ހޮންޑާ އަދި ނިސާން އެއްކޮށްލުމަށް އެއްބަސްވެއްޖެ

ޖަޕާނުގެ އެންމެ ބޮޑު ދެ އޮޓޯމޯޓިވް ކުންފުނި ކަމަށްވާ ހޮންޑާ އަދި ނިސާން އެއްކޮށްލުމަށް އެއްބަސްވެއްޖެއެވެ. މި ދެ ކުންފުނި އެއްވުމުން ދުނިޔޭގެ ތިންވަނައަށް އެންމެ ބޮޑު އޮޓޯމޯޓިވް ކުންފުނި އުފެދޭނެ ކަމަށް ބެލެވެއެވެ.

މި ދެ ކުންފުނިން މިކަން އިއުލާނުކޮށްފައި ވަނީ މިއަދެވެ. މި އެއްވުމުގެ ސަބަބުން އަހަރަކު 30 ޓްރިލިއަން ޔެން (191 ބިލިއަން ޑޮލަރު) ގެ ވިޔަފާރިއެއް ކުރެވޭނެ ކަމަށާއި، ތިން ޓްރިލިއަން ޔެންގެ ފައިދާ ލިބޭނެ ކަމަށް ލަފާކުރެވެއެވެ.

މި ދެ ކުންފުނި އެއްކޮށްލުމުގެ މަޝްވަރާތައް 2025ވަނަ އަހަރުގެ ޖޫން މަހާ ހަމައަށް ނިންމުމަށްފަހު، 2026ވަނަ އަހަރުގެ އޯގަސްޓް މަހާ ހަމައަށް އެއް ހޯލްޑިން ކުންފުނި އުފައްދާ ގޮތަށް ވަނީ ރާވާފައެވެ. މި އެއްކޮށްލުމާ ގުޅިގެން ދެ ކުންފުނީގެ ހިއްސާތައް ސްޓޮކް މާކެޓުން އުނިކުރެވޭނެއެވެ.

މި އެއްކޮށްލުމަކީ އޮޓޯމޯޓިވް ދާއިރާގައި ފާއިތުވި އަހަރުތަކުގައި އައިސްފައިވާ އެންމެ ބޮޑު ބަދަލުތަކުގެ ތެރެއިން އެއް ބަދަލެވެ. މިއީ ޓެސްލާ އަދި ޗައިނާގެ ކުންފުނިތަކުން ކުރިމަތިވަމުންދާ ގޮންޖެހުންތަކަށް ޖަވާބު ދިނުމަށް އެޅޭ ފިޔަވަޅެއް ކަމަށް ވެސް ބެލެވެއެވެ.

ހޮންޑާގެ މާކެޓް ކެޕިޓަލައިޒޭޝަން 40 ބިލިއަން ޑޮލަރަށްވުރެ މަތިވާއިރު، ނިސާންގެ މާކެޓް ކެޕިޓަލައިޒޭޝަން 10 ބިލިއަން ޑޮލަރު ހާސިލުކޮށްފައިވެއެވެ. އައު ހޯލްޑިން ކުންފުނީގެ ބޯޑުގެ ގިނަ މެންބަރުން އައްޔަންކުރާނީ ހޮންޑާއިންނެވެ.

މި އެއްކޮށްލުމަކީ 2021ވަނަ އަހަރު ފިއެޓް ކްރައިސްލާ އޮޓޯމޯބައިލްސް އަދި ޕީއެސްއޭ ގްރޫޕް އެއްވެގެން 52 ބިލިއަން ޑޮލަރުގެ ޑީލަކުން ސްޓެލަންޓިސް އުފެއްދި ފަހުން، އޮޓޯމޯޓިވް ދާއިރާގައި ހިނގާ އެންމެ ބޮޑު ބަދަލެވެ.

މީޑިއާ ރިޕޯޓްތައް ބުނާގޮތުން މިޓްސުބިޝި މޯޓޯސް މި އެއްކޮށްލުމާ ގުޅިއްޖެނަމަ، ޖަޕާނުގެ މި ގްރޫޕްގެ އަހަރީ ވިއްކުން އަށް މިލިއަން ކާރަށްވުރެ އިތުރުވާނެއެވެ. މިހާރު ދުނިޔޭގެ ތިންވަނައަށް އެންމެ ބޮޑު އޮޓޯމޯޓިވް ގްރޫޕަކީ ދެކުނު ކޮރެއާގެ ހޮންޑާ އަދި ކިއާއެވެ.

ރޮއިޓާސް އިން ފާއިތުވި ހަފުތާގައި ރިޕޯޓުކުރި ގޮތުގައި ހޮންޑާ އަދި ނިސާން އެއްކޮށްލުމަށް މަގުފަހިކުރުމުގެ ގޮތުން އެ ދެ ކުންފުނިން ވަނީ އެކި ގޮތްތައް ބަލައިފައެވެ. މި ދެ ކުންފުނިން މާޗް މަހު ބުނެފައި ވަނީ އިލެކްޓްރިފިކޭޝަން އަދި ސޮފްޓްވެއާ ޑިވެލޮޕްމަންޓްގެ ދާއިރާއިން އެއްބާރުލުން ދިނުމަށް ވިސްނަމުންދާ ކަމަށެވެ. އޯގަސްޓް މަހު މިޓްސުބިޝި މޮޓޯސްއާއެކު ގުޅިގެން މަސައްކަތްކުރުމަށް ވެސް އެއްބަސްވެފައިވެއެވެ.

ފާއިތުވި މަހު ނިސާން އިން ވަނީ 9،000 މުވައްޒަފުން ވަޒީފާއިން ވަކިކުރުމަށާއި، ދުނިޔޭގެ އުފެއްދުންތެރިކަން 20 އިންސައްތައިން ކުޑަކުރުމަށް ނިންމާފައެވެ.

މިއީ ޗައިނާ އަދި އެމެރިކާގެ މުހިންމު މާކެޓްތަކުގައި ވިއްކުން ދަށްވުމާ ގުޅިގެން ނިންމި ނިންމުމެއްކަމަށް އެކުންފުނިން ބުނެއެވެ.

ހޮންޑާއަށް ވެސް ޗައިނާގައި ވިޔަފާރި ދަށްވުމާ ގުޅިގެން ހާސިލުކުރެވުނީ އުންމީދުކުރި ވަރަށްވުރެ ދަށް ނަތީޖާއެކެވެ.