މިފްކޯއަށް ސިޔާސީ ނުފޫޒު ފޯރުވަން ފުރުސަތު ނުދޭނެ ކަމަށާއި އެފަދަ ނުފޫޒެއް ފޯރުވަން މަސައްކަތް ކުރާ ބަޔެއްގެ ނަން އާންމުކޮށް ހާމަކުރާނެ ކަމަށް އެ ކުންފުނީގެ ސީއީއޯ ޑރ. ވިޓާލީ ލްޔުބިމޯވް ވިދާޅުވެއްޖެއެވެ.
ޔޫކްރެއިންގެ ރައްޔިތެއް ކަމަށްވާ ލްޔުބިމޯވް މިފްކޯގެ ސީއީއޯގެ މަގާމަށް އައްޔަންކޮށްފައި ވަނީ މިދިޔަ ހަފުތާގައެވެ.
މިފްކޯއިން މިއަދު ނެރުނު ބަޔާނެއްގައިވަނީ، އެ ކުންފުނީގެ މުހިންމު މަގާމަކަށް ލްޔުބިމޯވް މިދިޔަ އާދިއްތަ ދުވަހު ބޭފުޅަކު އައްޔަންކޮށްފައިވާ ކަމަށެވެ. އެއީ ހިއުމަން ރިސޯސަސް ޑިޕާޓްމެންޓްގެ ޖެނެރަލްގެ މެނޭޖަރުގެ މަގާމަށް އަހުމަދު ނާސިރު ކަމަށް އެ ބަޔާނުގައިވެއެވެ. ނަމަވެސް އެ މަގާމަށް އެހެން މީހަކު އައްޔަން ކުރުމަށް ކުންފުނިން ބޭރުން ސިޔާސީ ޕްރެޝަރު އައި ކަމަށް މިފްކޯއިން ތުހުމަތުކުރިއެވެ.
އެއީ އާ ސީއީއޯ މަގާމާ ހަވާލުވެވަޑައިގަތް ފަހުން، އެ ކުންފުނީގެ ހިންގުމަށް ސިޔާސީ ނުފޫޒު ފޯރުވަން ބަޔަކު މަސައްކަތް ކުރި ފުރަތަމަ ފަހަރު ކަމަށް ބަޔާނުގައިވެއެވެ.
އެ މައްސަލައާ ގުޅޭ ގޮތުން ލްޔުބިމޯވް ނެރުއްވި ބަޔާނެއްގައި ވަނީ، މިފްކޯއަށް ސިޔާސީ ނުފޫޒު ފޯރުވަން ނުވަތަ އެ ކުންފުނީގެ މެނޭޖްމެންޓަށް އެއްވެސް ބާރެއް ފޯރުވަން މަސައްކަތް ކުރުމަކީ ބަލައިގަންނާނެ ކަމެއް ނޫން ކަމަށެވެ. އެގޮތުން އެފަދަ ނުފޫޒެއް ފޯރުވަން މަސައްކަތް ކޮށްފި ނަމަ އެކަން ކުރާ ބަޔެއްގެ މައުލޫމާތު އާންމު ކުރާނެ ކަމަށް އޭނާ ވިދާޅުވިއެވެ.
"މީގެ އިތުރުން، ސިޔާސީ ގޮތުން ބާރު ފޯރުވާ ފަރާތްތައް މަގާމުން ވަކިކުރުމަށް އެދި ކަމާ ގުޅުން ހުރި އިސް ފަރާތްތަކާ ވާހަކަދެއްކެވުން ހިމެނޭ ގޮތަށް، މިފަދަ ކަމެއް ތަކުރާރުނުވާނެކަން ކަށަވަރު ކުރުމަށް އެޅެން ހުރި ހުރިހާ ފިޔަވަޅެއް އަޅުއްވަން ފަސްޖެހިވަޑައިނުގަންނަވާނެ ކަމަށް ސީއީއޯ ވިދާޅުވި،" މިފްކޯގެ ބަޔާނުގައިވެއެވެ.
މިފްކޯގެ ފިހާރައެއް: މިފްކޯއަކީ ފައިދާނުވެ، ގެއްލުމުގައި ހިންގާތާ ދިގު މުއްދަތެއް ވެފައިވާ ކުންފުންޏެއް -- ސަން ފޮޓޯ/ ފަޔާޒު މޫސާ
ލްޔުބިމޯވް ވަނީ އޭނާގެ ލީޑާޝިޕްގައި މިފްކޯއަށް އޮތް އިތުބާރު ބޮޑުކޮށް، ކުންފުނީގެ އަމާޒުތައް ހާސިލުކުރުމަށް މަސައްކަތް ކުރައްވާނެ ކަމަށެވެ.
މިފްކޯއިން ބުނި ގޮތުގައި ސީއީއޯ މިހާރު ގެންދަވަނީ ކުންފުނީގެ ހިންގުމާ ގުޅޭ ތަފުސީލީ އިވެލިއޭޝަނެއްގެ މަސައްކަތްތައް ބައްލަވަމުންނެވެ. އެ މަސައްކަތަށް ފަހު، މިފްކޯގެ ކުރިއެރުން ދެމެހެއްޓެނިވި ގޮތެއްގައި ކުރިއަށްގެންދިޔުމާ ގުޅޭ ޕްރޮގްރާމެއް ސަރުކާރަށް ހުށަހަޅާނެ ކަމަށް އެ ކުންފުނިން ބުންޏެވެ.
މާލީ ހާލަތު ވަރަށް ދަށްކޮށް އޮތް މިފްކޯއަށް އާ ސީއީއޯއަކު ހޯދީ އެ މަގާމުގައި ހުންނެވި އަހުމަދު ސަމާހު ރަޝީދު މިދިޔަ މެއި މަހުގެ 21ގައި މަގާމުން ވަކިކުރުމަށް ފަހުގައެވެ. އޭގެ ފަހުން އޭނާއަށް ފިޝަރީޒް މިނިސްޓްރީގެ ސްޓޭޓް މިނިސްޓަރުކަން ދީފައެވެ.
މިފްކޯއަކީ ފައިދާނުވެ، ގެއްލުމުގައި ހިންގާތާ ދިގު މުއްދަތެއް ވެފައިވާ ކުންފުންޏެކެވެ.
މިފްކޯއަކީ 1993ގެ އަހަރުތަކުގެ ކުރީކޮޅު އޭރުގެ މަސް ކުންފުނި އެފްޕީއައިޑީގެ ނަން ބަދަލުކޮށް، އުފެއްދި ދަރަންޏަށް ޒިންމާވާ ވަކި ކުންފުންޏެކެވެ.
ނަމަވެސް ރައީސް އަބްދުﷲ ޔާމީން އަބްދުލްގައްޔޫމްގެ ވެރިކަމުގައި އެސްޓީއޯގެ ދަށަށް މިފްކޯ ބަދަލުކުރީ އެ ކުންފުނީގެ ދަރަނި ބޮޑުވުމުން އެ މައްސަލަ ހައްލުކުރުމަށެވެ.
އެއަށްފަހު މި ސަރުކާރުން ވަނީ ސްވެރިކަމުގެ ދާއިރާ ހަރުދަނާކޮށް ކުރިއަށް ގެންދިޔުމުގެ މަގުސަދުގައި، މިފްކޯއަކީ 100 ޕަސެންޓު ސަރުކާރު ކުންފުންޏަކަށް ބަދަލުކޮށްފައެވެ.
މީގެ ކުރިން ވެސް މިފްކޯގެ ލީޑާޝިޕަށް ސަރުކާރުގެ ނުފޫޒުން މުވައްޒަފުން އައްޔަންކޮށް، ސަރުކާރުގެ މަސްލަހަތު އޮންނަ ގޮތަށް ގޮތް ނިންމުމުގެ މައްސަލަތައް ފެންމަތިވެފައިވެއެވެ.