ގްރޭޓާ މާލޭ ސަރަހައްދުގައި ހިންގަމުންދާ ސެލޫންތަކާއި ސްޕާތައް އިންސްޕެކްޓް ކުރުމުގެ މަސައްކަތް, ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ފަށައިފިއެވެ.
އެތަންތަނުގެ ސާފުތާހިރުކަން ބެލުމަށް ކުރިއަށް ގެންދާ މި އިންސްޕެކްޝަން މިދިޔަ ހޯމަ ދުވަހު ފަށާފައިވާއިރު މިމަހުގެ 19 ވަނަ ދުވަހާ ހަމައަށް ކުރިއަށް ގެންދާނެ ކަމަށް, އެޗްޕީއޭއިން ބުންޏެވެ.
މި އިންސްޕެކްޝަންތައް ކުރިޔަށް ގެންދާއިރު ސެލޫން އަދި ސްޕާ ހިންގާފަރާތްތަކުން މިކަމަށް އެއްބާރުލުން ދެއްވުމަށް
އެޗްޕީއޭއިން ވަނީ އެދިފައެވެ.
މާލެ ސަރަހައްދުގައި ހިންގާ ބައެއް ސްލޫންތަކަކީ ވަރަށް ސާފުތާހިރުކަން ދަށްކޮށް ހިންގާ ތަންތަނެވެ. އަދި ބައެއް ސްލޫންތަކުގައި ގާނޫނާހިލާފު އަމަލުތައް ދަނީ ހިންގަމުންނެވެ.
އިމިގްރޭޝަނުން ވަނީ، ސެޕްޓެންބަރު 19 ވަނަ ދުވަހު މާލެ ސަރަހައްދުގައި ހިންގާ ސެލޫންތަކާއި ސްޕާތަކުގައި މަސައްކަތް ކުރާ ބިދޭސީންނަކީ އިމިގްރޭޝަންގެ ގާނޫނާ އެއްގޮތަށް އުޅޭ ބައެއްތޯ ބެލުމަށް ޚާއްސަ އިންސްޕެކްޝަނެއް ހިންގާފައެވެ.
މި އިންސްޕެކްޝަންގެ ތެރެއިން 22 ތަނެއް ބަލާ ފާސްކޮށް، ނުގަވައިދުން އުޅޭ ހަތް ބިދޭސީ އަންހެނުން ބެލުމުގެ ދަށަށް ގެނެސްފައިވާ ކަމަށް އިމިގްރޭޝަނުން ވަނީ ބުނެފައެވެއެވެ.