އެމެރިކާގައި ޓިކްޓޮކް މަނާކުރުމުގެ ކަންތައް ސުޕްރީމް ކޯޓުން ބަލައިދިނުމަށް ޓިކްޓޮކުން ހުށަހެޅި މައްސަލަ އެކޯޓުން ބަލައިގަތުމަށް ނިންމައިފިއެވެ.
މި މައްސަލައިގައި ޓިކްޓޮކް މަނާކުރުމަށް ހުށަހަޅާފައިވާ ޤާނޫނަކީ އެމެރިކާގެ ޤާނޫނު އަސާސީގެ ފުރަތަމަ އިސްލާހާ ޚިލާފު ޤާނޫނެއްތޯ ބެލުމަށް އެމެރިކާގެ ސުޕްރީމް ކޯޓުން ނިންމާފައިވެއެވެ.
ބުދަ ދުވަހު ނެރުނު އަމުރެއްގައި ސުޕްރީމް ކޯޓުން ބުނެފައިވަނީ ޖެނުއަރީ 10 ވަނަ ދުވަހު މި މައްސަލައިގެ އަޑުއެހުންތައް ބޭއްވުމަށް ހަމަޖެހިފައިވާ ކަމަށެވެ.
މި މައްސަލައިގައި ޓިކްޓޮކްއިން ވަނީ އެ ކުންފުނީގެ ޗައިނާގެ މައި ކުންފުނިން ވަކިވުމަށް ނުވަތަ އެމެރިކާގައި މަނާކުރުމަށް ލާޒިމްކުރާ ޤާނޫނު ބާޠިލްކުރުމަށް އެދިފައެވެ.
ކުރިން ފެޑެރަލް އެޕީލްސް ކޯޓަކުން ވަނީ މި ޤާނޫނު ދެމެހެއްޓުމަށް ނިންމައި، އެއީ ޤާނޫނު އަސާސީގެ ފުރަތަމަ އިސްލާހާ ޚިލާފު ޤާނޫނެއް ނޫން ކަމަށް ކަނޑައަޅާފައެވެ.
އެ ކޯޓުން ނިންމާފައިވަނީ ސަރުކާރުގެ ޤައުމީ ސަލާމަތާ ގުޅޭ ކަންބޮޑުވުންތަކަކީ ޓިކްޓޮކް މަނާކުރުމުން ކުރިމަތިވެދާނެ "މުހިންމު" އަސަރުތަކަށްވުރެ މުހިންމު ކަމެއް ކަމަށެވެ.
ނަމަވެސް ޓިކްޓޮކްއިން ސުޕްރީމް ކޯޓަށް ހުށަހެޅި އިސްތިއުނާފުގައި ބުނެފައިވަނީ "ޤައުމީ ސަލާމަތާ ގުޅޭގޮތުން ބިރުދެއްކުމުގެ ވާހަކަތަކުން މި ޤާނޫނުން އެމެރިކާގެ ހުރިހާ ރައްޔިތުންނަށް ކުރިމަތިވާނެ ނުރައްކާ ފޮރުވޭކަށް ނެތް" ކަމަށެވެ.
މި މައްސަލައިގައި ސުޕްރީމް ކޯޓުން ގޮތެއް ނިންމުމުން، އެމެރިކާގައި ޓިކްޓޮކް ބޭނުންކުރުމުގެ މުސްތަޤުބަލަށް އަސަރުކުރާނެ ކަމަށް ބެލެވެއެވެ.
ސުޕްރީމް ކޯޓުގެ މި ޝެޑިއުލްއިން ފަނޑިޔާރުންނަށް ފުރުސަތު ލިބިގެންދާނީ ޓިކްޓޮކް މަނާކުރުން ތަންފީޒުވުމުގެ ކުރިންނާއި، އޭގެ ޖެހިގެން އަންނަ ދުވަހު އޮންނަ އައު ރައީސް، ޑޮނަލްޑް ޓްރަމްޕްގެ ހުވާކުރުމުގެ ރަސްމިއްޔާތުގެ ކުރިން މި މައްސަލައިގައި ގޮތެއް ނިންމުމަށެވެ.
ރިޔާސީ އިންތިޚާބުގެ ކެމްޕޭނުގައި ޓްރަމްޕް ވަނީ "ޓިކްޓޮކް ސަލާމަތްކުރުމަށް" ވައުދުވެފައެވެ. އަދި އޭނާ ވަނީ މި އެޕްއާ ދޭތެރޭ ތާއީދު ފާޅުކޮށްފައެވެ. ނަމަވެސް، އައު ރައީސް މި އެޕް ރައްކާތެރިކުރުމަށް ގެންގުޅޭ ޕްލޭނާ ބެހޭ ގޮތުން މާ ގިނަ ތަފްސީލެއް ހާމަކޮށްފައެއް ނުް ނުވެއެވެ.
ހޯމަ ދުވަހު ޓިކްޓޮކް މަނާކުރުން ތަންފީޒުވިޔަ ނުދިނުމަށް މަސައްކަތްކުރާނެތޯ ސުވާލުކުރުމުން، ޓްރަމްޕް ބުނެފައިވަނީ އެކަން "ބަލާނެ" ކަމަށެވެ.
މާ-އަ-ލާގޯގައި ބޭއްވި ނޫސްވެރިންގެ ބައްދަލުވުމެއްގައި ޓްރަމްޕް ބުނެފައިވަނީ "އަހަރެންގެ ހިތުގައި ޓިކްޓޮކްއަށް ޖާގަ އެބައޮތް" ކަމަށެވެ. އަދި އޭނާ ވަނީ "ޒުވާނުންގެ ވޯޓު 34 ޕޮއިންޓުން ކާމިޔާބުކުރި" ކަމަށާއި، "ޓިކްޓޮކްގެ ސަބަބުން އެކަން ވެގެންދިޔަ ކަމަށް ބުނާ މީހުންވެސް އެބަތިބި" ކަމަށް ބުނެފައެވެ.
ޓިކްޓޮކްގެ ސީއީއޯ ޝައު ޒީ ޗީއު ވެސް ވަނީ އިންތިހާބީ ރައީސް ޓްރަމްޕް އާ އޭނާގެ ޕާމް ބީޗް ރިސޯޓުގައި ހޯމަ ދުވަހު ބައްދަލުކުރައްވާފައެވެ.