އަޒަރުބައިޖާނު އެއާލައިންސްގެ ބޯޓެއް މިއަދު ކަޒަކިސްތާނަށް ވެއްޓުނު ހާދިސާގައި، އަޒަރުބައިޖާނުގެ ރައީސް އިލްހާމް ހައިދަރު އޮގްލޫ އަލިޔެވްއަށާއި ރައްޔިތުންނަށް، ރައީސް ޑރ. މުހައްމަދު މުއިއްޒު ތައުޒިޔާ ވިދާޅުވެއްޖެއެވެ.
ކަޒަކިސްތާނުގެ ޓްރާންސްޕޯޓް މިނިސްޓްރީން ބުނި ގޮތުގައި، އެ ބޯޓުގައި 62 ފަސިންޖަރުންނާއި ފަސް ކުރޫއިން ތިއްބެވެ. އެ ބޯޓު ދަތުރުކުރަމުން ދިޔައީ އަޒަރުބައިޖާނުން ރަޝިއާއަށެވެ. ދަތުރުކުރަމުން ދަނިކޮށް ބޯޓު ވެއްޓުނީ ކަޒަކިސްތާނުގެ އަކްޓައު ސިޓީއަށެވެ.
މި ހާދިސާގައި ދެ ކުޑަކުދިން ހިމެނޭހެން 27 މީހުން ސަލާމަތްކޮށް، އެ ސަރަހައްދާ ކައިރީ ހޮސްޕިޓަލަކުން އަންނަނީ ފަރުވާ ދެމުންނެވެ.
ރައީސް އޮފީހުން ބުނީ މި ހާދިސާއާ ގުޅިގެން ރައީސް މުއިއްޒު، އަޒަރުބައިޖާނުގެ ރައީސަށް ތައުޒިޔާގެ މެެސެޖެއް ފޮނުއްވާފައިވާ ކަމަށެވެ. އަދި މި ހިތާމަވެރި ހާދިސާގެ ޚަބަރު އެއްސެވީ ފުން ހިތާމައާ އެކުގައިކަމަށް އެ މެސެޖުގައި ވިދާޅުވެފައިވެއެވެ.
ރައީސްގެ މެސެޖުގައި، އެ މަނިކުފާނުވަނީ އަޒަރުބައިޖާނުގެ ސަރުކާރަށާއި ރައްޔިތުންނަށް ތައުޒިޔާ ވިދާޅުވެ، މި ހާދިސާގައި ސަލާމަތްވި މީހުންނާމެދު ހަމްދަރުދީ ފާޅުކުރައްވައިފައެވެ.
މެސެޖު ނިންމަވާލައްވަމުން ރައީސް ވަނީ ކާމިޔާބީއަށް އެދިވަޑައިގެން ހެޔޮއެދުންތައް ވެސް ފޮނުއްވައިފައެވެ.
އެ ހާދިސާގައި މަރުވި މީހުންނާއި އަނިޔާވި މީހުންގެ ތަފުސީލެއް މިހާތަނަށް ހާމަކޮށްފައިނުވެއެވެ. އަދި ބޯޓު ވެއްޓުނު ސަބަބެއް ވެސް މިހާތަނަށް އެއްވެސް ގައުމަކުން ބުނެފައިނުވެއެވެ.
ރަޝިއާގެ ވައިގެދަތުރުފުރުގެ ކަންތައްތައް ބަލަހައްޓާ އިދާރާއިން ނެރުނު ބަޔާނެއްގައި ވަނީ، ބޯޓުގެ ބުރަފަތީގައި ދޫންޏެއް ޖެހުމުން އެމާޖެންސީކޮށް ޖައްސަން ޕައިލެޓް މަސައްކަތް ކުރި ކަމަށް ދޭހަވާ މައުލޫމާތު ލިބިފައިވާ ކަމަށް ބުނެފައެވެ.