ހޯރަފުށީ ޕޮލިސް ސްޓޭޝަނަށް ގެންދިޔަ މީހަކު، ކަނުބަނދެ ނަފުސާނީ ގޮތުންނާއި ޖިސްމާނީ ގޮތުން އެކި ވަރުގެ އަނިޔާ ދިންކަމަށް ބުނެ ސޯޝަލް މީޑިއާގައި ދައުރުކުރާ ވާހަކަތައް ފުލުހުން މިއަދު ދޮގުކޮށްފިއެވެ.
މީހަކަށް ފުލުހުންގެ ފަރާތުން އަނިޔާދިންކަމަށް ބުނެ ސޯޝަލް މީޑިއާގައި ވަނީ ވީޑިއޯއެއް ދައުރުކޮށްފައެވެ. މި ވީޑިއޯގައި މީހެއްގެ ދެފައި ފެންނަ އިރު، ފަޔަށް ބޮޑެތި ޒަޚަމްތަކެއް ލިބިފައިވެއެވެ.
"ކޮމިޝަނާ އޮފް ޕޮލިސްއަކީ ހޯރަފުށީ ދަރިއެކޭ ބުނަން ލަދުގަނޭ މިއަދު،" އެ ޕޯސްޓުގައި ވެއެވެ.
މިކަމާ ގުޅިގެން ފުލުހުން މިއަދު މީޑިއާއާ ހިއްސާކުރި މެސެޖެއްގައި ވަނީ މަސްތުގެ ހާލަތުގައިހުރެ ފުލުހުންނަށް އިންޒާރުދީ ބިރުދައްކައި ހަޑިހުތުރުބަހުން މުއާމަލާތުކުރިކަމުގެ ތުހުމަތުގައި ނޮވެމްބަރު މަހުގެ 27ވަނަ ދުވަހުގެ ރޭ ހޯރަފުށިން މީހަކު ހައްޔަރު ކޮށްފައި ވާކަމަށެވެ.
އެއީ އުމުރުން 30 އަހަރުގެ ދިވެހި ފިރިހެނެއް ކަމަށް ފުލުހުން ވަނީ ބުނެފައެވެ. އޭނާގެ ބަންދާމެދު ގޮތެއް ނިންމުމަށް ނޮވެމްބަރު މަހުގެ 28ވަނަ ދުވަހު ކޯޓަށް ހާޒިރުކުރުމުން ޝަރުތުތަކެއް ކުރުމަށްފަހު ކޯޓުން އޭނާ ދޫކޮށްލާފައި ވާކަމަށް ވެސް ފުލުހުން ވަނީ ބުނެފައެވެ.
މި މައްސަލައާ ގުޅިގެން ހައްޔަރުކުރި މީހާއަށް ފުލުހުންގެ ބަންދުގައި ހުރިއިރު އަނިޔާކުރިކަމުގެ އެއްވެސް ޝަކުވާއެއް ފުލުހުންނަށް މިހާތަނަށް ލިބިފައި ނުވާކަމަށް ވެސް ފުލުހުން ވަނީ ބުނެފައެވެ.
އަދި އެފަދަ ކަމެއްގެ ޝަކުވާއެއް އޮތްނަމަ އޮންނަ އުސޫލެއްގެ ތެރެއިން ހުށަހަޅައިގެން ބެލުމަކީ ފުލުހުން ބާރު އަޅާ ކަމެއް ކަމަށް ވެސް ވަނީ ބުނެފައެވެ. އެފަދަ ތަހުގީގުތަކުގައި ފުލުހުންގެ ހިދުމަތުން ފުރިހަމައަށް އެއްބާރުލުން ދޭނެކަމަށް ވެސް ފުލުހުން ވަނީ ބުނެފައެވެ.