މާލޭގެ ކޮފީ ޝޮޕަކަށް މިއަދު ބަޔަކު ވަދެ، އެތަނުގައި ތިބި މީހުންނަށް އިންޒާރުދީ، ތަކެއްޗަށް ގެއްލުން ދިން ކަމަށް ތުހުމަތުކުރެވޭ މައްސަލައެއް ފުލުހުން ބަލަން ފަށައިފިއެވެ.
'ސަން'އަށް އެނގިފައިވާ ގޮތުގައި، މި ހާދިސާ ހިނގާފައި ވަނީ މ. ބޯއްޑޫ އިމާރާތުގެ ގްރައުންޑް ފްލޯގައި ހިންގާ ލެޓްސް ކޮފީ ޝޮޕުގައެވެ. މި ހާދިސާ ހިނގާފައި ވަނީ މިއަދު 12:40 ހާއިރު ކަމަށް މައުލޫމާތު ލިބިފައިވެއެވެ.
މައުލޫމާތު ލިބިފައިވާ ގޮތުގައި، ކެފޭގެ ތެރެއަށް ދިޔަ މީހުން، އެ ވަގުތު އެތަނުގައި ތިބި ދެ އަންހެން މުވައްޒަފަކަށް އިންޒާރުދީ، އެތަނުގައި ހުރި ބައެއް ތަކެއްޗަށް ގެއްލުން ދީފައިވެއެވެ. ނަމަވެސް، ހާދިސާ ހިނގަން މެދުވެރިވި ސަބަބެއް މިހާތަނަށް ސާފުވެފައެއް ނުވެއެވެ.
އެ ހާދިސާއާ ގުޅުން ހުރި ވީޑިއޯއެއް ދައުރުވެފައިވާއިރު، އެ ވީޑިއޯއިން މީހަކު އެތަނުގައި ހުންނަ ބައެއް ތަކެއްޗަށް ގެއްލުން ދޭ މަންޒަރު ފެނެއެއެވެ. އަދި، އެ މަންޒަރު ވީޑިއޯ ކުރަން އިން މީހަކަށް އިންޒާރު ދޭ މަންޒަރު ވެސް ވީޑިއޯއިން ފެނެއެވެ.
މިކަމާ ގުޅުވައި، ފުލުހުންގެ ތަރުޖަމާނު އެސިސްޓެންޓް ކޮމިޝަނާ އޮފް ޕޮލިސް އަހުމަދު ޝިފާން ވިދާޅުވީ، މި މައްސަލަ ތަހުގީގުކޮށް، އަޅަން ޖެހޭ ފިޔަވަޅުތައް އަޅަމުން އަންނަ ކަމަށެވެ. ނަމަވެސް، އިތުރު ތަފްސީލެއް ހާމައެއް ނުކުރައްވައެވެ.