ފަތުރުވެރިކަމުގެ ވިސާގައި ރާއްޖެ އައިސް ވިޔަފާރިކޮށް، އާންމު ތަންތަނުގައި ނިދައި އުޅުނު މީހަކު އިމިގްރޭޝަނުން ހިފަހައްޓައިފިއެވެ.
އިމިގްރޭޝަނުން މިއަދު އެކްސްގައި ކުރި ޕޯސްޓެއްގައި ބުނީ ފަތުރުވެރިން ވިޔަފާރި ހަރަކާތްތައް ހިންގައި، އާންމު ތަންތަނުގައި ދިރިއުޅޭ ރިޕޯޓުތަކެއް ލިބިފައިވާ ކަމަށެވެ.
އެ ރިޕޯޓުތަކާ ގުޅިގެން ވަގުތުން ހަރަކާތްތެރިވެ، އެކަކު އިމިގްރޭޝަންގެ ބެލުމުގެ ދަށަށް ގެންގޮސްފައިވާ ކަމަށް އެ ޚިދުމަތުން ބުންޏެވެ.
އެ މީހާއަކީ 33 އަހަރުގެ އަންހެނެކެވެ.
ވިސާއާ ޚިލާފުވުން ހަރުކަށި އިބާރާތުން ކުށްވެރިކުރާ ކަމަށާއި އެކަށީގެންވާ ފިޔަވަޅު އަޅާނެކަމަށް އިމިގްރޭޝަންއިން ވަނީ ފާހަގަކޮށްފައެވެ.
އަދި މިފަދަ އެއްވެސް ކަމެއް ހިނގާނަމަ އެކަން ރިޕޯޓް ކުރުމަށް ވެސް ވަނީ އިލްތިމާސްކޮށްފައެވެ.
ޓޫރިސްޓު ވިސާއާ ޚިލާފަށް ދިރިއުޅޭ މީހުން މީގެ ކުރިން ވެސް އިމިގްރޭޝަނުން ހިފަހައްޓައި، އަނބުރާ ގައުމަށް ފޮނުވާލައިފައި އެބަހުއްޓެވެ.
ރާއްޖޭގައި ގަވައިދާ ޚިލާފަށް އުޅޭ ބިދޭސީންނާ ގުޅޭ މައްސަލަތައް ހުށަހެޅުމަށް "އިމިގްރޭޝަން ވޮޗް"ގެ ނަމުގައި މިދިޔަ ޖުލައި މަހު ވަނީ އޮންލައިން ޕްލެޓްފޯމެއް ތައާރަފުކޮށްފައެވެ.