މި ސަރުކާރުން ބަޖެޓުގެ ތާށިކަން އޮތުމުން، ތަރައްގީގެ ގިނަ މަޝްރޫއުތައް މަޑުޖައްސާލައިފައި އޮތް ނަމަވެސް މަޝްރޫއުތަކަށް ބޭނުންވާ ސާމާނަށް ބަޖެޓުކުރި މިންވަރަށް ވުރެ އިތުރަށް 400 މިލިއަން ރުފިޔާ ޚަރަދުކޮށްފިއެވެ.
ފިނޭންސް މިނިސްޓްރީން ވަނީ، މިމަހުގެ 12 ވަނަ ދުވަހާ ހަމައަށް ދައުލަތުން ކޮށްފައިވާ ޚަރަދުތަކާއި ލިބިފައިވާ އާމްދަނީގެ ތަފުސީލުތައް ހާމަކޮށްފައެވެ.
އެ ތަފާސްހިސާބުން ދައްކާ ގޮތުގައި މި އަހަރުގެ އެހާތަނަށް އާމްދަނީގެ ގޮތުގައި 32.3 ބިލިއަން ރުފިޔާ ލިބިފައިވާއިރު، ޚަރަދު ވަނީ 44.6 ބިލިއަން ރުފިޔާއަށް އަރައިފައެވެ.
ޚަރަދުތަކަށް ބަލާއިރު، މުސާރައާއި އިނާޔަތްތައް ހިމެނޭ ރިކަރަންޓް ޚަރަދުގެ ގޮތުގައި 31.4 ބިލިއަން ޚަރަދުކޮށްފައިވާއިރު، ކެޕިޓަލް ޚަރަދަށް ދިޔައީ 13.1 ބިލިއަން ރުފިޔާއެވެ. އެއީ މިދިޔަ އަހަރަށް ވުރެ އަދި މި އަހަރަށް ބަޖެޓުކޮށްފައިވާ އަދަދަށް ވުރެ ވެސް ކުޑަ އަދަދެކެވެ. އެގޮތުން މިދިޔަ އަހަރު މި މުއްދަތުގައި ކެޕިޓަލް ޚަރަދަށް 13.9 ބިލިއަން ބޭނުންކޮށްފައިވާއިރު މި އަހަރުގެ ބަޖެޓުގައި މި ދާއިރާއަށް 16.7 ބިލިއަން ޚާއްސަކޮށްފައިވެއެވެ.
އިންފްރާސްޓްރަކްޗާ މިނިސްޓަރު ޑރ. އަބްދުﷲ މުއްތަލިބު: މި އަހަރު މަޝްރޫއުތައް މަޑުޖެހިފައި އޮތް ނަމަވެސް، އަންނަ އަހަރު މަޝްރޫއުތައް ކުރިއަށްގެންދެވޭނެ ކަމުގެ ޔަގީންކަން އޮތް ކަމަށް އޭނާ ވިދާޅުވެފައިވޭ -- ފޮޓޯ: ރައީސް އޮފީސް
ޖުމްލަ ކެޕިޓަލް ޚަރަދު ބަޖެޓަށް ވުރެ ދަށް ނަމަވެސް، ކެޕިޓަލް ޚަރަދުތަކުގެ ތެރެއިން، މަސައްކަތްތަކަށް ބޭނުންވާ ސާމާނަށް ކުރި ޚަރަދު ވަނީ ބަޖެޓަށް ވުރެ އިތުރުވެފައެވެ. އެގޮތުން ޖުމްލަ 952 މިލިއަން ރުފިޔާ ޚަރަދުކޮށްފައިވާއިރު، އެއީ އެކަމަށް ބަޖެޓުކޮށްފައިވާ 552 މިލިއަނަށް ވުރެ 400 މިލިއަން ރުފިޔާ އިތުރު އަދަދެކެވެ. އޭގެ ތެރޭގައި ހިމެނެނީ:
- ފަރުނީޗަރާއި މެޝިނަރީއާއި އިކުއިޕްމެންޓަށް
ބަޖެޓުކުރި އަދަދު: 497.6 މިލިއަން ރުފިޔާ
ޚަރަދުކުރި އަދަދު: 678.7 މިލިއަން ރުފިޔާ
- އުޅަނދުތަކަށް
ބަޖެޓުކުރި އަދަދު: 54.2 މިލިއަން ރުފިޔާ
ޚަރަދުކުރި އަދަދު: 267 މިލިއަން ރުފިޔާ
- މައިނާ އެކްސްޓެންޝަންސް
ބަޖެޓުކުރި އަދަދު: 0.1 މިލިއަން ރުފިޔާ
ޚަރަދުކުރި އަދަދު: 6.2 މިލިއަން ރުފިޔާ
މައިނާ އެކްސްޓެންޝަންސްގެ ގޮތުގައި ފާހަގަކޮށްފައިވަނީ މަޝްރޫއުތައް ފުރިހަމަ ކުރުމަށް ދޭ މުއްދަތު ފަދަ ކަންތައްތައް އިތުރުކުރުމުން، އިތުރަށް ދާ ޚަރަދުތަކެވެ.
މީގެ އިތުރުން އުމްރާނީ ތަރައްގީއަށް، އިމާރާތްތަކާއި މަގުތަކާއި ބުރިޖުތަކާއި އެއާޕޯޓްތައް އެޅުން ފަދަ ކަންކަމަށް 9.82 ބިލިއަން ރުފިޔާ ޚަރަދުކޮށްފައިވެއެވެ. އެއީ ބަޖެޓުކުރި ވަރަށް ވުރެ ވެސް އަދި މިދިޔަ އަހަރުގެ މި މުއްދަތުގައި ޚަރަދުކޮށްފައިވާ ވަރަށް ވުރެ ވެސް މަދު އަދަދެކެވެ. އެގޮތުން ބަޖެޓު 10.99 ބިލިއަނަށް އަރާއިރު މިދިޔަ އަހަރުގެ މި މުއްދަތުގައި 11 ބިލިއަން ޚަރަަދުކޮށްފައިވެއެވެ.
މިދިޔަ އަހަރުގެ ނޮވެމްބަރު މަހު ވެރިކަމަށް އައި މި ސަރުކާރުން އަންނަނީ، މީގެ ކުރިން އޮތް އެމްޑީޕީގެ ސަރުކާރުގައި މި އަހަރަށް ފާސްކުރި ބަޖެޓުގައި މަޝްރޫއުތަކަށް އެކަށީގެންވާ ވަރަށް ފައިސާ ހިމަނައިފައިނުވާ ކަމުގެ ޝަކުވާ ކުރަމުންނެވެ.
ވެރިކަން ކުރާ ޕީއެންސީގެ ސުޕަމެޖޯރިޓީ އޮންނަ ރައްޔިތުންގެ މަޖިލީހުން އަންނަ އަހަރަށް ލަފާކޮށް 56.6 ބިލިއަން ރުފިޔާގެ ބަޖެޓެއް ފާސްކޮށްފައިވާއިރު، އަންނަ އަހަރު މަޝްރޫއުތައް ހިންގޭނެ ކަމުގެ ޔަގީންކަން އޮތް ކަމަށް ސަރުކާރުން ވަނީ ބުނެފައެވެ.