ހައްޖަށް ފޮނުވުމަށް ކޮންމެ އަހަރަކު ރާއްޖެއަށް ލިބޭ ކޯޓާއިން، ފުރަތަމަ ފަހަރަށް ހައްޖަށް ދާ މީހުންނަށް އިސްކަން ދިނުމާ ގުޅޭ ގޮތުން އާންމުންގެ ޚިޔާލަށް އިސްލާމިކް މިނިސްޓަރު މުޙައްމަދު ޝަހީމް ޢަލީ ސައީދު މިއަދު އެދިވަޑައިގެންފިއެވެ.
ޝަހީމް ފޭސްބުކްގައި ކުރައްވާފައިވާ ޕޯސްޓެއްގައި ވަނީ، ފަރުޟު ހައްޖު އަދާކޮށްފައި ތިބޭ މީހުންނަށް ދެވަނަ ހައްޖެއް ކުރެވޭނީ ހައްޖުކުރާތާ ފަސް އަހަރު ފަހުން ކަމަށް ބައެއް ގައުމުތަކުގައި އުސޫލުތައް ހަދައިފައި އޮންނަ ކަމަށެވެ.
"މިއީ ފަރުޟު (ފުރަތަމަ) ހައްޖުކުރަން އެދޭ ފަރާތްތަކަށް ފުރުޞަތު ދިނުމުގެ ގޮތުން ކުރާކަމެއް. މިފަދަ ކަމެއް ރާއްޖޭގައި ކުރުމާ މެދު ތިޔަބޭފުޅުންގެ ޚިޔާލުފުޅަކީ ކޮބައިތޯ؟،" އޭނާ އައްސަވައިފައިވެއެވެ.
އެ ޕޯސްޓަށް ޖަވާބު ދެމުން ގިނަ ބަޔަކު ވަނީ އެއީ ރަނގަޅު ޚިޔާލެއްގެ ގޮތުގައި ސިފަކޮށްފައެވެ.
ބައެއް މީހުން ވަނީ، އުމުރުން ދުވަސްވީ މީހުން ހައްޖު ކިޔޫގައި ޖެހި އަހަރުތައް ފާއިތުވާއިރު ވެސް ހައްޖުވުމުގެ ފުރުސަތު ނުލިބޭ ކަމުގެ ކަންބޮޑުވުން ފާޅުކޮށްފައެވެ. އޭގެ ބަދަލުގައި، ފަރުޟު ހައްޖު އަދާކޮށްފައިވާ ބައެއް މީހުންނަށް އަނެއްކާ ވެސް ހައްޖަށް ދިޔުމުގެ ފުރުސަތު ލިބޭ ފަހަރު އަންނަކަން އެ މީހުން ފާހަގަކޮށްފައިވެއެވެ.
"އަޅުގަނޑުގެ މަންމައާއި ބައްޕަ ފައިސާ ދައްކައިގެން ތިބޭތާ އެތައް އަހަރެއް ވެއްޖެ. ދެވޭނެ ކަމަށް ވަނީ 2027 ގައި. އަޅުގަނޑުގެ ބައްޕަ އެތައް ފަހަރަކު ސްޓްރޯކް ޖެހި ގައިބާރު ވަނީ ވަރަށް ދެރަވެފައި. 2027 އާ ހަމައަށް ދުނިޔޭގައި ހުންނާނެ ކަމެއް ވެސް ނޭނގެ. އަޅުގަނޑުގެ މައިންބަފައިންނަށް ވީހާވެސް އަވަހަށް އެފުރުސަތު ލިބުން ވަރަށް ބޮޑަށް އެދެން،" ޝަހީމްގެ ޕޯސްޓަށް ކޮމެންޓު ކުރި މީހަކު ބުނެފައިވެއެވެ.
އެ ކޮމެންޓާ ގުޅުވައި މިނިސްޓަރު ވަނީ، އެއީ ވަރަށް ދެރަ ކަމެއް ކަމަށާއި، އެ ކަންބޮޑުވުމަށް ހައްލު ހޯދައި ދޭން މަސައްކަތް ކުރައްވާނެ ކަމަށް ވިދާޅުވެފައެވެ.
ރާއްޖެއަށް އާންމު ގޮތެއްގައި ލިބެނީ 1،000 ހައްޖު ކޯޓާ ކަމަށްވާއިރު، ޝަހީމް ވަނީ ކޯޓާ އިތުރުކުރަން މަސައްކަތް ކުރައްވާނެ ކަމަށް މީގެ ކުރިން ވިދާޅުވެފައެވެ.
މީގެ އިތުރުން އޭނާ ވަނީ މިހާރު ރާއްޖޭގައި ހައްޖާ ގުޅޭ ކަންތައްތައް އޮތީ ރަނގަޅު މަގެއްގައި ކަމަށާއި، ހައްޖުގެ ކަންކަން ހަރުދަނާކޮށް އަގު ވެސް ކުޑަ ކުރުމަށް ކަމާ ގުޅުން ހުރި އިދާރާތަކުން މަސައްކަތް ކުރާ ކަމަށް ވިދާޅުވެފައެވެ.
ސަރުކާރުން ވަނީ ޙައްޖަށް މީހުން ގެންދަން ލިބޭ ހުރިހާ ކޯޓާއެއް ޙައްޖު ކޯޕަރޭޝަނަށް ދޭން ނިންމައިފައެވެ.
އެކަމަކު، އަންނަ އަހަރުން ފަށައިގެން ކޯޓާ އިތުރުވެއްޖެ ނަމަ، އިތުރުވާ ބައިން އަމިއްލަ ޖަމާއަތްތަކަށް ދިނުމުގެ ވިސްނުން ވެސް ގެންގުޅުއްވާ ކަމަށް ޝަހީމް ވިދާޅުވެފައިވެއެވެ.