ސަތޭކަ އަށްޑިހަ އެއް މީހުންނާއެކު ދަތުރުކުރި ދެކުނު ކޮރެއާގެ މަތިންދާބޯޓެއް އެ ގައުމުގެ މުއާން އެއާޕޯޓަށް ވެއްޓި 85 މީހުން މަރުވެއްޖެއެވެ.
ދެކުނު ކޮރެއާގެ ނޫސް އެޖެންސީ، ޔޮންހަޕްއިން ރިޕޯޓްކޮށްފައިވާ ގޮތުގައި ބޯޓު ވެއްޓުނީ އެ ގައުމުގެ ހުޅަނގު ދެކުނުގައި އޮންނަ އެއާޕޯޓަށް މަތިންދާބޯޓު ޖައްސަން އުޅުމުގެ ތެރޭގައި ދޫނި ބައިގަނޑެއްގައި ޖެހި ލޭންޑިން ގިޔަރަށް މައްސަލަ ދިމާވެގެންނެވެ.
ސަތޭކަ ހަތްދިހަ ފަސް ފަސިންޖަރުންނާއި ހަ ފްލައިޓް އެޓެންޑެންޓުންނާއެކު ދަތުރުކުރި ޖެޖޫ އެއާގެ ބޯޓު ދަތުރުކުރަމުންދިޔައީ ތައިލެންޑްގެ ބެންކޮކުން ފުރައިގެންނެވެ. އެ ހާދިސާ ހިނގާފައިވަނީ އެ ބޯޓު ޖައްސަން ދަނިކޮށެވެ.
އަލިފާން ނިއްވުމުގައި ހަރަކާތްތެރިވި އޮފިޝަލަކާ ހަވާލާދީ ރޮއިޓާސް އިން ރިޕޯޓުކޮށްފައިވާ ދެ މީހަކު ދިރިތިއްބާ ފެނިފައިވާއިރު، މީހުން ސަލާމަތްކުރުމުގެ މަސައްކަތްތައް އަދިވެސް ކުރިއަށްދާ ކަމަށެވެ.
އެއާޕޯޓްގެ އޮފިޝަލަކު ވިދާޅުވި ގޮތުގައި އެ މަތިންދާބޯޓުގެ ޓޭލް ސެކްޝަންގައި ތިބި މީހުން ސަލާމަތް ކުރުމަށް އެމަޖެންސީ ޚިދުމަތްދޭ ފަރާތްތަކުން އަންނަނީ މަސައްކަތް ކުރަމުންނެވެ. ދެކުނު ކޮރެއާގެ ފަޔާ އެޖެންސީން ނެރުނު ބަޔާނެއްގައި ބުނީ ބޯޓު ވެއްޓުނު ސަރަހައްދަށް 32 ފަޔާ ޓްރަކް ފޮނުވާފައިވާ ކަމަށެވެ.
ބޯޓުގައި ތިބި ފަސިންޖަރުންގެ ތެރޭގައި ދެކުނު ކޮރެއާގެ 173 މީހުންނާއި ތައިލެންޑްގެ ދެ މީހަކު ހިމެނޭ ކަމަށް ޔޮންހަޕްއިން ރިޕޯޓް ކުރެއެވެ.
ސޯޝަލް މީޑިއާގައި އާންމުވެފައިވާ ވީޑިއޯތަކުން ފެންނަ ގޮތުގައި ބޯޓު ވެއްޓި ވަރަށް ބޮޑަށް ހަލާކުވެފައި ވާއިރު އަލިފާން ރޯވެ ގަދަޔަށް ދުން އަރަމުންދެއެވެ. ވީޑިއޯއިން ފެންނަ ގޮތުގައި ރަންވޭއަށް ބޯޓު ޖެއްސުމަށް ފަހު ކޮންޓްރޯލް ނުވެ ގޮސް ފެންސެއްގައި ޖެހުމާ އެކު ބޯޓު ގޮވައި ހުޅުގަނޑު ފަޅައިގެން ދިޔައެވެ.