އަންނަ އަހަރު އަލަށް ފަށާ އެއާޕޯޓު މަޝްރޫއުތަކުގެ ތެރެއިން އއ. މަތިވެރީގައި އަޅަން ވައުދުވެވަޑައިގެންނެވި އެއާޕޯޓަށް އިސްކަންދެއްވާނެ ކަމަށާއި، އެއީ އިގްތިސޯދީ ގޮތުން ވެސް ގިނަ ފައިދާތަކެއް ވާނެ ސަރަޙައްދަކަށް ވާތީވެ ކަމަށް ރައީސުލްޖުމްޙޫރިއްޔާ ޑރ. މުހައްމަދު މުއިއްޒު މިރޭ ވިދާޅުވެއްޖެއެވެ.
އެމަނިކުފާނު އެފަދައިން ވިދާޅުވީ އއ. އަތޮޅާއި ކ. އަތޮޅަށް މިހާރު ކުރައްވާ ރަސްމީ ދަތުރުފުޅުގެ ތެރެއިން މިރޭ މަތިވެރީގެ ރައްޔިތުންނާ މުޚާތަބުކުރައްވާ ވާހަކަފުޅުދައްކަވަމުންނެވެ.
އެމަނިކުފާނު ވިދާޅުވީ މަތިވެރި އޮތް ސަރަޙައްދަކީ ގިނަ ރިސޯޓު އޮތް އަދި ރަށްތަކުގައި ލޯކަލް ޓޫރިޒަމް ވެސް ފުޅާ ހިސާބެއް ކަމަށެވެ. އެހެންކަމުން މަތިވެރީގައި ގާއިމުކުރާ އެއާޕޯޓާއެކު އިގްތިސޯދަށް ބޮޑެތި ނަފާކުރާނެ ކަމަށް އެމަނިކުފާނު ވިދާޅުވިއެވެ.
އެހެންކަމުން މަތިވެރީގައި އެއާޕޯޓެއް އެޅުމަކީ ކޮންމެހެން ވެސް ކުރަންޖެހޭ ކަމެއް ކަމަށް އެމަނިކުފާނު ވިދާޅުވިއެވެ.
"މި ރަށަށް، މި އަތޮޅަށް، މި ދާއިރާއަށް އަދި މި ސަރަޙައްދަށް ވެސް ވަރަށް މުހިންމު ކަމެއްގެ ގޮތުގަ، އިގްތިސޯދީގޮތުން ވެސް ދެކޮޅުޖެހޭ، އިކޮނޮމިކަލީ ވަޔަބަލް ކަމެއް މި ރަށުގަ އެއާޕޯޓެއް އެޅުމަކީ،" ރައީސް މުއިއްޒު ވިދާޅުވިއެވެ.
"...އެހެންވީމަ އިރާދަކުރެއްވިއްޔާ އަންނަ އަހަރު އެންމެ އިސްކަމެއްދީގެން އަލަށް ފަށާ އެއާޕޯޓު މަޝްރޫއުތަކުގެ ތެރޭގައި މިރަށުގެ އެއާޕޯޓު އެޅުން ކުރިއަށް ގެންދާނެކަން ޔަގީންކަމާއެކު ދަންނަވަން،" އެމަނިކުފާނު ވިދާޅުވިއެވެ.
އެމަނިކުފާނު ވިދާޅުވި ގޮތުގައި އެކަމުގެ ނަތީޖާއަކަށް ވާނީ މަތިވެރިއާއި އެ ސަރަހައްދަށް ފަތުރުވެރިކަމުގެ ދާއިރާއިން އިތުރު ދޮރުތައް ހުޅުވުމެވެ. އަދި އެހެނިހެން ދާއިރާތަކަށް އިގްތިސޯދީ ގޮތުން މަންފާކުރާނެ ކަމަށް ވިދާޅުވިއެވެ.
ފާހަގަކޮށްލެވޭ ގޮތުގައި މަތިވެރީގައި އެއާޕޯޓެއް އެޅުމަކީ ނިމިދިޔަ ރިޔާސީ އިންތިޚާބުތެރޭގައި އެމަނިކުފާނު ވެވަޑައިގެންނެވި ރިޔާސީ ވައުދުފުޅެކެވެ.