ދުނިޔޭގެ އެންމެ ބޮޑު މަހުޖަނު އީލޮން މަސްކްގެ އާޓިފިޝަލް އިންޓެލިޖެންސް ސްޓާޓްއަޕް ކުންފުނި، އެކްސްއޭއައިއިން އެ ކުންފުނީގެ އައު ވާޝަން ކަމުގައިވާ ގްރޯކް-2 ޗެޓްބޮޓް، ސޯޝަލް މީޑިއާ ޕްލެޓްފޯމް އެކްސްގެ ހުރިހާ ޔޫޒަރުންނަށް ހިލޭ ބޭނުންކުރެވޭނެ ގޮތް ހަދައިފިއެވެ.
އިއްޔެ އެކްސްއޭއައިއިން ނެރުނު ބްލޮގް ޕޯސްޓެއްގައި ބުނެފައިވަނީ، އެކްސް ބޭނުންކުރާ އެންމެންނަށް ގްރޯކް-2 ޗެޓްބޮޓް ބޭނުންކުރެވޭ ނަމަވެސް، އެ ޕްލެޓްފޯމްގެ ޕްރީމިއަމް އަދި ޕްރީމިއަމް+ ކަސްޓަމަރުންނަށް އެ ޗެޓްބޮޓް ބޭނުންކުރެވޭ މިންވަރު އިތުރުވާނެ ކަމަށެވެ.
މީގެ އިތުރުން މުސްތަގުބަލުގައި އިތުރު ކުރާ އައު ޚިދުމަތްތައް އެންމެ ފުރަތަމަ ލިބޭނީވެސް ޕްރިމިއަމް ކަސްޓަމަރުންނަށްކަން އެކްސްއޭއައިގެ ޕޯސްޓުގައިވެއެވެ.
އިތުރަށް އެކްސްއޭއައި އިން ހާމަކޮށްފައިވަނީ، ފާއިތުވި ދެތިން ހަފުތާގެ ތެރޭގައި ގްރޯކް-2 މޮޑެލްގެ އައު ވާޝަނެއް ޓެސްޓްކުރަމުން ގެންގޮސްފައިވާ ކަމަށެވެ.
މީގެ ސަބަބުން އެކްސް ބޭނުންކުރާ ފަރާތްތަކަށް އޭއައި ޓެކްނޮލޮޖީގެ ފައިދާ ފަސޭހައިން ލިބޭނެ ކަމަށް ބެލެވެއެވެ.