ބ. ގޮއިދޫގައި ޕޯލްޓްރީ ފާމެއް ތަރައްގީ ކުރުމަށް 50،000 އަކަފޫޓުގެ ބިމެއް ކުއްޔަށް ދޫކުރުމަށް އެ ރަށު ކައުންސިލުން ހުޅުވާލައިފިއެވެ.
ޕޯލްޓްރީ ފާމެއް ތަރައްގީކުރަން ބިމެއް ދުއްޔަށް ދިނުމަށް ގޮއިދޫ ކައުންސިލުން އިއުލާނުކުރީ މިދިޔަ އޮކްޓޫބަރު 13ގައެވެ.
މި ކަމާ ގުޅިގެން "ސަން"އަށް މައުލޫމާތު ދެއްވަމުން ގޮއިދޫ ކައުންސިލްގެ ރައީސް މުހައްމަދު ސިޔާން ވިދާޅުވީ ފުރަތަމަ ބުރުގައި ޕޯލްޓްރީ ފާމު ތަރައްގީ ކުރުމަށް އެދި އަށް ފަރާތަކުން ހުށަހެޅި ކަމަށެވެ.
އެހެން ނަމަވެސް އެ އިއުލާނާ ގުޅިގެން ހުށަހެޅިފައިވާ އެސްޓިމޭޓުތަކުގެ ބިމުކުލި އެކަށީގެންވާ ވަރަށްވުރެ ކުޑަކަމަށް ފެންނާތީ، އެ އިއުލާން ބާތިލްކޮށް، ބީލަމުގެ އުސޫލުން ބިން ކުއްޔަށް ނެގުމަށް އެ ކައުންސިލުން އަނެއްކާ ހުޅުވައިލީ މިއަދެވެ.
އެ ބިން ދޫކުރަނީ އެ ރަށު ދެކުނު ފަރާތުން ހަ ނަންބަރު ގޮނޑުދޮށުން ލޭންޑް ޔޫޒް ޕްލޭންގައި ފާހަގަކުރެވިފައިވާ ސަރަހައްދުންނެވެ.
ސިޔާން ވިދާޅުވި ގޮތުގައި އެ ރަށުގެ ލޭންޑްޔޫޒް ޕްލޭން ހެދިއިރު، ޕޯލްޓްރީ ފާމެއް ހެދުމަށް އެ ރަށުގެ ބައެއް ރައްޔިތުން ޝައުގުވެރިކަން ފާޅުކުރިއެވެ. އެ ކަމަށް ރިއާޔަތްކޮށް، ޕްލޭން ތައްޔާރުކުރީ ޕޯލްޓްރީ ފާމެއް އެޅުމަށް 50،000 އަކަފޫޓުގެ ބިމެއް ވެސް ހިމަނައިގެން ކަމަށް އޭނާ ވިދާޅުވިއެވެ.
މި ބިމުގެ ބީލަންފޮތް މާދަމާއިން ފެށިގެން އަންނަ ހަފްތާގެ ބުރާސްފަތީގެ ނިޔަލަށް، ސަރުކާރު ބަންދުނޫން ކޮންމެ ދުވަހަކު ހެނދުނު 9.00ން 12.00 އާދެމެދު އެ ރަށު ކައުންސިލްގެ ކައުންޓަރުން ލިބެން ހުންނާނެ ކަމަށް ވަނީ އިއުލާންކޮށްފައެވެ.
ބީލަން ފޮތުގެ އަގަކަށް ކަނޑައަޅާފައިވަނީ 1،500 ރުފިޔާއެވެ. އޮންލައިންކޮށް ވެސް ބީލަން ފޮތް ގަނެވޭނެ އިންތިޒާމު އެ ކައުންސިލުން އޮތީ ހަމަޖައްސައިފައެވެ.
ވިޔަފާރިއެއް ރަޖިސްޓްރީ ކޮށްފައިވާ ކުންފުންޏެއް، ޕާޓްނަޝިޕް، އަދި ކޯޕަރޭޓިވް ސޮސައިޓީތަކުގެ އިތުރުން އަމިއްލަ ފަރުދުންގެ ވިޔަފާރިތަކަށް ވެސް މި ބީލަމުގައި ބައިވެރިވެވޭނެއެވެ.
ބ. ގޮއިދޫގެ އާބާދީ އުޅެނީ ގާތްގަނޑަކަށް 850ގައެވެ. އޭގެ ތެރެއިން ރަށުގައި ދިރިއުޅެނީ ގާތްގަނޑަކަށް 500 ވަރަކަށް މީހުންނެވެ.