ދަރިވަރުންގެ އުމުރާ ނުގުޅޭ ވާހަކަ ދައްކައި، ދަރިވަރުން ގްރޫމްކުރި ކަމުގެ ތުހުމަތުގައި ހައްޔަރުކުރި ޓީޗަރު، އެ ރަށުގެ މެޖިސްޓްރޭޓް ކޯޓުން މިއަދު ދޫކޮށްލައިފިއެވެ.
އެ މައްސަލަ ފުލުހަށް ރިޕޯޓުކުރީ މިދިޔަ އޮކްޓޯބަރު މަހުގެ 17ވަނަ ދުވަހެވެ.
ފުލުހުން ބުނީ މި މައްސަލަ ރިޕޯޓު ކުރީ މ، ފ، ދ، ތ، ލ. އަތޮޅުގެ ތެރެއިން އަތޮޅެއްގެ ރަށަކުން ކަމަށެވެ. މި މައްސަލައަކީ ކުޑަކުދިން ޝާމިލުވާ މައްސަލައަކަށް ވުމުން، ކުއްޖާގެ އައިޑެންޓިޓީ ރައްކާތެރި ކުރުމުގެ ގޮތުން ކުއްޖާ ނިސްބަތްވާ ރަށް ފުލުހުން ހާމަކޮށްފައެއް ނުވެއެވެ.
އެ މައްސަލައިގައި ކޯޓު އަމުރެއްގެ ދަށުން ހައްޔަރު ކުރީ އުމުރުން 29 އަހަރުގެ ފިރިހެނެކެވެ. އޭނާ ހައްޔަރު ކުރީ އޮކްޓޯބަރު 27ވަނަ ދުވަހެވެ.
އޭނާގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން 20 ދުވަހަށް ބަންދުކުރަން މުއްދަތު ޖެހިއެވެ. އެއަށްފަހު 30 ދުވަހަށް ބަންދުކުރަން އަމުރުކުރިއެވެ.
ފުލުހުން ބުނީ، އިއްޔެ އޭނާގެ ބަންދު މުއްދަތު ހަމަވެފައިވާއިރު، މިއަދު އޭނާ މެޖިސްޓްރޭޓް ކޯޓަށް ހާޒިރުކުރުމުން ދޫކޮށްލައިފައިވާ ކަމަށެވެ.
މީގެ ކުރިން ފުލުހުން ވަނީ އެ މައްސަލައިގައި ތަހުގީގު ނިންމައި ދައުވާކުރަން ޕީޖީއަށް ފޮނުވާފައި ވާކަމަށް ބުނެފައެވެ.