އަންނަ ހުކުރު ދުވަހާ ހަމަޔަށް ރާއްޖޭގެ ބޮޑު ހިސާބަކަށް މޫސުން ރަނގަޅު ވާނެ ކަމަށް މޫސުމާ ބެހޭ ގައުމީ އިދާރާ، މެޓު އޮފީހުން ބުނެފިއެވެ.
މެޓުން ބުނީ އުތުރާއި މެދުރާއްޖޭގެ ރަށްތަކަށް މޫސުން ކުރިޔަށް އޮތް ހުކުރު ދުވަހާ ހަމަޔަށް ރަނގަޅު ވާނެ ކަމަށެވެ. ނަމަވެސް ދެކުނުގެ ހިސާބުތަކަށް ވިއްސާރައިގެ އަސަރު ކުރާނެކަމަށް އެ އޮފީހުން ބުންޏެވެ.
ފާއިތުވި ހަފުތާ ބަންދު ތެރޭގައި ރާއްޖެއަށް ވިއްސާރަކޮށް، ބޯކޮށް ވާރޭވެހިފައިވާއިރު، މިދިޔަ އާދިއްތަ ދުވަހު މެޓު އޮފީހުން ވަނީ، ރާއްޖެ ސަރަހައްދުގައި އުފެދުނު ކޮޅިގަނޑު ރާއްޖެއާ ދުރަށް ދަތުރުކޮށްފައިވާ ކަމަށް ބުނެފައެވެ. އެހެންކަމުން މި ކޮޅިގަނޑުގެ އަސަރު ދެން ރާއްޖެއަށް ނުކުރާނެ ކަމަށް އެ އިދާރާއިން ބުނެފައިވެއެވެ.
ހަފުތާ ބަންދުގައި މޫސުން ވަރަށް ގޯސްވެ ގުގުރުމާއެކު ބޯކޮށް ވާރޭވެހިފައިވެއެވެ. އެއާއެކު ވައި ގަދަވެ، ކަނޑުތައް ވެސް ގަދަވުމުން ސަމާލުވުމަށް އިލްތިމާސްތައް ނެރެފައިވެއެވެ.
މީގެ އިތުރުން މާލެއާއި ބައެއް ރަށްތަކުގައި ފެންބޮޑުވެ، ގެއްލުންތައް ވެސް ލިބިފައިވެއެވެ. އެގޮތުން މާލެއިން 30 ގެ ހިމެނޭ ގޮތަށް، 57 ގެއަކަށް ގެއްލުން ލިބިފައިވާ ކަމަށް ނޭޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ)އިން ބުނެފައިވެއެވެ.
މިދުވަސްވަރަކީ ސްކޫލް ބަންދު ދުވަސްތައް ކަމަށްވުމުން އަތޮޅުތެރެއަށާއި ރާއްޖޭން ބޭރަށް ގިނަ ބަޔަކު ދަތުރުކުރަމުންދެއެވެ.
އެހެންކަމުން ކަނޑުގަދަވާ ދުވަސްވަރު، ކަނޑު ދަތުރުކުރުމުގެ ކުރިން މެޓު އޮފީހުން ނެރޭ އެލާޓުތަކަށް ސަމާލުވުމަށް އެ އިދާރާއިން އަބަދު ވެސް އިލްތިމާސް ކުރެއެވެ.