އިމާމުން ތަމްރީނުކުރުމަށް އަންނަ އަހަރު ވެސް އިތުރު ފުރުސަތުތައް ފަހިކޮށްދޭނެ ކަމަށާއި، ބޭރުގެ އެކި ގައުމުތަކާއެކު އެކަމުގެ މަޝްވަރާތައް ކުރަމުންދާ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު މިއަދު ވިދާޅުވެއްޖެއެވެ.
ރާއްޖޭގެ ހުރިހާ އިމާމުންނާއި ޚަތީބުން ތަމްރީނުކުރުމަށް ހިންގި ގައުމީ މަޝްރޫއު ނިންމުމުގެ ރަސްމިއްޔާތުގައި ވާހަކަދައްކަވަމުން ޝަހީމް ވިދާޅުވީ މި ނިމެނީ އެ މަސައްކަތުގައި ވަރަށް ފާގަތި އަހަރެއް ކަމަށެވެ. ނަމަވެސް އިތުރު ތަމްރީނު ލިބުމުގެ ފުރުސަތުތައް ރާއްޖެއާއި ރާއްޖެއިން ބޭރުގެ އެކި ގައުމުތަކުން ފަހިކޮށްދެއްވާނެ ކަމަށް ޝަހީމް ވިދާޅުވިއެވެ.
ޝަހީމް ވިދާޅުވީ އެފަދަ ތަމްރީނުގެ ދަތުރުތަކަކީ ހަގީގަތުގައި ކްލާސްރޫމެއްގައި ކިޔަވަން ލިބޭ މައުލޫމާތުތަކަށް ވުރެ، ދުނިޔަވީ ތަޖުރިބާއާއި އެހެންމީހުން ކަންތައްކުރާ ގޮތް ދެނެގަތުމަށް ލިބޭ ފުރުސަތެއް ކަމަށެވެ. އެގޮތުން ކްލާސްރޫމުން ނުލިބޭ މައުލޫމާތާއި އިލްމު، އެފަދަ ދަތުރުތަކުގައި ލިބޭނެ ކަމަށް ވިދާޅުވިއެވެ.
މިއަންނަ އަހަރުގެ އަޅުގަނޑުމެންގެ ދަތުރުތައް އިރާދަކުރެއްވިއްޔާ ޖޯޑަންއަށް، ގަތަރަށް، ކުވެއިތަށް އަދި ބަހްރެއިންއަށް އަދި ސައުދީ އަރަބިއްޔާގެ އިތުރުން މެލޭޝިއާއާ އަދި އެހެންވެސް ގައުމުތަކަށް އަޅުގަނޑުމެން އިމާމުން އިތުރު ތަމްރީނަށް އަޅުގަނޑުމެން ފޮނުވާ ގޮތަށް މިދަނީ މަޝްވަރާކުރަމުން އެގައުމުތަކުގައި ތިއްބެވި އަޅުގަނޑުމެންގެ އެކުވެރި ފަރާތްތަކާ، އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު
އިމާމުންނާއި ޚަތީބުން ތަމްރީނުކުރުމަށް ހިންގުނު ގައުމީ މަޝްރޫއު ނިންމުމުގެ ރަސްމިއްޔާތުގެ ތެރެއިން -- ފޮޓޯ/ އިސްލާމިކް މިނިސްޓްރީ
އިމާމުން ތާޒާކުރުމުގެ ގައުމީ މަޝްރޫއަކީ އިސްލާމިކް މިނިސްޓްރީން އިމާމުކަމުގެ ދާއިރާއިން އިތުރު ތަމްރީނު ދިނުމަށްޓަކައި ތަފާތު 11 ސަރަހައްދަކަށް ބަހާލައިގެން މުޅި ރާއްޖޭގެ ދާއިމީ އިމާމުންނަށާއި ޚަޠީބުންނަށް އަމާޒުކޮށްގެން ކުރިއަށް ގެންދިޔަ އިންޓެންސިވް ޓްރެއިނިން ޕްރޮގްރާމެކެވެ.
މި ޕްރޮގްރާމުގައި ޖުމްލަ ނުވަ މޮޑިއުލެއް ބައިވެރީންނަށް އުނގަންނައި ދެވިފައިވާނެ ކަމަށް އެ މިނިސްޓްރީން ބުންޏެވެ.
މި ތަމްރީނު ޕްރޮގްރާމުގެ މަގްސަދަކީ އިމާމުކަމުގެ ދާއިރާއިން އިމާމުންނަށް އިންޓެންސިވް ތަމްރީނެއް ދިނުމާއި، މި ޒަމާނުގައި އިމާމުންނަށް ބޭނުންވާ، މިސްކިތްތަކާ ގުޅޭ އިތުރު މަޢުލޫމާތު ފޯރުކޮށްދިނުމެވެ. އަދި ޤުރުއާނާއި، ތަޖުވީދުގެ އިލްމާއި، ތަފްސީރާއި ފިގުހާއި ޙަދީޘާއި އަގީދާގެ އިލްމުގެ ދާއިރާއިން އިމާމަކަށް ބޭނުންވާ މުހިއްމު އިލްމީ ކަންކަން އުނގަންނައި ދިނުން ވެސްމެއެވެ. އަދި މިސްކިތްތައް ބެލެހެއްޓުމުގެ ގޮތުން އަދާކުރަންޖެހޭ މަސްއޫލިއްޔަތު އަދާކުރެވޭނެ ވަރަށް އިމާމުންގެ ޝަޚުސިއްޔަތު ބިނާކުރުމަކީ ވެސް މި ޕްރޮގްރާމްގެ އަމާޒެކެވެ.
އިމާމުންނާއި ޚަތީބުން ތަމްރީނުކުރުމަށް ހިންގުނު ގައުމީ މަޝްރޫއު ނިންމުމުގެ ރަސްމިއްޔާތުގެ ތެރެއިން -- ފޮޓޯ/ އިސްލާމިކް މިނިސްޓްރީ
މި ޕްރޮގްރާމްގައި މާއްދާތައް ކިޔަވައިދިނުމުގައި ހިމަނާފައިވާ ބައިތަކަކީ:
- އަގީދާއާއި އިސްލާމީ އަޚުލާގު
- ތަޖުވީދު: ތިއޮރީ އަދި ޕްރެކްޓިސް
- މުޖުތަމައު ބިނާކުރުމުގައި މިސްކިތުގެ ދައުރު
- އަޅުކަމުގެ ފިގުހު: ހުކުމްތަކާއި އަސާސުތައް
- ކީރިތި ޤުރުއާނުގެ ތަފްސީރާއި ޤުރްއާނަށް ތަދައްބުރުކުރުން
- ޤުރްއާނިކް އަރަބިކް
- ޙަދީޘާއި އިސްލާމީ ސަގާފަތް
- އުލޫމުލް ޤުރްއާނަށް މަގެއް
- ދައުވާގެ އުސުތަކާއި ޚިޠާބާ
ރާއްޖޭގެ އުތުރާއި ދެކުނުން އަދި މެދުރާއްޖޭތެރޭގެ ހުރިހައި ރަށަކަށް މި ޕްރޮގުރާމް ވަނީ ހިންގާފައެވެ. މިހާތަނަށް 818 ބައިވެރިން މި ޕްރޮގްރާމް ފުރިހަމަ ކޮށްފައިވެއެވެ.
މިއަހަރު ވަނީ 100އަށް ވުރެ ގިނަ ތަމްރީނު ފުރުސަތު ރާއްޖެއިން ބޭރުން އިމާމުންނަށް ހޯދައިދީފައެވެ.