ދުނިޔޭގެ އެތައް ބަޔަކު މުވާސަލާތު ކުރުމަށް ބޭނުންކުރާ މުހިއްމު އެޕްލިކޭޝަންތައް ކަމަށްވާ ވަޓްސްއެޕް،ފޭސްބުކް އަދި އިންސްޓަގްރާމް ޑައުންވެއްޖެއެވެ.
ދުނިޔޭގެ އެތައް މިލިއަން ބަޔަކު ގުޅުވާލަދޭ މި މުހިއްމު ތިން އެޕްލިކޭޝަން ޑައުންވެފައި ވަނީ މީގެ އިރުކޮޅެއް ކުރިންނެވެ. މިކަމާ ގުޅިގެން އެތައް ބަޔަކު އޭގެ ރިޕޯޓު މެޓާއަށް ކޮށްފައިވީ ނަމަވެސް މިހާތަނަށް އެ ރިޕޯޓުތަކާ ގުޅިގެން މެޓާއިން ވަކި އެއްޗެއް ރަސްމީކޮށް އެ ކުންފުނިން އަންގާފައެއް ނުވެއެވެ.
މި އެޕްލިކޭޝަންތައް ޑައުންވުމާ ގުޅިގެން އެއްބަޔަކު އަނެއް ބަޔަކަށް ފޮނުވާ މެސެޖުތައް ނުލިބި، ބައެއް ޔޫޒާސް ލޮކްވެ އެކަކު އަނެކަކަށް މެސެޖު ކުރުމުގެ ޚިދުމަތަށް ވެސް ވަނީ ބުރޫ އަރާފައެވެ.
ދުނިޔޭގެ އެތައް ބަޔަކު މިކަމާ ގުޅިގެން ކަންބޮޑުވުން ފާޅުކޮށްފައިވާއިރު މެޓާއިން ރަސްމީ ބަހެއް އިއްވާފައި ނުވުމުން ގިނަ ބަޔަކު އަންނަނީ އެކަމާ ހިތްހަމަނުޖެހުން ފާޅުކުރަމުންނެވެ.
މެޓާގެ ސީއީއޯ މާކް ޒުކަބާގް--ފޮޓޯ/ލިންކްޑިން
ރިޕޯޓުތައް ބުނާގޮތުން މި ތިން އެޕްލިކޭޝަން ޑައުންވެފައި ވަނީ ދުނިޔޭގެ ހުރިހާ ޤައުމަކުންނެވެ. މީގެކުރިން ވެސް މި ތިން އެޕްލިކޭޝަން ޑައުންވެ މައްސަލަތައް ދިމާވެފައިވާއިރު އެއީ ކޮން ސަބަބަކާ ހުރެ ކަމެއް ރަސްމީކޮށް މެޓާއިން ބުނެދީފައެއް ނުވެއެވެ.
މެޓާއިން މިކަމާ ގުޅޭގޮތުން ވަކި އެއްޗެއް ބުނެފައިނުވާއިރު މައްސަލަ ހައްލުވާނެ އިރެއް ނޭނގޭތީ މި އެޕްލިކޭޝަންތައް ބޭނުންކުރާ ގިނަބަޔަކު ތިބީ ކަންބޮޑުވުމެއްގެ ތެރޭގައެވެ.