކުރައްވާފައި ވަނީ ނިމިދިޔަ ޑިސެމްބަރު މަހުގެ 14 ވަނަ ދުވަހުގައެވެ.
އަލަށް އަމަލުކުރަން ފަށާ މި ގާނޫނުގެ މަގްސަދަކީ ރާއްޖޭގައި ބޭރު ފައިސާއިން ކުރެވޭނެ މުއާމަލާތްތައް ކަނޑައަޅައި ފައިސާ އެތެރެކޮށް ބޭނުންކޮށް ގެންގުޅުމާއި ޖަމާކޮށް މާރުކުރުމާ ގުޅޭ އުސޫލުތައް ކަނޑައަޅައި، ހިންގުމަށް ބޭނުންވާ ގާނޫނީ އޮނިގަނޑެއް ކަނޑައަޅައި އެކުލަވާލުމެވެ.
ފަތުރުވެރިންނަށް ޚިދުމަތްދޭ ތަންތަނުން ކޮންމެ ފަތުރުވެރިއެއްގެ ބޮލަށް ވަކި ވަރަކަށް ޑޮލަރު ރާއްޖޭގެ ބޭންކެއްގައި މާރުކުރަން އަންގައި, މޯލްޑިވްސް މަނިޓަރީ އޮތޯރިޓީ (އެމްއެމްއޭ)އިން ފުރަތަމަ އެކުލަވައިލީ ގަވާއިދެކެވެ. އެ ގަވާއިދު އިއުލާން ކުރުމާއެކު ފަތުރުވެރިކަމުގެ ހިދުމަތްދޭ ފަރާތްތަކުން ވަނީ ކަންބޮޑުވުން ފާޅުކޮށްފައެވެ.
އެއާއެކު ބޮޑެތި ބަދަލުތަކާއެކު އާ ގާނޫނެއް ހެދުމަށް މަޖިލީހަށް ހުށަހަޅައި ވަނީ ފާސްކޮށްފައެވެ.
މިއަދު އަމަލު ކުރަން ފަށާފައިވާ ގާނޫނުގައި ބުނެފައިވާގޮތުން ޓޫރިސްޓުންނަށް ޚިދުމަތް ދޭ ތަންތަން ވަނީ ގިންތިތަކަށް ބަހާލާފައެވެ. އެއީ "ކެޓެގަރީ-އޭ ޓޫރިޒަމް އެސްޓެބްލިޝްމަންޓް" އަދި "ކެޓެގަރީ-ބީ ޓޫރިޒަމް އެސްޓެބްލިޝްމަންޓް" އެވެ.
ކެޓެގަރީ-އޭގައި ހިމެނެނީ ރަޖިސްޓަރީކޮށްފައިވާ ރިޒޯޓުތަކާއި، އިންޓަގްރޭޓަޑް ޓޫރިސްޓް ރިޒޯޓުތަކާއި، ޕްރައިވެޓް އައިލެންޑްތަކާއި އެނޫންވެސް ތަންތަނެވެ. މި ކެޓަގަރީން ހިދުމަތްދޭ ކޮންމެ ފަތުރުވެރިއެއްގެ ބޮލަކަށް 500 އެމެރިކާ ޑޮލަރު ބޭންކްތަކުގައި މާރުކުރަންޖެހެއެވެ. ނުވަތަ މަހެއްގެ ތެރޭގައި އެ އެސްޓެބްލިޝްމަންޓަކަށް ލިބޭ ބޭރު ފައިސާގެ އާމްދަނީގެ 20 ޕަސެންޓް މާރުކުރަންޖެހެއެވެ.
ކެޓެގަރީ-ބީގައި ހިމެނެނީ ރަޖިސްޓަރީކޮށްފައިވާ ޓޫރިސްޓް އުޅަނދުތަކާއި، ޓޫރިސްޓް ހޮޓާތަކުގެ އިތުރުން ޓޫރިސްޓް ގެސްޓްހައުސްތަކެވެ. މި ކެޓަގަރީން ހިދުމަތް ހޯދާ ކޮންމެ ފަތުރުވެރިއެއްގެ ބޮލަކަށް 25 އެމެރިކާ ޑޮލަރު މާރުކުރަންޖެހެއެވެ. ނުވަތަ މަހެއްގެ ތެރޭގައި ލިބޭ ބޭރު ފައިސާގެ އާމްދަނީގެ 20 ޕަސެންޓް މާރުކުރަންޖެހެއެވެ.
މި ގާނޫނުގައި ވަނީ ޑޮލަރު މާރުކުރުމުން އިސްތިސްނާވާ ފަރާތްތަކާއި ހާލަތްތަކެއް ހިމަނައިފައެވެ. އޭގެ ތެރޭގައި ގިނަވެގެން 24 ގަޑިއިރު ހޭދަކޮށްފައި ނުވާ ޓޫރިސްޓުންނާއި އުމުރުން 12 އަހަރު ފުރިހަމަނުވާ ކުޑަކުދިންނާއި އެ ޓޫރިޒަމް އެސްޓަބްލިޝްމެންޓްގައި ހިލޭ ނުވަތަ ކޮމްޕްލިމެންޓްރީކޮށް ތިބޭ މީހުން ހިމެނެއެވެ.
ހަމައެއާއެކު ރިސޯޓަކަށް މާލީ ދަތިކަމެއް ވާނަމަ، އާމްދަނީގެ 20 ޕަސެންޓަށްވުރެ މަދުން ދައްކަން އެދުމުގެ އިޚުތިޔާރު ދީފައެވެ.
މި ގާނޫނުގައި ބުނެފައިވާ ގޮތުން ޓޫރިޒަމް ދާއިރާގެ ވިޔަފާރިތަކުގެ އިތުރުން ދެން ޑޮލަރު މާރު ކުރަން މަޖުބޫރު ވަނީ މަދުވެގެން 15 މިލިއަން ޑޮލަރު އާމްދަނީ ލިބޭ ވިޔަފާރިތަކަށެވެ.
ބޭރު ފައިސާއާ ބެހޭ ގާނޫނެއް ތަންފީޒު ކުރަން ފަށާފައި މިވަނީ ރާއްޖޭގެ އިގްތިސާދުގައި ބޭރު ފައިސާ ދައުރު ކުރާ މިންވަރު އިތުރުކުރުމުގެ މަގުސަދުގައެވެ. މިހާރު އަގު ބޮޑުކޮށް ޑޮލަރު ގަންނަން ޖެހޭތީ ރާއްޖެ އެތެރެ ކުރާ މުދަލުގެ އަގުތައް ދަނީ ވަރަށް ބޮޑަށް އިތުރުވަމުންނެވެ.