ސަރުކާރަށް އަހަރުވެގެންދިޔައިރު، ޓެކްސީ ޑްރައިވަރުން ފާޅުކުރި ކަންބޮޑުވުންތަކަށް ހައްލު ހޯދައިދީފައިނުވާ ކަމަށް ބުނެ، ޓެކްސީ ޑްރައިވަރުން މިއަދު އިހުތިޖާޖުކޮށްފިއެވެ.
ހުޅުމާލޭ ރުއްގަނޑު ސަރަހައްދުގައި މިއަދު ހަވީރު ޓެކްސީ ޑްރައިވަރުން ކުރި އިޖުތިޖާޖުގައި، ސަރުކާރުން އެ މީހުން މަގުމަތިކޮށްފައިވާ ކަމަށްބުނެ ކަންބޮޑުވުން ފާޅުކޮށްފައިވެއެވެ.
މި އިހުތިޖާޖުގައި އެ މީހުން ގޮލާވާފައިވާ ބައެއް ކަންތައްތަކުގެ ތެރޭގައި:
- ސަރުކާރުން ޓެކްސީ ފްލީޓު ވުޖޫދަށް ނުގެންނާނެ ކަމަށް އިއުލާން ކުރުން
- ވޭން ދަތުރުގެ އަގުތައް ކުރިން އޮތް ގޮތަށް ބަދަލުކުރުން
- މާލެ އަދި އެއާޕޯޓުގެ ޓްރެފިކް ފްލޯ ފަސޭހަވާނެ ގޮތަށް ހެދުން
- ފަސޭހައިން ދަތުރު ނެގޭނެ މާހައުލެއް ފަހިކޮށްދިނުން
- ޓެކްސީ ޑްރައިވަރުންގެ ދަފްތަރު އަލުން ހުޅުވައިލުން
- މާލޭގައި ޕާކު ކުރެވޭނެ ނިޒާމެއް ގާއިމްކުރުން
ޓެކްސީ ޑްރައިވަރުންގެ ކަންބޮޑުވުންތައް ހިއްސާ ކުރުމަށް ޓަކައި، ރައީސް ޑރ. މުހައްމަދު މުއިއްޒާ ވީ އެންމެ އަވަހަކަށް ބައްދަލު ކުރުމަށް އެދިފައިވާ ކަމަށް އެ މީހުން ވަނީ ބުނެފައެވެ. އެ ގޮތުން މިދިޔަ އަންގާރަ ދުވަހަށް އެ ބައްދަލުވުން ބޭއްވުމަށް ނިންމާފައިވަނިކޮށް، ބައްދަލުވުން ކެންސަލް ކޮށްލާފައިވާ ކަމަށް ކުއްލި ގޮތަކަށް ރައީސް އޮފީހުން އެންގުމާ ގުޅިގެން ވެސް ކަންބޮޑުވުން ފާޅުކޮށްފައިވެއެވެ.
މީގެ އިތުރުން، ސަރުކާރުން ޓެކްސީ ފްލީޓެއް ހެދުމުން އެކަމުގެ ގެއްލުން ޑްރައިވަރުންނާއި ޓެކްސީ ސެންޓަރުތަކާއި ގަރާޖުތަކަށް ވެސް ކުރާނެތީ އެ ކަމުގެ ކަންބޮޑުވުން ވެސް އިހުތިޖާޖުގައި އިއްވާފައިވެއެވެ.
"އަޅުގަނޑުމެން ޚިދުމަތް ނުދެވިގެން މި އުޅެނީ އަޅުގަނޑުމެން ނުކުޅެދުންތެރި މީހުނަށް ވެގެނެއް ނޫން. އަޅުގަނޑުމެން ޚިދުމަތް ނުދެވިގެން މި އުޅެނީ ސަރުކާރުގެ އެކި މުއައްސަސާތަކުގައި ތިއްބަވާ ބޭފުޅުންގެ ޒިންމާދާރުކަން ކުޑަކަމުން. އެ ބޭފުޅުން ޒިންމާ އުފުއްލަވަންޖެހޭ ގޮތަށް ޒިންމާ ނުއުފުއްލަވާތީ،" އިހުތިޖާޖުގައި ކަންބޮޑުވުންތައް ފާޅު ކުރަމުންދިޔަ ޑްރައިވަރަކު ބުންޏެވެ.
ޓެކްސީ ޑްރައިވަރުން ބުނި ގޮތުގައި އެ މީހުން ޓްރާންސްޕޯޓު މިނިސްޓަރު އަމީނާ ބައްދަލު ކުރެއްވުމުން މިނިސްޓަރުވަނީ، މަޖިލީހަށް ބިލެއް ހުށަހަޅައިގެން ރެޖިސްޓްރީ ނުކުރެވިހުރި ޓެކްސީތަކަށް ދެ ހަފްތާއެއްގެ ތެރޭގައި ހައްލު ގެނެސްދެއްވާނެ ކަމުގެ ޔަގީންކަން ދެއްވައިފައެވެ. އަދި މި މައްސަލައިގައި ޕީއެންސީގެ މަޖިލިސް މެންބަރުންނާ ވެސް ބައްދަލުކޮށްފައިވާނެ ކަމަށް ވެސް ޑްރައިވަރުން ބުންޏެވެ. އެހެން ނަމަވެސް އެ ކަންބޮޑުވުންތަކަށް ހައްލު ހޯދައިދީފައި ނުވާތީ، ސަރުކާރުން އެ މީހުން މަގުމަތިކޮށްލީ ކަމަށް ބުންޏެވެ.
މި ކަންބޮޑުވުންތަކާ އެކު އިޖުތިޖާޖުގައި މިނިސްޓަރުގެ އިސްތިއުފާއަށް ވެސް ގޮވާލާފައިވެއެވެ.
ޓެކްސީ ޑްރައިވަރުން އިހުތިޖާޖަށް ނިކުތީ، އެ މީހުންގެ ހުރި ކަންބޮޑުވުންތަކާ ގުޅިގެން ސަރުކާރުގެ ފަރާތުން ޖަވާބެއް ހޯދުމަށެވެ.
ސަރުކާރުން ޓެކްސީގެ ޚިދުމަތް ފަށަން ނިންމުމާއި، ޕާކު ކުރާނެ ޖާގަ ނުދައްކައި ވެހިކަލް ޓޯކުރާ މައްސަލައިގައި ވެސް މިދިޔަ އޮގަސްޓުގައި ޓެކްސީ ޑްރައިވަރުން އިހުތިޖާޖުކުރިއެވެ. އެ އިހުތިޖާޖު ނިންމައިލީ، ޑްރައިވަރުންނަށް ގެއްލުން ނުވާނެ ކަމުގެ ޔަގީންކަން އަމީން ދެއްވުމުންނެވެ.