އިޝާރާތުން ކިޔައިދިނީ އޭނާ މަސައްކަތުގެ މާހައުލުގައި ކުރަން ބޭނުންވާ އަދި ހާސިލުކުރަން ބޭނުންވާ ކާމިޔާބީތަކެވެ. މަސައްކަތުގައި ކުރިއަށްދިޔުމަށް އޭނާ ކުރާ އުއްމީދުތަކެވެ.
މިއީ، ރާއްޖޭގެ ތަރައްގީގެ އެތައް މަސައްކަތެއް ކުރާ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)އަށް 44 އަހަރު މިއަދު ފުރުމާ ގުޅިގެން އެ ކުންފުނީގައި މަސައްކަތްކުރާ ޚާއްސަ މުވައްޒަފަކު ހިއްސާކުރި ތަޖުރިބާއެވެ.
އެ ކުންފުންޏަށް 44 އަހަރު ފުރުން ފާހަގަކުރާއިރު، އެ ކުންފުންޏަކީ އަބަދުވެސް މުޖުތަމައުގެ އެކި ކަހަލަ، އެކި ފަންތީގެ މީހުން ބިނާކުރުމަށް ޚާއްސަ އިސްކަމެއްދޭ ކުންފުންޏެކެވެ. އެމްޓީސީސީ ފާހަގަކުރެވެނީ ޚާއްސަ އެހީއަށް ބޭނުންވާ މީހެއް ވިޔަސް އަދި ކުށުގެ ވެށިން އަރައިގަތުމަށް ބޭނުންވާ މީހެއް ކަމަށް ވިޔަސް އެފަދަ މީހުންނަށް މުޖުތަމައުއަށް ފައިދާ ހުރި ބިނާ ކުރުވަނިވި މަސައްކަތްތަކެއް ކުރުމަށް ފުރުސަތުތައް ފަހިކޮށްދޭ ކުންފުންޏެއްގެ ގޮތުގައެވެ.
މި ދުވަހާ ގުޅިގެން އެމްޓީސީސީގެ ޝިޕް ބިލްޑިން އެންޑް ރިޕެއާ ޑިވިޝަންގެ ޓެކްނިކަލް އެސިސްޓެންޓް ހުސައިން ސުނިލް ހިއްސާކުރި މެސެޖަކީ އުއްމީދުން ފުރިފައިވާ މެސެޖެކެވެ.
"1980އިން ފެށިގެން އެމްޓީސީސީއިން އަންނަނީ ތަރައްގީގެ އެކި މަސައްކަތްތައް ކުރަމުން. މީގެ ތެރޭގައި ބިން ހިއްކުމުގެ މަސައްކަތް ހިމެނޭ. އަޅުގަނޑު މި ވަޒީފާގައި ހާސިލުކުރަން ބޭނުންވާ އަމާޒަކީ ކޮބައިކަން އެނގެން ބޭނުންތޯ؟" ވާހަކަ ފަށަމުން ސުނިލް ބުންޏެވެ.
ތިލަފުށީގައި މަސައްކަތްކުރާ ސުނިލް ބުނީ އޭނާ ބޭނުންވަނީ ކްރޭން ފަދަ ބަރު، އެއްގަމު އުޅަނދު އޮޕަރޭޓްކޮށްގެން މުދާ އުފުލައި، ބާލާގޮތް ދަސްކުރުމަށް ކަމަށެވެ. އަދި ވެލްޑިން، ކަރަންޓު އަދި އިންޖީނު މަރާމާތުކުރުން ފަދަ މަސައްކަތްތައް ދަސްކުރަން ވެސް ބޭނުންވާ ކަމަށް ސުނިލް ބުންޏެވެ.
އެމްޓީސީސީ މުވައްޒަފުން: މިއަދަކީ އެ ކުންފުނީގެ 44 ވަނަ އަހަރީ ދުވަސް
ވަޒީފާއިން އިތުރު ކުރިއެރުން ހޯދަައި އޭނާގެ ދާއިރާއިން މަތީ ހަރުފަތަކަށް ދާން ބޭނުންވާކަން ފާހަގަކޮށް ސުނިލް ބުނީ އޭނާ ބޭނުންވަނީ ކޮމްޕިއުޓަރު ބޭނުންކުރުމުގައި ރަނގަޅަށް އަހުލުވެރިވެ، އިދާރީ ކަންކަމާ ގުޅޭ އެކިއެކި ހުނަރުތައް ބިނާކުރަން ކަމަށެވެ.
ސުނިލްގެ ވާހަކައިން އެނގެނީ މަސައްކަތަށް ޝައުގުވެރިވާ ކަމާއި، އެ މަސައްކަތުގައި ކުރިއެރުން ބޭނުންވާ މިންވަރެވެ.
އެމްޓީސީސީން ބުނި ގޮތުގައި އެ ކުންފުނި އަބަދުވެސް އޮންނާނީ އެފަދަ މުވައްޒަފުންނަށް ފުރުސަތުތައް ފަހިކޮށްދިނުމަށް ތައްޔާރަށެވެ.