އަމިއްލަ ގެތަކާއި އެޕާޓްމެންޓުތަކުގައި ކަސްޓަމްސްގެ ބޮންޑެޑް ވެއާހައުސް ހިންގުން މަނާކޮށްފިއެވެ.
މި ކަން މަނާކުރިއިރު، ބޮންޑެޑް ވެއާހައުސްއެއްގައި ރައްކާކޮށްފައި ހުރި ގިނަ އަދަދެއްގެ ސިނގިރެޓުތަކެއް ގެއްލުނު މައްސަލައެއްވަނީ ފެންމަތިވެފައެވެ.
ހޯމް މިނިސްޓަރު އަލީ އިހުސާން އެކްސްގައި ކުރެއްވި ޕޯސްޓެއްގައި ވިދާޅުވީ، ސިނގިރެޓުތަކެއް ގެއްލިގެން ރިޕޯޓު ކުރެވިފައިވާ ބޮންޑެޑް ވެއާހައުސްއަކީ ވެސް މާލޭގެ ގެއެއްގައި ހަދާފައިހުރި ތަނެއް ކަމަށެވެ.
އެ ތަނުގައި ވެއާހައުސް ހިންގި ފަރާތުންވަނީ ކަސްޓަމްސްއަށް ނޭނގި، އެ ތަނުގައި އެހެން މަސައްކަތެއް ފަށައިފައެވެ. އިހުސާން ވިދާޅުވި ގޮތުގައި މި މައްސަލައިގައި އެ ތަނުގައި އެ ވެއާހައުސްގައި ހުރިކަމަށް ކަސްޓަމްސްގެ ރިކޯޑުތަކު ދައްކާ މުދަލަށް ޑިއުޓީ ދައްކަން ވަނީ ވެރިފަރާތަށް އަންގައިފައެވެ.
އަދި މި މައްސަލައާ ގުޅިގެން ގާނޫނީ ފިޔަވަޅު އެޅުމަށް ޓަކައި، ކަސްޓަމްސްއާއި ފުލުހުން މި ކަން ތަހުގީގު ކުރަމުންދާ ކަމަށް ވިދާޅުވިއެވެ.
ބޮންޑެޑް ވެއާހައުސްތައް މާލޭގެ އެކި ގެތަކާއި އެޕާޓްމެންޓުތަކުގައި ޒަމަންތަކެއް ވަންދެން ހިންގަމުން އައިކަން އިހުސާން ފާހަގަ ކުރެއްވިއެވެ.
މި ގޮތަށް ގެތަކުގައި ބޮންޑެޑް ވެއާހައުސް ހިންގުމަކީ ސަލާމަތީ ގޮތުން، އެންމެ ރަނގަޅު ގޮތް ކަމަށް ނުފެންނާތީ، ދެން ބޮންޑެޑް ވެއާހައުސް ހިންގޭނީ ހަމައެކަނި ކަސްޓަމްސްގެ ފުލް ކޮންޓްރޯލް އޮންނަ ސަރަހައްދުތަކުގައި އެކަނި ކަމަށް ސަރުކާރުން ވަނީ ނިންމައިފައެވެ. އަދި އެކަން ތަންފީޒު ކުރަން ވެސް ފަށާފައިވާ ކަމަށް އިހުސާން ވިދާޅުވިއެވެ.
ބޮންޑެޑް ވެއާހައުސްއަކީ އިމްޕޯޓް ކުރެވޭ މުދަލާއި ޓްރާންޝިޕްމަންޓް މުދާ ވަގުތީގޮތުން ރައްކާކޮށް ބެހެއްޓުމަށް ބޭނުންކުރާ، ސަރުކާރުގެ ހުއްދަ ލިބިފައިވާ ޚާއްސަ ގުދަނެކެވެ.
މިއީ ކަސްޓަމްސް އިދާރާގެ ބެލުމުގެ ދަށުން ހިންގާ، އަދި ޑިއުޓީ ނުދައްކާ މުދާ ރައްކާކޮށް ބެހެއްޓުމަށް ބޭނުންކުރާ ތަންތަނެވެ.