ޖެނިފާއަށް ވަޒީފާ އަލުން ދިނުމާއި ބަދަލުދިނުން ހައިކޯޓުން ހުއްޓުވައިފި

އައިލެންޑް އޭވިއޭޝަން ސާވިސް (އައިއޭއެސް)ގެ ޑެޕިއުޓީ މެނޭޖިން ޑިރެކްޓަރު ކަމުގެ މަގާމުން ވަކިކުރި އައިޝަތު ޖެނިފާއަށް އަލުން ވަޒީފާ ދިނުމާއި ބަދަލު ދިނުމަށް ވަޒީފާއާ ބެހޭ ޓްރައިބިއުނަލުން ނިންމި ނިންމުން ހުއްޓުވަން ހައިކޯޓުން އަމުރުކޮށްފިއެވެ.

ޖެނިފާ އެ މާގަމަށް އައްޔަން ކުރީ، ޑިސެންބަރު 25، 2018ގައެވެ. ނަމަވެސް، އެ ކުންފުނީގެ ބޯޑުން މިދިޔަ އަހަރުގެ ޑިސެމްބަރު 28ގައި ބޭއްވި ބައްދަލުވުމެއްގައި އޭނާ ވަޒީފާއިން ވަކިކުރަން ނިންމައި، ވަޒީފާއިން ވަކިކުރީ މިއަހަރުގެ ޖެނުއަރީ މަހުގެ ތިނެއްގައެވެ.

އެ މައްސަލަ އޭނާ ޓްރައިބިއުނަލަށް ހުށަހަޅާފައި ވަނީ މާޗްމަހުގެ 27ވަނަ ދުވަހެވެ.

ޓްރައިބިއުނަލުން އޮކްޓޯބަރު މަހުގެ 13ވަނަ ދުވަހު ޝާއިއުކޮށްފައިވާ މައްސަލަ ނިމުނުގޮތުގެ ޚުލާސާ ރިޕޯޓުގައި ވަނީ، ރިޓަޔާ ކުރުމުގެ ފުރުސަތު އައިއޭއެސްއިން ޖެނިފާއަށް ދީފައިވާކަމަށެވެ. ނަމަވެސް، އޭނާ މަގާމުން ވަކިކުރަން ބޯޑުން ނިންމީ އެ ނިންމުމާ ދެކޮޅު ހެދުމުންކަން ފާހަގަކޮށްފައި ވެއެވެ. އައިއޭއެސްއިން ފާހަގަކޮށްފައިވާ ގޮތުގައި ޑީއެމްޑީގެ މަގާމަކީ އެ ކުންފުނީގައި މީގެކުރިން އޮންނަ މަގާމެއް ނޫނެވެ. ޖެނިފާއަށް ވަޒީފާ ދީފައި ވަނީ މަގާމު އުފެއްދުމަށްފަހުއެވެ.

މި މައްސަލައިގައި ޓްރައިބިއުނަލުން ނިންމަފައި ވަނީ:

• ޖެނިފާ ވަޒީފާއިން ވަކިކޮށްފައި ވަނީ ގާނޫނާ ޚިލާފަށް ކަމަށް.
• ޖެނިފާ އަދާކުރަމުންދިޔަ ވަޒީފާއަށް އޭނާ އަނބުރާ ރުޖޫއަ ކުރުމާއި ޖެނިފާއަކީ އެއްވެސް ހާލަތެއްގައި ވަޒީފާއިން ވަކިވެފައިވާ ފަރާތެއްކަމުގައި ނުބެލުމަށާއި އޭނާ ވަޒީފާގައި ހުރި ނަމަ ލިބޭނެ އެންމެހާ މުސާރައާއި އިނާޔަތައް ނަގައިދިނުމަށް.
• އޭނާ ވަޒީފާއިން ވަކިކޮށްފައިވަނީ އެކަށީގެންވާ ސަބަބެއްނެތިކަމަށް ބުރަވެވޭތީ ބަދަލުގެ ގޮތުގައި އެއް މަހަށްވާ މުސާރަ، 56،171 ރުފިޔާ ނަގައިދިނުން.

ހައިކޯޓު ފަނޑިޔާރުން ސޮއިކޮށް މިއަދު ނެރުނު އަމުރުގައި ވާގޮތުން އެ މައްސަލަ އިސްތިއުނާފަށް ހުށަހަޅައި، އެ ނިންމުން ތަންފީޒުކުރުން ފަސްކުރުމުގެ އަމުރަކަށް އައިލެންޑް އޭވިއޭޝަންގެ ފަރާތުން އެދިފައިވާ ސަބަބުތަކުގެ މައްޗަށް ރިއާޔަތްކުރާއިރު، މައްސަލަ ބަލައި ނިމެންދެން ވަގުތީ ގޮތުން ފިޔަވަޅެއް އަޅަން ޖެހޭ ކަމަށް ބުނެފައެވެ.

އެހެންކަމުން ހައިކޯޓުން ގޮތެއް ކަނޑައަޅަންދެން ނުވަތަ އެނޫން ގޮތަކަށް އަންގަންދެން ވަޒީފާއާ ބެހޭ ޓްރައިބިއުނަލްގެ ނިންމުން ތަންފީޒުކުރުމުގެ ގޮތުން އެއްވެސް ފިޔަވަޅެއް ނޭޅުމަށް ހައިކޯޓުން ވަނީ އަމުރުކޮށްފައެވެ.