އަންނަ އަހަރުން ފެށިގެން ޗައިނާގެ ވެރިރަށް ބެއިޖިންއާއި އިތުރު ތިން ސިޓީއަކަށް މޯލްޑިވިއަންއިން ސީދާ ދަތުރުތައް ފަށަން ތައްޔާރުވެއްޖެއެވެ.
މޯލްޑިވިއަންއިން އެކްސްގައި ކުރި ޕޯސްޓެއްގައި ވަނީ އަންނަ މަހުން ފެށިގެން، އެ އެއާލައިންގެ އާ ބޯޓު A330-200ގައި ޗައިނާއަށް ސީދާ ދަތުރުތައް ކުރާނެ ކަމަށެވެ. އެއީ ބެއިޖިންގެ އިތުރުން ޝަންގްހާއި، ޗެންގްޑޫ އަދި ޝިޔާންއަށެވެ.
އެކަމާ ގުޅޭ ގޮތުން ޓްރާންސްޕޯޓު މިނިސްޓަރު މުހައްމަދު އަމީން މިއަދު އެކްސްގައި ކުރެއްވި ޕޯސްޓެއްގައިވަނީ ރާއްޖެއާއި ޗައިނާއާ ދެމެދު އިތުރު ސީދާ ދަތުރުތައް ފެށުމާ ގުޅޭ ގޮތުން ބެއިޖިންގައި ބޭއްވި ޖަލްސާގައި ބައިވެރިވެ ވަޑައިގަތުމަކީ ލިބިވަޑައިގަތް އުފަލެއް ކަމަށާއި އެ ދަތުރުތަކާއެކު ފަތުރުވެރިކަން ކުރިއަރާނެ ކަމަށެވެ.
ޖުމްލަ 22އަށްވުރެ ގިނަ ގައުމަކާ ދެމެދު ރާއްޖެއިން ސީދާ ދަތުރުތައް ކުރެއެވެ.
ޗައިނާއަކީ މިހާރު އެންމެ ގިނަ އަދަދެއްގެ ފަތުރުވެރިން ރާއްޖެ އަންނަ ގައުމެވެ. އެގޮތުން މި އަހަރުގެ މިހާތަނަށް 1.88 މިލިއަން ފަތުރުވެރިން ރާއްޖެ އައިސްފައިވާއިރު، އޭގެ 13.5 އިންސައްތަ ހިއްސާ ކުރަނީ އެގައުމުންނެވެ.
ޗައިނާގެ އިތުރުން ރާއްޖެއަށް އެންމެ ގިނަ ފަތުރުވެރިން އަންނަނީ ރަޝިޔާ، އިނގިރޭސިވިލާތް، ޖަރުމަނުވިލާތް އަދި އިޓަލީންނެވެ.