ޓެލްއަވީވު (24 ޑިސެންބަރު 2024): ޔަމަންގައި ވެރިކަންކުރާ ހޫޘީ ޖަމާއަތުން ފޮނުވާލި މިސައިލެއް ރޭ ދަންވަރު އިސްރާއީލުގެ މެދުތެރެއަށް ވެއްޓުމުގެ ސަބަބުން 20 މީހަކު ޒަޚަމްވެއްޖެއެވެ.
އިސްރާއީލުގެ އަސްކަރިއްޔާ ބުނިގޮތުގައި 20 މީހުން ޒަޚަމްވީ ޔަމަނުން ފޮނުވާލި މިސައިލަކުން ސަލާމަތްވުމަށްޓަކައި އިސްރާއީލުގެ އެކި ސަރަހައްދުތަކުގައި އެއްފަހަރާ މިލިޔަނެއްހާ މީހުން ބިންގަރާސްތަކަށް ވަނުމަށް އުޅުމުގެ ތެރޭގައި ފިތި ބާރުވެގެންނެވެ. ޒަޚަމްވި 20 މީހުންގެ ތެރެއިން ބައެއް މީހުންނަށް ބޮޑެތި އަނިޔާތަކެއް ލިބުނު ކަމަށާއި ޔަމަންގެ މިސައިލުން ސަލާމަތްވުމަށް ބިރުވެރި ހާލަތުގައި ހަޅޭލަވަމުން އިސްރާއީލުގެ އެތަށް ލައްކަ ބަޔަކު ދުވަމުންދިޔަ ކަމަށް އެގައުމުގެ ނޫސް ރިޕޯޓްތައް ބުނެއެވެ.
އިސްރާއީލު ސިފައިންގެ ބަޔާނެއް ބުނާގޮތުން އިސްރާއީލުގެ ވައިގެ ދިފާއީ ނިޒާމުތަކުން ޔަމަންގެ ބަލިސްޓިކް މިސައިލަށް ހުރަސްއެޅިއެވެ. މިއާއެކު އެ މިސައިލް އަމާޒަށް ވާސިލެއް ނުވެއެވެ. އެހެން ނަމަވެސް އެމިސައިލްގައި ހަރުކޮށްފައިވާ ބާރުގަދަ ވޯހެޑާއި މިސައިލްގެ ބައިތައް ވެއްޓުނީ އިސްރާއީލުގެ މެދުތެރޭގެ ސަރަހައްދުތަކަށެވެ. އެތަންތަނަށް ވެސް ވަނީ މާއްދީ ބޮޑެތި ގެއްލުންތަކެއް ލިބިފައެވެ.
މީގެ ތިން ދުވަސްކުރިން ވެސް ޔަމަނުން ވަނީ ބާރުގަދަ މިސައިލަކުން އިސްރާއީލުގެ ވެރިރަށް ޓެލްއަވީވަށް ހަމަލާދީފައެވެ. އެ ހަަމަލާދިނީ އަޑަށްވުރެ 12 ގުނައަށް ދަތުރުކުރާ ހައިޕާސޮނިކް މިސައިލަކުން ކަމަށް ޔަމަންގެ ހޫޘީންގެ ތަރުޖަމާން ކާނަލް ޔަހްޔާ ސަރީޢު ވަނީ ވިދާޅުވެފައެވެ.
އިސްރާއީލު ވަނީ ޔަމަނުން ފޮނުވާލި ހައިޕާސޮނިކް މިސައިލަށް ހުރަސްއެޅުމުގައި އެގައުމުގެ ވައިގެ ދިފާއީ ހުރިހާ ނިޒާމުތަކެއް ފެއިލް ވިކަމަށް އެއްބަސްވެފައެވެ. އެމިސައިލް ވަނީ ސީދާގޮތެއްގައި ވެރިރަށް ޓެލްއަވީވަށް އަރައިފައެވެ. އިސްރާއީލުގައި ފަސްބާވަތެއްގެ ވައިގެ ދިފާއީ ނިޒާމުތައް ހުރިއިރު ވެސް މިހުރިހާ ނިޒާމުތަކެއް ފޫއަޅުވާލައި ޔަމަންގެ ހައިޕާސޮނިކް މިސައިލް ވަރަށް ބަރާބަރަށް އޭގެއަމާޒަށް ވާސިލްވި މައްސަލައިގައި އިސްރާއީލުން ވަނީ ކަންބޮޑުވެ ތަހުގީގެއް ވެސް ފަށާފައެވެ.
ޔަމަންގެ ހައިޕާ ސޮނިކް މިސައިލް ހަމަލާގެ ސަބަބުން އިސްރާއީލުގެ 30 މީހަކު ޒަޚަމްވެ އެތައް އިމާރާތެއް ހަލާކުވިކަމަށް ވެސް އިސްރާއީލު ވަނީ އެއްބަސްވެފައެވެ. މިދިޔަ ހޮނިހިރު ދުވަހު ޔަމަނުން ފޮނުވާލި ހައިޕާސޮނިކް މިސައިލުން ރައްކާތެރިވުމަށް އިސްރާއީލުގެ ހަތަރު މިލިޔަން މީހުން ބިންގަރާސްތަކަށް ވަންކަމަށްވެއެވެ.
ޔަމަނުން އުފައްދާ ހައިޕާސޮނިކް މިސައިލެއްގެ ޕްރިންޓް އިމޭޖް
ޔަމަންގެ މިސައިލް ޓެކްނޮލޮޖީ ގެ ތަޖުރިބާކާރަކު ވިދާޅުވިގޮތުގައި އިސްރާއީލުގެ ދިފާއީ 5 ލޭޔަރު ފޫއަޅުވާލާފައި އިސްރާއިލަށް އެރީ ޔަމަނުން އުފައްދާފައިވާ "ފަލަސްތީނު 2" މަރުކާގެ ހައިޕާސޮނިކް މިސައިލް އެކެވެ. މިމަރުކާގެ މިސައިލް އުފައްދަނީ ސީދާ ޔަމަންގައި ކަމަށާ އެމިސައިލް އުފައްދާފައިވަނީ ފާއިތުވި ދެމަސްދުވަހުގެ ތެރޭގައިކަމަށް ވެސް ޔަމަންގެ ތަޖުރިބާކާރު ވިދާޅުވިއެވެ.
އޭނާ ވިދާޅުވިގޮތުގައި "ފަލަސްތީނު 2" މަރުކާގެ ހައިޕާސޮނިކް މިސައިލް ވައްޓާލެވޭނެ އެއްވެސް ދިފާއީ ނިޒާމެއް ދުނިޔޭގެ އެއްވެސް ގައުމެއްގައި އަދި ނުވެއެވެ. އޭނާ ވިދާޅުވިގޮތުގައި ޔަމަނުން ގެންދަނީ އެމަރުކާގެ ގިނަ އަދަދެއްގެ މިސައިލް އުފައްދަމުންނެވެ. އުފައްދާ ހުރިހާ މިސައިލްތަކަކުން ހަމަލާދޭނީ އިސްރާއީލަށެވެ.
ޣައްޒާގެ އާންމުންނާ ދެކޮޅަށް އިސްރާއީލު ހިންގާ ގަތުލުއާންމުތައް ހުއްޓާލައި ޣައްޒާއާ ދެކޮޅަށް އަޅާފައިވާ ހިސާރުގެ ފިޔަވަޅުތައް އުވާލަންދެން އިސްރާއީލަށް ދޭ ހަމަލާތައް ކުރިޔަށް ގެންދާނެކަމުގެ އިންޒާރު ހޫޘީންގެ ތަރުޖަމާން ކާނަލް ޔަހްޔާ ސަރީޢު ވަނީ ދެއްވާފައެވެ. އޭނާ ވިދާޅުވިގޮތުގައި ޔަމަންގެ ހައިޕާ ސޮނިކް މިސައިލް ހަމަލާތަކުން ސަލާމަތް ވުމަކީ އިސްރާއީލަށް ކުރެވޭނެ ކަމެއްނޫނެވެ.
އިސްރާއީލު މީހުން އަބަދު ތިބެންޖެހޭނީ ޔަމަނުން ދީފާނެ މިސައިލް ހަމަލާއެއްގެ ބިރުގައެވެ. އެހެންކަމުން ޣައްޒާގައި ގަތުލުއާންމު ހިންގަމުން އިސްރާއީލަށް އަމާންކަމުގައި ނޯވެވޭނެކަމުގެ އިންޒާރު އޭނާ ދެއްވިއެވެ.
އިސްރާއީލު ވަނީ ދާދިފަހުން ވެސް ޔަމަނަށް ވައިގެ މަގުން ހަމަލާތަކެއް ދީފައެވެ. އަދި އިސްރާއީލަށް ވާގިވެރިވާ އެމެރިކާއާއި އިނގިރޭސިވިލާތުން ވެސް ވަނީ އެތަށް ފަހަރަކު ޔަމަނަށް ހަމަލާތައް ދީފައެވެ. ހޫޘީން އިސްރާއީލަށް ހަމަލާދިނީ އިސްރާއީލުގެ ހަމަލާތަކަށްފަހުއެވެ. އެެހެންކަމުން މިއީ އިސްރާއީލާއި އެމެރިކާ އަދި އިނގިރޭސީންގެ ހަމަލާތަކުން ޔަމަންގެ އަސްކަރީ ތަންތަނަށް އަދި ޚާއްސަކޮށް މިސައިލް ޓެކްނޮލޮޖީގެ ކާރުޚާނާތަކާއި އެތަކެތި ރައްކާކުރާ ތަންތަން ސަލާމަތްވެފައިވާކަން ހާމަވާކަމެއްކަމަށް ތަޖުރިބާކާރުން ދެކެއެވެ.
ޔަމަނުން މިފަހަކަށް އައިސް އިސްރާއީލަށް ބާރުގަދަ ހަމަލާތަކެއް ދޭން ފަށާފައި މިވަނީ އިސްރާއީލާއި ލުބްނާނާ ދެމެދު ހަމަލާތައް ހުއްޓާލުމުގެ އެއްބަސްވުމެއް ގާއިމް ކުރުމާއެކު ހިޒްބުﷲ އާއި އިސްރާއީލުގެ ހަނގުރާމަ ހުއްޓިފައިވާ ދަނޑިވަޅުގައެވެ. މީގެއިތުރުން ސޫރިޔާގެ ވެރިކަމުގެ ނިޒާމު ބަދަލުވުމާއެކު ސޫރިޔާ ހުރަސްކޮށް އީރާނުން ހިޒްބުﷲ އަށް ފޯރުކޮށްދޭ ހަތިޔާރުގެ ސަޕްލައިތައްވެސްވަނީ ހުއްޓުމަކަށް އައިސްފައެވެ.
މިހާލަތާއެކު ހިޒްބުﷲ އާއި އީރާން ބަލިކޮށްލެވިއްޖެ ކަމަށާ އަދި މެދުއިރުމަތި ވެސް ބަދަލުކޮށްލެވިއްޖެކަމަށް ބުނެ އިސްރާއީލުގެ މަސްއޫލުވެރިން ގެންދަނީ ފޮނި ބައިސާ ކަނޑަމުންނެވެ. މިދަނޑިވަޅު ޔަމަންގެ ބާރުގަދަ މިސައިލް ހަމަލާތައް މަތަކުރުމުގައި އިސްރާއީލު ނާކާމިޔާބުވެ ޔަމަންގެ މިސައިލްތައް އިސްރާއީލުގެ ވެރިރަށް ޓެލްއަީވަށް އަރަން ފެށުމުން އިސްރާއީލަށް އަނެއްކާވެސްވަނީ ބޮޑު މާޔޫސްކަމެއް ލިބިފައެވެ.
ރިޕޯޓްތައް ބުނާގޮތުން ހޫޘީން އިސްރާއީލަށް ދޭ ބާރުގަދަ މިސައިލް ހަމަލާތަކުގެ ފަހަތުގައި އޮތީ އީރާންއެވެ. ހޫޘީންނަށް ހައިޕާސޮނިކް މިސައިލް ޓެކްނޮލޮޖީ ފޯރުކޮށްދީފައި ވަނީ އީރާންކަމަށްވަނީ ބެލެވިފައެވެ. އިސްރާއީލު ވަނީ އީރާނުގެ ނިއުކްލިޔާ މަރުކަޒުތަކަށް ވެސް ހަމަލާދޭނެކަމަށް ބުނެ ދާދިފަހުން އިންޒާރުތައް ވެސް ދޭން ފަށާފައެވެ.
ޔަމަންގެ ހައިޕާސޮނިކް މިސައިލްތަކަކީ އީރާނުގެ ޓެކްނޮލޮޖީ ކަމަށް ބެލެވޭއިރު އީރާނުގައި މިއަށްވުރެވެސް ބާރުގަދަ އަދި އިސްރާއީލުގެ ނިއުކްލިޔާ މަރުކަޒުތައް ބިމާހަމަކޮށްލާވަރުގެ މިސައިލްތައް ހުންނާނެކަމުގެ ބިރު އިސްރާއީލު ވަނީ އިހްސާސް ކުރަންޖެހިފައި ކަަމަށް މުހައްލިލުން ވިދާޅުވެއެވެ.