ނާސާގެ ޖައްވީ އުޅަނދު "ޕާކާ ސޯލާ ޕްރޯބް"، އިރާ އެންމެ ކައިރިން ދަތުރުކުރުމުގެ ރެކޯޑް ކާމިޔާބުކޮށްފިއެވެ.
އެމެރިކާގެ ބައިނަލްއަގުވާމީ ޖައްވީ އިދާރާ ނާސާއިން ހުކުރު ދުވަހު ބުނީ، މިދިޔަ އަންގާރަ ދުވަހު އެ އުޅަނދު އިރުގެ ސަތަހައިން 6.1 މިލިއަން ކިލޯމީޓަރު (3.8 މިލިއަން މޭލު) މަތިން ދަތުރުކޮށް، ކުރީގެ ރެކޯޑު މުގުރާލައިފައިވާ ކަމަށެވެ.
ނާސާގެ ސައިންސް މިޝަން ޑައިރެކްޓަރޭޓްގެ އިސްވެރިޔާ ނިކީ ފޮކްސް ވިދާޅުވެފައިވަނީ މިއީ ފުރަތަމަ ފަހަރަށް ތަރިއަކާ ހަމައަށް ކުރި ދަތުރެއްގައި އިރާ މިހާ ކައިރިއަށް ދިޔަ ތާރީޚީ ފުރަތަމަ ދަތުރު ކަމަށެވެ. އަދި އިރު ކައިރިން ދިރާސާކުރުމުން، އިރުގެ އަސަރު ސޯލާ ސިސްޓަމަށް ކުރާ މިންވަރު ދެނެގަނެވޭނެ ކަމަށާއި، މީގެ ތެރޭގައި ބިމާއި ފަޒާގައި ބޭނުންކުރާ ޓެކްނޮލޮޖީއަށް ކުރާ އަސަރުވެސް ހިމެނޭ ކަމަށް އޭނާ ވިދާޅުވިއެވެ.
ދެހާސް އަށާރަ ވަނަ އަހަރު ދަތުރު ފެށި މި އުޅަނދު ވީނަސް މަތިން ހަތް ފަހަރު ދަތުރުކޮށް، އޭގެ ގްރެވިޓީގެ ބާރުގެ ސަބަބުން އިރާ ކައިރިވަމުން ގޮސްފައިވެއެވެ.
ނާސާގެ ޕާކާ ސޯލާ ޕްރޯބްއަކީ އިރު ދިރާސާކުރުމަށް ޚާއްޞަކޮށްގެން ތައްޔާރުކޮށްފައިވާ އުޅަނދެކެވެ. މި އުޅަނދު ފަރުމާކޮށްފައިވަނީ އިރުގެ ބޭރު ފަށަލަ ނުވަތަ ކޮރޯނާއަށް ވަދެ، އިރުގެ މޫސުމާއި މެގްނެޓިކް ބާރާ ބެހޭ މަޢުލޫމާތު އެއްކުރުމަށެވެ.
މި އުޅަނދުގެ ދަތުރުން ލިބޭ މަޢުލޫމާތު އިރާއި، އޭގެ އަސަރު ބިމަށާއި އެހެނިހެން ގުރަހަތަކަށް ކުރާ މިންވަރު ދެނެގަތުމަށް ސައިންޓިސްޓުންނަށް ބޭނުންކުރެވޭނެއެވެ.