ޗައިނާއިން މިނިސްޓްރީ އޮފް ލޯކަލް ގަވާމެންޓް ޕަބްލިކް ވޯކްސް (އެމްސީއެލްޕީ) އަށް ހަދިޔާކުރި މަގު ސާފުކުރާ އުޅަނދު ލ. ފޮނަދޫ ކައުންސިލާ މިއަދު ހަވާލުކޮށްފިއެވެ.
ރޯޑް ސްވީޕާ ކިޔާ މިފަދަ އުޅަނދަކީ މަގު ކުނި ކަހާ, ސާފުކޮށް ބަލަހައްޓަން ބޭނުން ކުރާ އެއްޗެކެވެ. މި އުޅަނދު ހަދިޔާ ކޮށްފައި ވަނީ ޗައިނާގެ ޔުނާން ހޭންޑް އިން ހޭންޑް ޕްރޮގްރާމްގެ ދަށުންނެވެ.
ލޯކަލް ގަވާމެންޓް މިނިސްޓްރީގައި މިއަދު ބޭއްވި ހަފުލާއެއްގައި ޗައިނާގެ ސަރުކާރުގެ ފަރާތުން ވަނީ މި އުޅަނދު ފޮނަދޫ ކައުންސިލާ ރަސްމީކޮށް ހަވާލު ކޮށްފައެވެ.
މިނިސްޓްރީން ބުނީ މިއީ ސާފު، ދުޅަހެޔޮ މާހައުލެއް ކަށަވަރު ކުރުމަށް މުހިންމު ދައުރެއް އަދާކުރާނެ ދީލަތި އެހީއެއް ކަމަށެވެ.
މަގު ސާފުކުރާ އުޅަނދު ހަދިޔާކުރުމަށް ބޭއްވި ރަސްމިއްޔާތުގެ ތެރެއިން -- ފޮޓޯ: ލޯކަލް ގަވާމެންޓް މިނިސްޓްރީ
ލ. ގަމާއި ކައްދޫގެ އިތުރުން ފޮނަދޫ ގުޅާލައިގެން ތަރައްގީ ކޮށްފައިވާ ލިންކް ރޯޑަކީ ޗައިނާގެ ސަރުކާރުގެ އެހީގައި ހިންގި ބޮޑު މަޝްރޫއުއެކެވެ. މީގެ ކުރިން ވަރަށް ބޮޑަށް ހަލާކުވެފައިވާ އެ މަގު ފަހުން ވަނީ ވަރަށް ޒަމާނީ ފެންވަރަކަށް ތަރައްގީކޮށް ނިންމާލައިފައެވެ.
މި މަޝްރޫއަކީ ޗައިނާ ސަރުކާރުން 30 މިލިއަން ޑޮލަރު ހަރަދުކޮށްގެން ކުރިއަށް ގެންދިޔަ މަޝްރޫއެކެވެ. މިއީ އެ އަތޮޅު ފޮނަދު އާއި ގަން ގުޅުވައިދޭ 15.1 ކިލޯ މީޓަރުގެ މަގެކެވެ.