އޯޕަން އޭއައިއިން ތަރައްގީކުރަމުންދާ ޖީޕީޓީ-5 އާޓިފިޝަލް އިންޓެލިޖެންސް މޮޑެލް ތައްޔާރުކުރުމުގައި ގިނަ ދަތިތަކާ ކުރިމަތިވެފައިވާކަމަށް ވޯލް ސްޓްރީޓް ޖާނަލްގެ ރިޕޯޓެއްގައި ބުނެފިއެވެ.
މި ރިޕޯޓުގައި ބުނެފައިވާ ގޮތުގައި، މި މަޝްރޫޢު ކުރިއަށް ގެންދިއުމަށް ބޭނުންވާ ޑޭޓާ މަދުވުމާއި، ބޮޑެތި ޚަރަދުތަކެއް ކުރަން ޖެހުމަކީ މި މަޝްރޫޢު ލަސްވުމުގެ މައިގަނޑު ދެ ސަބަބެވެ.
ރިޕޯޓުގައި ބުނެފައިވާ ގޮތުން، ޖީޕީޓީ-5 ތަރައްގީކުރަން ފެށިތާ މިހާރު 18 މަސް ވެފައިވާއިރު، މިއީ ކުންފުނިން މަސައްކަތަށް ނަގާނެ ކަމަށް އަންދާޒާކުރި މުއްދަތަށްވުރެ މާ ދިގު މުއްދަތެކެވެ. އަދި މި މޮޑެލް ނިމި ބޭނުންކުރެވޭނެ ތާރީޚެއް އަދިވެސް ކަނޑައެޅިފައި ނުވާކަމަށްވެސް ރިޕޯޓުގައި ފާހަގަކޮށްފައިވެއެވެ.
ނަން ހާމަނުކުރާ މަސްދަރުތަކަކާ ހަވާލާދީ ރިޕޯޓުގައި ބުނެފައިވާ ގޮތުގައި، އޯޕަން އޭއައިއިން ޖީޕީޓީ-5އަށް ދެ ފަހަރެއްގެ މަތިން ބޮޑެތި ޓްރެއިނިން ސެޝަންތަކެއް ހިންގާފައިވެއެވެ. މި ސެޝަންތައް މަސްތަކަކަށް ދެމިގެން ދިޔައިރު، ކޮންމެ ފަހަރަކުވެސް ލަފާނުކުރާ ދަތިތަކާ ކުރިމަތިވެފައިވާ ކަމަށް ބުނެއެވެ. އަދި ހަ މަސް ދުވަހުގެ މުއްދަތަކަށް ޖީޕީޓީ-5 ޓްރެއިން ކުރުމަށް ގާތްގަނޑަކަށް 500 މިލިއަން އެމެރިކާ ޑޮލަރު (7.7 ބިލިއަން ރުފިޔާ) ޚަރަދުވާނެ ކަމަށްވެސް ރިޕޯޓުގައި ބުނެފައިވެއެވެ.
އޯޕަން އޭއައިއިން މިހާތަނަށް މި ރިޕޯޓާ ގުޅޭގޮތުން އެއްޗެކޭ ބުނެފައި ނުވެއެވެ. ނަމަވެސް، މި ކުންފުނިން ކުރިން ތަރައްގީކޮށްފައިވާ ޖީޕީޓީ-4ގެ ކާމިޔާބީއަށްފަހު، ޓެކްނޮލޮޖީ ދާއިރާގައި ޖީޕީޓީ-5އަށް ބޮޑު އުންމީދެއް ކުރެވެމުންދާކަން ފާހަގަކުރެވެއެވެ.
މިހާތަނަށް އާންމުކޮށްފައިވާ މަޢުލޫމާތުތަކަށް ބަލާއިރު، ޖީޕީޓީ-5 އަކީ އޯޕަން އޭއައިގެ މިހާރު ބޭނުންކުރާ މޮޑެލްތަކަށްވުރެ ރަނގަޅު މޮޑެލްއެއް ކަމަށް ބެލެވެއެވެ. ނަމަވެސް، މި މަޝްރޫއާ ގާތުން މަސައްކަތްކުރާ ފަރާތްތަކުން ބުނާ ގޮތުގައި، މި މޮޑެލް އަދި އެހާ ތަރައްގީވެފައެއް ނުވެއެވެ. އަދި މިހާރު މި މޮޑެލް ހިންގުމަށް ދާ ބޮޑު ޚަރަދަށް ބަލާއިރު، މި މޮޑެލް ބޭނުންކޮށްގެން ފައިދާއެއް ނުވާނެ ކަމަށްވެސް ބުނެއެވެ.
މި މޮޑެލް އެދެވޭ ފެންވަރަކަށް ގެނައުމަށްޓަކައި އިތުރު ޓްރެއިނިން ސެޝަންތަކެއް ބޭނުންވާނެ ކަމަށް ބެލެވެއެވެ. ނަމަވެސް، ކުންފުންޏަށް ބޭނުންވާ ވަރަށް ޑޭޓާ ނުލިބުމުގެ ސަބަބުން މި މަސައްކަތް އިތުރަށް ލަސްވެދާނެ ކަމަށް ރިޕޯޓުތަކުގައިވެއެވެ.
އެ މޮޑެލްގެ މަސައްކަތްތައް ލަސްވުމާ ގުޅިގެން، ކަމުގައިވާ މައިކްރޯސޮފްޓުން ނުރުހިފައިވާ ކަމަށް ވެސް ބައެއް ރިޕޯޓުތަކުގައިވެއެވެ.
އޯޕަން އޭއައީގެ އެންމެ ބޮޑު އިންވެސްޓަރު ކަމަށްވާ މައިކްރޯސޮފްޓުން އުއްމީދުކުރީ މި އަހަރުގެ މެދުތެރޭގައި ޖީޕީޓީ-5 ނެރެވޭނެ ކަމަށެވެ. ނަމަވެސް، މި އަހަރު ނިމޭއިރު ވެސް އެ މޮޑެލްގެ މަސައްކަތް ނުނިމޭތީ އެ ކުންފުނިން ނުރުހިފައިވާ ކަމަށް ރިޕޯޓުތަކުގައިވެއެވެ.