ފްލޮރިޑާ (22 ޑިސެންބަރު 2024): ޔޫރަޕްގެ އިއްތިޙާދުގެ ގައުމުތަކަށް ބޭނުންވާ ތެލާއި ގޭސް ދެން ގަންނަންޖެހެނީ އެމެރިކާއިން ކަމަށާއި އެގޮތަށް އަމަލު ނުކޮށްފިނަމަ ޔޫރަޕްގެ އިއްތިޙާދުގެ ގައުމުތަކާ ދެކޮޅަށް ވިޔަފާރީގެ ހަރުކަށި ފިޔަވަޅުތަކެއް އަޅާނެކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެއެވެ.
ފްލޮރިޑާގައި ދެއްވި ބަޔާނެއްގައި ޓްރަމްޕް ވިދާޅުވީ އެމެރިކާ ޔޫރަޕްގެ ގައުމުތަކަށް ބޮޑެތި ގުރުބާނީތަކެއްވަމުންދާއިރު އެކަމުގެ އަގު އެގައުމުތަކުންވެސް ވަޒަން ކުރަން ޖެހޭނެ ކަމުގައެވެ. މިގޮތުން ޔޫރަޕްގެ އިއްތިޙާދުގެ ގައުމުތަކަށް ބޭނުންވާ ތެލާއި ގޭސް ދެން ގަންނަންޖެހެނީ އެމެރިކާއިން ކަމަށާއި އެގޮތަށް އަމަލުނުކޮށްފިނަމަ އެމެރިކާއަށް ޖެހޭނީ ޔޫރަޕްގެ އިއްތިޙާދުގެ ގައުމުތަކުން އެމެރިކާއަށް ފޮނުވާ (އެކްސްޕޯޓްކުރާ) މުދަލުން ނަގާ ޑިއުޓީ ބޮޑުކުރަން ކަމަށް ޓްރަމްޕް ވިދާޅުވިއެވެ.
ޓްރަމްޕް ވަނީ މީގެ ދުވަސްތަކެއް ކުރިންވެސް ޔޫރަޕްގެ އިއްތިޙާދުގެ ގައުމުތަކުން އެމެރިކާއަށް އެކްސްޕޯޓްކުރާ މުދަލުން ނަގާ ޑިއުޓީ ބޮޑުކުރާނެކަމުގެ އިންޒާރު ދެއްވައި ވާހަކަ ދައްކަވާފައެވެ. މިމައްސަލާގައި ޔޫރަޕްގެ އެންމެ ބޮޑު ދެ އިގްތިސާދު ކަމަށްވާ ޖަރުމަނާއި ފަރަންސޭސިވިލާތް ވަނީ ވަރަށް ބޮޑަށް ކަންބޮޑުވެފައެވެ.
ޔޫރަޕްގައި އުފައްދާ މުދަލަކީ އާންމުކޮށްވެސް އަގުބޮޑު އެއްޗެކެވެ. އެއަށް އިތުރު ޓެކްސްތައް ނަގާނަމަ ޔޫރަޕްގެ މުދާ ނުވަތަ އުފެއްދުންތައް އެމެރިކާގައި ނުވިކޭނެއެވެ. ނުވަތަ ވިއްކުން ވަރަށް ދަތިވާނެއެވެ. ނަތީޖާއަކަށްވާނީ އިގްތިސާދީ ގޮތުން ބޮޑު ގެއްލުމަކާ ޔޫރަޕްގެ ގައުމުތައް ކުރިމަތިލާން ޖެހުމެވެ.
ޔޫރަޕްގެ އުފެއްދުންތައް އަގުބޮޑުވާ ފުރަތަމަ ސަބަބަކީ ޔޫރަޕްގެ އާބާދީ ގެ ބޮޑު ބަޔަކީ ވަޒީފާ އަދާނުކުރެވޭ އުމުރުގެ މުސްކުޅިންކަމަށްވެފައި މުސްކުޅި އާބާދީ އަށް ކުރަންޖެހޭ ޚަރަދުތައް ބޮޑުވުމެވެ. ދެވަނަ ސަބަބަކީ އުފައްދާ ތަކެއްޗަށް ބޭނުންވާ ރޯމެޓީރިއަލް އާއި ކާރުޚާނާތައް ހިންގަން ބޭނުންވާ ހަކަތައިގެ ބާވަތްތައް ބޭރުން އިންޕޯޓް ކުރަންޖެހުމާއި ޔޫރަޕްގައި ވަރަށް މަދުން ނޫނީ މިހާރު ގުދްރަތީ ރިސޯސް ނެތުމެވެ.
ތިންވަނަ ކަމަކީ ޔޫރަޕްގެ ދިރިއުޅުމުގެ ޚަރަދުތައް ބޮޑުވުމާ އަދި މަސައްކަތްތެރިންގެ މުސާރަތައް ބޮޑުވުމާއި އިޖްތިމާއީ ރައްކާތެރިކަމުގެ ނިޒާމުގެ ލޭޔަރުތައް ގިނަވެ ސަބްސިޑީތައްވެސް ގިނަވުމެވެ. މިކަންކަމުގެ ސަބަބުން ޗައިނާ، އިންޑިއާ ފަދަ އޭޝިއާގެ ބޮޑެތި ގައުމުތަކާއި ބްރަޒީލް އާއި އިންޑޮނީޝިއާ ފަދަ ބާރަށް ކުރިއަރަމުން އަންނަ އަދި ދިރިއުޅުމުގެ އަގުތައް ދަށް ގައުމުތަކުގެ އަގުހެޔޮ ލޭބަރުން އުފައްދާ އަގުހެޔޮ އުފެއްދުންތަކާ ވާދަކުރުމުގެ ގާބިލްކަން ޔޫރަޕްގެ އުފެއްދުންތަކަށް ލިބިފައެއް ނުވެއެވެ.
އެމެރިކާއަށް އެކްސްޕޯޓްކުރާ ޔޫރަޕްގެ އުފެއްދުންތަކުން އެމެރިކާ އިތުރު ޓެކްސްތައް ނަގައި ޑިއުޓީތައް ބޮޑުކޮށްފިނަމަ ޔޫރަޕްގެ އިގްތިސާދުތައް އިނދަޖެހޭ ހިސާބަށް ކަންތައް ދިޔުމަކީ ދުރުކަމެއް ނޫންކަމަށް ތަޖުރިބާކާރުން ވިދާޅުވެއެވެ. ޔޫރަޕަށް ލިބޭ އާމްދަނީ ކުޑަވެ ސަބްސިޑީތަކާއި ޕެންޝަންގެ އިނާޔަތްތައް ކުޑަކޮށްފިނަމަ ޔޫރަޕްގައި ހަމަނުޖެހުންތައް އުފެދި ބައިބައިވުންތައް އުފެދިގެން ދިޔުމުގެ ފުރުސަތު ބޮޑުކަމަށްވެއެވެ. ޔޫރަޕަކީ ކުރިން ހަނގުރާމައާއި ތަޅާފޮޅުން އިންތިހާއަށް ބޮޑު ބައްރެކެވެ. ޔޫރަޕްގައި ހަމަޖެހުން އޮންނަ މައިގަނޑު ސަބަބަކީ ޔޫރަޕްގެ އާންމުންގެ ތަނަވަސްކަން ބޮޑުވުމެވެ.
އެމެރިކާއަކީ ޔޫރަޕާ އިންތިހާއަށް ދުރުގައި އޮންނަ ގައުމަކަށްވާއިރު ޔޫރަޕްގެ އިއްތިޙާދުގެ ގައުމުތަކަށް ބޭނުންވާ ތެލާއި ގޭސް އެމެރިކާއިން ގަތުމަކީ ޓްރާންސްޕޯޓް ގެ އަގުތައް ބޮޑުވެގެންދާނެ ކަމެކެވެ. އެމެރިކާއިން ގިނަ އަދަދަކަށް މިތަކެތި ގަންނަން ޖެހިއްޖެނަމަ ޔޫރަޕްގެ އުފެއްދުންތަކުގެ އަގު މިހާރަށްވުރެވެސް ބޮޑުވެގެންދާނެކަން ޔޫރަޕްގެ ލީޑަރުންނަށް އެނގިވަޑައިގަންނަވައެވެ.
ޔުކްރެއިން ހަނގުރާމަ ފެށުމުގެ ކުރިން ޔޫރަޕްގެ ގައުމުތަކަށް ރަޝިއާގެ ތެލާއި ގޭސް ހޮޅިތަކުގެ ޒަރީއާ އިން ވަރަށް އަގުހެޔޮކޮށް ޔޫރަޕްގެ ގައުމުތަކަށް ލިބެއެވެ. ނަމަވެސް ޔުކްރެއިން ހަނގުރާމައާއެކު ޔޫރަޕުން ރަޝިއާއާ ދެކޮޅަށްއެޅި ދަތިކުރުމުގެ ފިޔަވަޅުތަކުގެ ސަބަބުން ރަޝިއާގެ ތެލާއި ގޭހުން ޔޫރަޕްވަނީ މަހުރޫމް ވެފައެވެ.
މިހާރު ޔޫރަޕުން ރަޝިއާގެ ތެލާއި ގޭސް ގަންނަނީ ތިން ވަނަ ފަރާތެއް މެދުވެރިކޮށް ކުރިޔަށްވުރެ މާ އަގުބޮޑުކޮށެވެ. އެމެރިކާއިން ތެލާއި ގޭސް ގަންނަންޖެހިއްޖެނަމަ މިހާރަށް ވުރެވެސް ބޮޑު ޚަރަދެއް އެކަމަށް ހިނގާނެއެވެ. މިއާއެކު ޓްރަމްޕްގެ މި ވާހަކަތަކުން ޔޫރަޕަށް ވަނީ ބޮޑު ހާސް ކަމެއް ކުރިމަތިވެފައި ކަމަށް ރިޕޯޓްތައް ބުނެއެވެ.