އިމިގްރޭޝަނުން މާލޭގެ ކޮފީ ޝޮޕްތަކެއް ބަލައި، ގަވައިދާ ޚިލާފަށް އުޅެމުންދިޔަ ފަސް ބިދޭސީއަކު ހޯދައިފިއެވެ.
އިމިގްރޭޝަނުން އެކްސްގައި ކުރި ޕޯސްޓެއްގައި ބުނީ، މާލޭގެ ކޮފީ ޝޮޕްތަކަށް ޚާއްސަކޮށްގެން އިއްޔެ ރެއިޑް އޮޕަރޭޝަނެއް ކުރިއަށް ގެންދިޔަ ކަމަށެވެ.
އެ އޮޕަރޭޝަންގައި ހަ ތަނެއް ބަލައި ފާސްކުރި ކަމަށް އިމިގްރޭޝަނުން ވަނީ ބުނެފައެވެ.
މި މަހު 25 ވަނަ ދުވަހު ވެސް މާލޭގެ ދެ ސަރަހައްދެއް ބަލައި ގަވާއިދާ ޚިލާފަށް އުޅުނު 25 ބިދޭސީއަކު ބެލުމުގެ ދަށަށް ގެންގޮސްފައިވެއެވެ.
މާލޭގެ ގިނަ އަދަދެއްގެ ކެފޭ ރެސްޓޯރެންޓުތަކާއި ފިހާރަތަކުގައި ބިދޭސީން ގަވައިދާ ޚިލާފަށް މަސައްކަތްކުރެއެވެ.
އިމިގްރޭޝަނުން މާލޭގެ ކޮފީ ޝޮޕްތައް ބަލައި، ގަވާއިދާ ޚިލާފަށް އުޅެމުންދިޔަ ފަސް ބިދޭސީއަކު ވަނީ ހޯދައިފައި -- ފޮޓޯ/ އިމިގްރޭޝަން
ރާއްޖޭގައި ގަވައިދާ ޚިލާފަށް އުޅޭ ބިދޭސީންގެ މައްސަލަ ބޮޑުވެފައިވާއިރު، މި ސަރުކާރުން ވަނީ ތިން އަހަރުތެރޭ އެ މައްސަލަ ހައްލުކުރާނެ ކަމަށް ބުނެފައެވެ. އެގޮތުން ހޯމް މިނިސްޓަރު އަލީ އިހުސާން މީގެ ކުރިން ވިދާޅުވެފައިވަނީ، ގަވާއިދާ ޚިލާފަށް ރާއްޖޭގައި އުޅޭ ބިދޭސީން ދެނެގަނެ، އެ މީހުން ގަވާއިދަށް ފެއްތުމުގެ މަސައްކަތް ތިން އަހަރު ތެރޭގައި ނިންމައިލެވޭނެ ކަމަށެވެ.
އޭނާ ވިދާޅުވީ އިމިގްރޭޝަނުން ކުރިއަށްގެންދާ އޮޕަރޭޝަންތަކުގެ މައިގަނޑު މަގުސަދަކީ ބިދޭސީން ހައްޔަރުކޮށް ޑީޕޯޓުކުރުން ނޫން ކަމަށާއި، ގަވައިދާ އެއްގޮތަށް ހުއްދަ ދެވެން ތިބި މީހުންނަށް ހުއްދަ ދިނުން ކަމަށެވެ.