މަލޭ މަގުތަކުގައި މީހުންނަށާއި ދުއްވާ އެއްޗިއްސަށް އުނދަގޫވާހެން ބަހައްޓާފައި ހުންނަ ކުންޏާއި ޕެލެޓް ފަދަ ތަކެތި މަގުތަކުން ނަގަން މާލޭ ސިޓީ ކައުންސިލުން މިއަދު އަންގައިފިއެވެ.
ސިޓީ ކައުންސިލުން މިއަދު ގެޒެޓުގައި ކުރި އިއުލާނެއްގައި ވަނީ މާލޭގެ މަގުތަކާއި އާންމު ތަންތަނުގައި ކުންޏާއި ޕެލެޓު ފަދަ ތަކެތި ގިނަވަމުންދާކަމުގެ ޝަކުވާ، ކައުންސިލަށް ލިބޭ ކަމަށެވެ.
އެހެންކަމުން އަންނަ އާދިއްތަ ދުވަހުގެ 18:00ގެ ކުރިން އެތަކެތި ނަގަން ކައުންސިލުން ވަނީ އަންގައިފައެވެ.
އަދި މަގުމައްޗަކީ ދުއްވާ ތަކެއްޗަށާއި، ރައްޔިތުންނަށް ހިނގާބިނގާވެއުޅެން ފަސޭހަ، ރައްކާތެރި އަދި ސާފުތާހިރު ތަނަކަށް ހެދުމަށް، ކައުންސިލުން ކުރަމުންގެންދާ މަސައްކަތުގައި އެންމެންގެ އެއްބާރުލުން ބޭނުންވާ ކަމަށް އެ އިއުލާނުގައި ވެއެވެ.
މާލޭ މަގެއްގައި ބަހައްޓާފައި ހުރި ޕެލެޓްތަކެއް ސިޓީ ކައުންސިލުން މީގެ ކުރިން ނެގުން: ޕެލެޓުތައް ނަގަން ސިޓީ ކައުންސިލުން ވަނީ އަންގާފައި -- ފޮޓޯ: ސިޓީ ކައުންސިލް
އިއުލާނުގައި ވަނީ މީގެފަހުން ކުންޏާއި މިފަދަ ތަކެތި ބަހައްޓާ ފަރާތްތައް ހޯދައި އެފަދަ ފަރާތްތަކާމެދު ފިޔަވަޅު އަޅާނެކަމަށެވެ. އަދި އެއްވެސް ބާވަތެއްގެ ކުންޏެއް، މާލޭގެ މަގުމަތީގައި ބެހެއްޓުމަކީ މަނާކަމެއްކަން ވެސް އެ އިއުލާނުގައި ފާހަގަކޮށްފައި ވެއެވެ.
މަގުތަކުގައި ކުނި ބަހައްޓާ މައްސަލަ ބޮޑުވެ، މީގެ ކުރިން ވެސް ކައުންސިލުން ވަނީ މާލޭގެ މަގުތަކުގައި ކުނި ބަހައްޓާ މީހުން ހޯދައި އެމީހުން އެކި އަދަދުތަކުން އެމީހުން ޖޫރިމަނާ ކޮށްފައެވެ.
މާލޭގެ މަގުތަކުން ކުނި ނަގައި މަގުތައް ސާފުކުރަން ސިޓީ ކައުންސިލުން ދަނީ ގިނަ މަސައްކަތްތަކެއް ކުރަމުންނެވެ.