ނޭނގި ކުރެވުނު ވީޑިއޯއިން މަރުން ސަލާމާތްވި ބޮޑު މަންޒަރު!

އޭރު ގަޑިން 9:30 ވެދާނެއެވެ. އުމުރުން 17 އަހަރުގެ އަޙްމަދު މުޙައްމަދު ވަޙީދު, އޮތީ އޭނާގެ ގޭގައި ނިދާފައެވެ. މީހަކު ގޮވާހެން ހީވާތީ ލޯ ހުޅުވައިލެވުނުއިރު މަންމަ އައިސް ގޮވަނީއެވެ. ރަށަށް ރާޅެއް އަރައިގެން އުޅޭކަމާއި، ނިދަން ނޯވެ އަވަހަށް ތެދުވާން މަންމަ އަންގައިފިއެވެ.

"އަޅުގަނޑަށް ހޭލެވުނީ އަޅުގަނޑުގެ މަންމަ ގޮވާ އަޑަށް. ނިދަން ނޯވެވޭނެ ކަމަށް، ރާޅު އަރައިފިޔޭ،"

އެކަމަކު، ހުޅަނގު މޫސުމުގައި ރ. ކަނދޮޅުދޫގެ ހަތަރު ފަރާތުން ރަށު ތެރެއަށް ރާޅު އެރުމަކީ، ރަށުގެ އެއްވެސް މީހަކަށް އާ ކަމެއް ނޫނެވެ. އެއީ، އުދަ އަރައި އިރެއްގައި ނަމަ ރޭގަނޑު ނުނިދާ ތިބެންޖެހުނު ގޯސް ހާލަތްތައް ވެސް އެ ރަށު ރައްޔިތުންނާ ދިމާވެފައިވާތީއެވެ.

އަމުދުން އަހްމަދު ދިރިއުޅޭ ގެ ހުންނަނީ ރަށު މެދުގައި ކަމުން، އެ ގެއަށް ރާޅު އަރައި ފަހަރަކު މާ ބޮޑު އަސަރެއް ވެސް ނުކުރެއެވެ. އެހެންވެ މި ރާޅަކީ ވެސް މާ ބޮޑު ކަމަކަށް ވެދާނެ ކަމެއް ކަމަކަށް އޭނާގެ ހިތަށް ވެސް ފުރަތަމަ ނާރައެެވެ. އެކަމަކު މިފަހަރު އެރި ރާޅާއެކު އޭނާގެ ގެއަށް ވެސް ފެން ވަނެވެ.

އަޙްމަދު މުޙައްމަދު ވަޙީދު، "ސަން" އަށް އިންޓަވިއުދެނީ: އަހްމަދަކީ 2004ވަނަ އަހަރުގެ ޑިސެމްބަރު 26ވަނަ ދުވަހު ރ. ކަނދޮޅުދޫއަށް ސުނާމީ އެރި މަންޒަރު ރެކޯޑުކުރި މީހާއެވެ. އޭނާގެ ރެކޯޑުކުރި މަންޒަރަކީ ރާއްޖޭގެ ރަށަކަށް ސުނާމީ އެރި ވަގުތު ނެގުނު މަދު ވީޑިއޯތަކުގެ ތެރެއިން ވީޑިއޯއެކެވެ. -- ސަން ފޮޓޯ

އެހެންވެ ފެންޖެހޭނެހެން ހުރި ތަކެތި، އުސް ތަންތަނަށް ބަދަލުކޮށްލުމަށްފަހު ދެން އޭނާ ދިޔައީ ރަށުގައި ހުރި އޭނާގެ ސްޓޫޑިއޯއާ ދިމާއަށެވެ.

ފޮޓޯ ނެގުމާއި ވީޑިއޯ ނެގުމުގެ ޝައުގު ހުރުމާއެކު އޭނާ އޭރު ރަށުގައި ކުޑަކުޑަ ސްޓޫޑިއޯއެއް އައީ ހިންގަމުންނެވެ. ރަށަށް ރާޅު އަރައި ދުވަހެއް ނަމަ އެ ތަން ފޮޓޯ ނަގައި ވީޑިއޯކުރުމަކީ ވެސް އޭނާ ކޮށް އުޅުނު ކަމެކެވެ.

"ބައެއް އެއްޗެތި މައްޗަށް ހިއްލައިލާ، މިކަހަލަ ކަންކަން ކޮށްލައިފައި އަޅުގަނޑު މަސައްކަތްކުރާ ތަނަށް ދިޔައީ. އަޅުގަނޑު މަސައްކަތްކުރާ ތަން ހުންނަނީ އެހެން ތަނަކު. އެކަމަކު އެ ތަނަށް ގޮސް ކެމެރާ ނަގައިގެން ދިޔައީ،" އޭނާ ކިޔައިދިނެވެ.

ފުރަތަމަ ރާޅު އަރައިގެން ދިޔަ ވަގުތު، ރަށުގެ އެކި ތަންތަން ފޮޓޯ ނަގަމުން އައިސް އޭނާއަށް މަޑުކޮށްލެވުނީ އުސްކޮށް ހަދައިފައިހުރި ރަށުގެ ސިއްހީ މަރުކަޒު އިމާރާތުގެ ކައިރީގައި ހުރި ކުޑަކުޑަ ކެފޭއެއްގެ ގާފޮޅެއްގެ މަތީގައެވެ.

"ހުއްޓައި، އެ ތަނުން އެ ވަގުތު ދުރުވި ކަނބަލަކު ބުނީ، ތިތާކު ނުހުރެވޭނެޔޭ، ރާޅު އެބަ އަރަޔޭ. ދެން އަޅުގަނޑު ދެންނެވިން އަޅުގަނޑު މަޑުކޮށްލާނިއްޔޭ އަދި،" އަހްމަދު ބުންޏެވެ.

އެހެން ބުނެ، އޭނާ އެ ތަނުގައި މަޑުކޮށްލައިގެން ހުރުމާ ކިރިޔާވީ އެންމެ ދެ މިނެޓެއްހާ އިރެވެ. ދެން ފެނުނީ ރަށުގެ ދެ ފަރާތުން، މުޅި ރަށް ބައްދައިލުމަށްފަހު ބިޔަ ބޮޑު ރާޅެއް ރަށު ތެރެއަށް ބަންޑުންވި މަންޒެރެވެ.

"ހަމަ ވަރަށް ބޮޑަށް އުފުލުނު، ގާތްގަނޑަކަށް 12 ވަރަކަށް ފޫޓުގެ ރާޅެއް. ހަމަ އެއްކޮށް ބަންޑުންވީ. ރަށުގެ ތެރެއަށް ބަންޑުންވީ. ވަށައިގެން ހަމަ ބަންޑުންވީ ގޮތަކަށް އަޅުގަނޑަށް ސިފަވީ،"

ރައްކާތެރިކަމެއް ލިބޭނެ ދިމާއަކަށް ދިއުމަށް ޓަކައި އެންމެން ވެސް އޭރު ދުވަމުން ދިޔައީ، މިސްކިތާ ދިމާއަށެވެ. ރަށު އެންމެން މިސްކިތަށް ޖަމާވަމުންދިޔަ ނަމަވެސް އަހްމަަދަށް ދެވޭނެ ގޮތެއް ނެތެވެ. އެ ފުރުސަތެއް ވެސް އޭނާއަކަށް ނުލިބުނެވެ. އޭރު ދެވަނަ ރާޅު ރަށަށް އަރައިފިއެވެ.

"ދެވަނަ ރާޅާއެކުގައި ކުދި ބޮޑު އެންމެން މިސްކިތާ ހަމައަށް ދާ މަންޒަރު ފެނުނު. ބައެއް މީހުން ހަމަ ރޮމުން، ހަޅޭއްލަވަމުން، އެހީތެރިކަމަށް އެދޭ ހާލުގައި ދުވެފައި މިސްކިތާ ދިމާއަށް ދިޔަ،"

މަންޒަރު ރެކޯޑުވީ ނޭނގުމެއްގެ ތެރޭ

ބޮޑު ރާޅެއް ރަށު ތެރެއަށް އަރައިގެން އައިއިރު އޭނާ ވިސްނީ ބާރު އޮއިގަނޑުގައި ނުޖެހި ސަލާމަތް ވެވޭނެ ގޮތަކަށް ހުންނާށެވެ. އަތުގައި އޭރު ވެސް ކެމެރާ އޮތްއިރު، އަހްމަދަށް ނޭނގި ނަމަވެސް އެ ކެމެރާއިން އޭރު އޮތީ ވީޑިއޯ ޖެއްސިފައެވެ.

އޭރު ނޭނގުމެއްގެ ތެރޭގައި ވެސް ރެކޯޑުކުރެވެމުން ދިޔައީ މަރާ ހަނގުރާމަކުރަމުން ދިޔަ ވަގުތެކެވެ. ސަލާމަތަށް އެދި ގޮވާ އަޑުތަކާއި، ތަކްބީރުގެ އަޑު އެ ވީޑިއޯއިން އިވެއެވެ.

ބާރު އޮއިގަނޑުގެ ތެރެއިން، ކަރުތާ ފެނުގައި މިސްކިތަށް ސަލާމަތް ހޯދަން ދާން އުޅޭ މީހަކު ވެސް އަހްމަދުގެ ކެމެރާއަށް ރެކޯޑުވި ވީޑިއޯއިން ފެނެއެެވެ.

އަޙްމަދުގެ ކެމެރާއިން ރެކޯޑުކުރެވުނު ވީޑިއޯއިން މަންޒަރެއް: ކުރިމަތިން ފެންނަނަނީ ރާޅުގެ ތެރެއިން މީހަކު މިސްކިތާ ދިމާއަށް ދާތަން. އަޙްމަދު އެ ވަގުތުހުރީ މަރުކަޒު ކައިރި ހުރި ކެފޭއެއްގެ ގާފޮޅު މަތީގައެވެ. އެއިރު 12 ފޫޓެއްހާ އުސް، ދެވަނަ ރާޅު ރަށު ތެރެއަށް ވަދެއްޖެއެވެ. --

"ފުރަތަމަ ކްލިޕަކީ އަޅުގަނޑަށް ހަމަ ނޭނގުމެއްގެ ތެރޭ ނެގުނު ކްލިޕެއް،"

މިއީ އޭނާ އުފަންވީސުރެ، ފުރާވަރާ ހަމައަށް ދިރިއުޅުނު ރަށް ކުޑަ ވަގުތުކޮޅެއް ތެރޭ ފުނޑުވެ، ދޮވެލެވުނު މަންޒަރެވެ.

އެ ފަހުން އެ ކަމާ ވިސްނާނެ ވަގުތެއް ނުލިބުނެވެ. އާއިލާ މީހުން ސަލާމަތުން ތިބިތޯ ޔަގީންކުރަން ގެއަށް ދިޔައިރު މުޅި ގޭތެރޭ އެފުށްމިފުށަށް ވަނީ ޖެހިފައެވެ. ގޭގައިހުރި ހުރިހާ އެއްޗެއް ވަނީ ރާޅާއެކު ދޮވެވިފައެވެ.

ނަމަވެސް ހިތަށް ކިރިޔާ ވެސް ފިނިކަމެއް ލިބުނީ އާއިލާ މީހުން ސަލާމަތުން ތިބިކަން ޔަގީންވުުމުންނެވެ.

ވީޑިއޯތަކާއި ފޮޓޯތަކަށްވީ ކިހިނެއް؟

ސުނާމީގެ ޚަބަރު ލިބުމާއެކު އަތޮޅުގެ ގިނަ ރަށްތަކަކުން ކަނދޮޅުދުއަށް ދޯނިފަހަރުގައި، ޒަރޫރީ ތަކެއްޗާއި، ފެނާއި ކާބޯތަކެތި ހިފައިގެން އައެވެ. ކޮންމެ މީހަކު ވެސް ބޭނުންވެފައި ހުރީ، ފޭބުނު ގޮތަކަށް، އެރުނު ދޯންޏަކަށް އަރައިގެން އަވަހަށް ކަނދޮޅުދޫން ފައިބައިގެން ދާށެވެ.

އެ ގޮތަށް އެކި އާއިލާތަކުން އެކި ރަށްރަށަށް ދިޔައިރު، އަޙްމަދާއި އޭނާގެ އާއިލާ ދިޔައީ އެ އަތޮޅު މީދޫއަށެވެ. އެއީ އަޙްމަދުގެ ޕްރައިމަރީ ގްރޭޑުތަކުގެ ކިޔެވުމަށް އެ ރަށުގައި ހުރުމުން، އޭނާއާ ވެސް ގާތް ބަޔަކު އެ ރަށުގައި ތިބީތީއެވެ. މީދޫއަށް ދެވުނީ އެ ދުވަހު ހަވީރެވެ.

ޖެހިގެން އައި، 27ވަނަ ދުވަހު އަޙްމަދު، އޭނާގެ ކެމެރާ ހިފައިގެން ދިޔައީ އެ ރަށުގައި ސްޓޫޑިއޯ އަކަށެވެ. އޭގައިހުރި ފޮޓޯތަކާއި، ވީޑިއޯތައް ސީޑީއަކަށް އެޅުމަށްފަހު އަޙްމަދު އެ ޙަވާލުކުރީ އޭރުގެ ކަނދޮޅުދޫ ޚާއްސަ މަޖިލީހުގެ މެންބަރު ޢަލީ ވަޙީދަށެވެ.

އަޙްމަދުގެ ކެމެރާއިން ރެކޯޑުކުރެވުނު ވީޑިއޯއިން މަންޒަރެއް: ކުރިމަތން ކަނާތުން ފެންނަ ހުދު އިމާރާތަކީ ކަނދޮޅުދޫ ސިއްހީ މަރުކަޒެވެ. އަޙްމަދު އެ ވަގުތުހުރީ މަރުކަޒު ކައިރި ހުރި ކެފޭއެއްގެ ގާފޮޅު މަތީގައެވެ. އެއިރު 12 ފޫޓެއްހާ އުސް، ދެވަނަ ރާޅު ރަށު ތެރެއަށް ވަންނަނީއެވެ. --

އެ ސީޑީ އޭރުގެ ޓެލެވިޜަން މޯލްޑިވްސްއަށް ފޯރުކޮށްދިނުމާއެކު، މުޅި ރާއްޖެއަށް އެ މަންޒަރުތައް އާންމުވިއެވެ.

"އޭގެފަހުން ވެސް އަޅުގަނޑު ބައެއް ފޮޓޯތަކާއި އެއްޗެތި އެއްކުރިން. އެއްކޮށްގެން ހަމަ އެ ގެންގުޅުނިން ވަރަށް ފަހަކާ ޖެހެންދެން. މިހާރު ވެސް ބައެއް ފޮޓޯތައް އަޅުގަނޑު އަތުގައި ހުންނާނެ. އެއީ އަސްލު އަޅުގަނޑަަށް އެ ފޯރުކޮށްދެވުނު ގޮތަކީ. އަޅުގަނޑަށް ހަމަ އެ ބަލާ ކޮންމެ ފަހަރަކު އެއިރުގައި، ޚާއްސަކޮށް އެއިރުގައި، ދެން މިހާރު ވެސް ވަރަށް ފުން އިހުސާސްތަކެއް ކުރެވޭ،"

އަޙްމަދުގެ އަތުގައި އެ މަންޒަރުތަކާއެކު އޭގެ ތެރޭ ރައްކާކުރެވިފައި ވަނީ އެ ދުވަހުގެ ވޭނީ ރުއިމުގެ އަޑުތަކާއި، އެހީއަށް އެދި ގޮވި އަޑުތަކެވެ.

އަޙްމަދު މުޙައްމަދު ވަޙީދު، "ސަން" އަށް އިންޓަވިއުދެނީ: އަހްމަދަކީ 2004ވަނަ އަހަރުގެ ޑިސެމްބަރު 26ވަނަ ދުވަހު ރ. ކަނދޮޅުދޫއަށް ސުނާމީ އެރި މަންޒަރު ރެކޯޑުކުރި މީހާއެވެ. އޭނާގެ ރެކޯޑުކުރި މަންޒަރަކީ ރާއްޖޭގެ ރަށަކަށް ސުނާމީ އެރި ވަގުތު ނެގުނު މަދު ވީޑިއޯތަކުގެ ތެރެއިން ވީޑިއޯއެކެވެ. -- ސަން ފޮޓޯ

މިއަދު ވެސް މިއީ ކުލަ މަންޒަރެއް

މި ބިރުވެރި ކާރިސާއަށްފަހު ހަ އަހަރު ވަންދަން އަހްމަދު މިފަދަ އެއްވެސް ވާހަކައެއް އާންމުކޮށް ދައްކައިފައެއް ނުވެއެވެ. މިއަދު މި ބިރުވެރި ކާރިސާއަށް 20 އަހަރު ފަސްވެ ދިޔަ ނަމަވެސް، އޭނާގެ ލޯމަތީ އެ މަންޒަރުތައް ސިފަވަނީ ކުލަކޮށެވެ.

އޭނާގެ ކެމެރާއަށް ނެނުގުނު އެތައް މަންޒަރަކާއި، އަޑެއް އޭނާ ވަނީ ދެކި އަޑު އަހައިފައެވެ. އެ ހަނދާންތަކުގެ ވާހަކަ އަދިވެސް އޭނާ ކިޔައިދެނީ އިއްޔެ ހިނގިފަދަ ހާދިސާއެއް ފަދައިންނެވެ.

"މިއަދު ވެސް ހަމަ އެ އިހުސާސްތައް އެގޮތަށް އެބަކުރެވޭ، އަޅުގަނޑަށް އެ މަންޒަރު ސިފަކުރެވެނީ ހަމަ ވަރަށް ބިރުވެރި ނާމާން ވަގުތެއްގެ ގޮތުގައި،"

ނަމަވެސް ކަނދޮޅުދޫއާމެދު އިންތިހާއަށް ފަޚުރުވެރިވާ އަހްމަދަށް، ކުޑައިރު އޭނާގެ އެކުވެރީންނާއެކު ރަށުގެ އެކި ތަންތަނުގައި ޖެހުނު ސަކަރާތުގެ ހަނދާންތަކާއި، އުފަލުގެ އިހުސާސްތަކަކީ އަދިވެސް އެ ހަނދާންތަކަކުން އޭނާގެ ހިތް އުފާކޮށްދޭ ކަންކަމެވެ.