އަފްޣާނިސްތާނުގެ ކާބުލްގެ އިންޓީރިއާ މިނިސްޓްރީ ތެރޭގައި ދިން ޖާނުންފިދާވުމުގެ ބޮމުގެ ހަމަލާއެއްގައި ވެރިކަން ކުރާ ތާލިބާނުންގެ ރެފިއުޖީ މިނިސްޓަރު ޚަލީލް ހައްގާނީ އަވަހާރަވެއްޖެއެވެ.
އެ ހަމަލާގައި އިތުރު ހަ މީހުން މަރުވެފައިވާ ކަމަށް ބޭރުގެ މީޑއާތަކުން ރިޕޯޓުކޮށްފައިވެއެވެ.
އެ ހަމަލާގެ ޒިންމާ އިސްލާމިކް ސްޓޭޓް ގްރޫޕް (އައިއެސް)އިން ވަނީ ނަގާފައެވެ.
އައިއެސްގެ "ނޫސް އެޖެންސީ" އަމާގުން ނެރުނު ރިޕޯޓެއްގައިވާ ގޮތުން އެ ހަމަލާދިނީ އައިއެސްގެ ހަނގުރާމަވެރިއަކު މިނިސްޓަރު އޮފީހުގެ ބޭރުގައި މަޑުކޮށްގެން ހުރެއެވެ.
ޚަލީލް ހައްގާނީ އަކީ ތާލިބާނުންގެ ހައްގާނީ ނެޓްވޯކް ކިޔާ ބާރުގަދަ ފެކްޝަނެއްގެ އެންމެ އިސް މެމްބަރެވެ. އެމެރިކާއިން އޭނާ ކަނޑައަޅާފައިވަނީ ޓެރަރިސްޓެއްގެ ގޮތުގައެވެ.
ޚަލީލް ހައްގާނީގެ ބޭބެ ޖަލާލުއްދީނަކީ 1980ގެ އަހަރުތަކުގައި އަފްޣާނިސްތާނުގައި ސޯވިއެޓް ސިފައިންނާ ހަނގުރާމަކުރި މަޝްހޫރު ގެރިލާ ލީޑަރެއް ކަމަށާއި، ތާލިބާނުންގެ 20 އަހަރުގެ ފިތުނަވެރިކަމުގެ ތެރޭގައި ގިނަ ހަމަލާތަކެއްގެ ފަހަތުގައި އޮތީ ހައްޤާނީ ނެޓްވޯކް ކަމަށް ވެސް ރޮއިޓާސް އިން ރިޕޯޓުކޮށްފައިވެއެވެ.
ޠާލިބާނާ ދެކޮޅަށް ކުރި 20 އަހަރު ދުވަހުގެ ދިގު ހަނގުރާމައަށް ފަހު، އެމެރިކާ ސިފައިން ކުއްލި ގޮތަކަށް އެ ގައުމުން ފޭބުމާ އެކު، 2021ވަނަ އަހަރު އަފްޣާނިސްތާންގެ ވެރިކަމަށް ވެރިވެގަތް ތާލިބާނުންގެ ސަރުކާރު އެއްވެސް ގައުމަކުން އަދި ރަސްމީކޮށް ބަލައިގެންފައެއް ނުވެއެވެ.