ރައްޔިތުންގެ މަޖިލިސް މެންބަރުން އިންތިޚާބުވާ ސިޔާސީ ޕާޓީން އެ މެންބަރަކު ވަކިކޮށްފި ނަމަ ގޮނޑި ގެއްލޭ ގޮތަށް ގާނޫނު އަސާސީ އިސްލާހު ކުރުމާއި މި ސަރުކާރުން ކުރާ އެހެން ބައެއް ކަންތައްތަކާ ދެކޮޅަށް، ދަ ޑިމޮކްރެޓްސްއާއި އެމްޑީޕީ ގުޅިގެން މަސައްކަތް ކުރެވޭނެ ގޮތެއް ހޯދޭނެ ކަމަށް އެ ޕާޓީގެ ކައުންސިލް މެންބަރު މުޙައްމަދު ސައިފް ފާތިހު މިރޭ ވިދާޅުވެއްޖެއެވެ.
ދަ ޑިމޮކްރެޓްސްއިން މާލޭގައި ބޭއްވި ޖަލްސާއެއްގައި ސައިފް ވިދާޅުވީ ގާނޫނު އަސާސީއަށް ގެނައި އިސްލާހު ފަރުމާކޮށްފައިވަނީ ޕާޓީއެއްގެ އެތެރޭގެ ގުނަވަނަކުން ނިންމާ ގޮތަކުން ރައްޔިތުން ދިން ވޯޓު ބާތިލުވާ ގޮތަށް ކަމަށެވެ. އޭނާ އެ އިސްލާހު ސިފަކުރެއްވީ މަޖިލިސް މެންބަރުންގެ "ކަރުގައި މަޅިއެއް އެޅުވުމުގެ" ގޮތުގައެވެ.
"އަޅުގަނޑުމެންނަށް މި ފެންނަނީ ދިވެހިރާއްޖޭގައި މުޅި ދުސްތޫރީ ނިޒާމު ފުނޑި ހަލާކުވެގެންދާތަން، 2008ގައި އަޅުގަނޑުމެންނަށް ލިބުނު އުއްމީދު އެއްކޮށް ފަނޑުވެ ގެއްލިގެންދާތަން،" ސައިފް ވިދާޅުވިއެވެ.
އޭނާ ވިދާޅުވީ ޑިމޮކްރެޓުން އެ އިސްލާހާ ދެކޮޅަށް ގާނޫނު އަސާސީގެ ދިފާއުގައި ކުރާ މަސައްކަތުގައި ދެމިތިބޭނީ ރައްޔިތުންގެ ހައްގުގައި، ރައްޔިތުންނަށް ޓަކައި ވަކާލާތު ކުރުމުގައި ކަމަށެވެ.
މި ސަރުކާރުން ކުރަމުން އަންނަ ބަލައިނުގަނެވޭ ކަންތައްތަކުގެ ތެރޭގައި ނޫސްވެރިކަން ކޮންޓްރޯލް ކުރުމަށް މަސައްކަތް ކުރުމާއި ލާމަރުކަޒީ ނިޒާމަށް ބަހުގެ ހަމަލާތައް ދީ، އެ ނިޒާމަށް ނުރައްކާ ކުރަމުން ދިޔުން ހިމެނޭ ކަމަށް ސައިފް ވިދާޅުވިއެވެ. އެ ހުރިހާ ކަމަކާ ދެކޮޅަށް ޑިމޮކްރެޓުން އެއްވެސް ފަސްޖެހުމެއް ނެތި ތެދުވާނެ ކަމަށް އޭނާ ވިދާޅުވިއެވެ.
"އަޅުގަނޑުމެން ޖަލްސާ ބާއްވާނަން، އަޅުގަނޑުމެން މުޒާހަރާ ވެސް ކުރާނަން، އަޅުގަނޑުމެން ހައްޔަރުގައިވެސް ޖެހޭނަން އަދި އަޅުގަނޑުމެން ގުޅިފައިވާ ޕާޓީތަކާ އެކު އެއްބަސްވުމަކަށް މަޝްވަރާގެ މޭޒު ދޮށަށް އައިސް، އެކުގައި މަސައްކަތް ކުރެވޭނެ ގޮތެއް އިސްވެ އަޅުގަނޑުމެން ހޯދާނަން،" ސައިފް ވިދާޅުވިއެވެ.
އޭނާ ވިދާޅުވީ މިހާރު އެ މަސައްކަތް ފަށައިފައިވާ އެއް ޕާޓީއަކީ އެމްޑީޕީ ކަމަށާއި އެ ޕާޓީއާ ގުޅިގެން ޑިމޮރެޓްސްއަށް މަސައްކަތް ކުރެވޭނެ ކަމަށެވެ.
"އަޅުގަނޑު މި ވަގުތު އަޅުގަނޑުމެންނާ އެއްކޮށް މި މަސައްކަތުގައި ފައްޓަވާފައި އެވާ އެމްޑީޕީއަށް މަރުހަބާ ދަންނަވަން، އިރާދަކުރެއްވިއްޔާ އަޅުގަނޑުމެން އެންމެން އެއްކޮށް މި މަސައްކަތް ކުރެވޭނެ ގޮތެއް ހޯދޭނެ،" ސައިފް ވިދާޅުވިއެވެ.
ފާހަގަކޮށްލެވޭ ގޮތުގައި، މިދިޔަ އަހަރު ޑިމޮކްރެޓްސް އުފައްދައިފައިވަނީ ކުރީގެ ރައީސް މުޙައްމަދު ނަޝީދު އެމްޑީޕީގެ ޕްރައިމަރީން ނާކާމިޔާބުވުމުން އެ މަނިކުފާނަށް ތާއިދު ކުރައްވާ މެންބަރުން އެ ޕާޓީން ވަކިވުމަށް ފަހުގައެވެ.
މިދިޔަ ރިޔާސީ އިންތިޚާބުގެ ދުވަސްވަރު އެ ޕާޓީން އޭރުގެ ރައީސް އިބްރާހީމް މުޙައްމަދު ޞާލިޙުގެ ސަރުކާރަށް ވަރަށް ބޮޑަށް ފާޑުކިޔައި، ރިޔާސީ އިންތިޚާބުގައި ވެސް ވާދަކުރިއެވެ.
އެއަށްފަހު އެ ޕާޓީން ވަނީ ރައީސް ޑރ. މުޙައްމަދު މުއިއްޒުގެ ސަރުކާރާ ދެކޮޅަށް ވެސް މަސައްކަތްކޮށްފައެވެ. ނަމަވެސް މި އަހަރުގެ ރައްޔިތުންގެ މަޖިލީހުގެ އިންތިޚާބުގައި އެ ޕާޓީން އެމްޑީޕީއާ ގުޅިގެން މަސައްކަތްތަކެއް ކުރިއެވެ.