ސީރިއާގެ ރައީސް ބައްޝާރުލް އަސަދު އެގައުމުން ފުރާވަޑައިގަތީ މަގާމުން އިސްތިއުފާ ދެއްވުމަށް ފަހު ކަމަށް ރަޝިއާގެ ފޮރިން މިނިސްޓްރީން ބުނެފިއެވެ.
ރަޝިއާގެ ފޮރިން މިނިސްޓްރީން ނެރުނު ބަޔާނެއްގައި ބުނީ ބައްޝާރާއި އިދިކޮޅު ފަރާތްތަކާ ދެމެދު މަޝްވަރާތަކެއް ކުރުމަށް ކުރުމަށް ފަހު، މަގާމުން އިސްތިއުފާ ދެއްވައި ގައުމު ދޫކުރައްވައި ވަޑައިގަންނަވަން ނިންމެވި ކަމަށެވެ. ބައްޝާރު ފުރާވަޑައިގަތީ ސުލްހަވެރިކަމާއެކު ވެރިކަން ބަދަލުކުރުމަށް އިރުޝާދު ދެއްވައިފައި ކަމަށް ވެސް އެ މިިނިސްޓްރީން ބުންޏެވެ.
ރަޝިއާއިން ބުނީ އެގައުމުން މަޝްވަރާތަކުގައި ބައިވެރިނުވާ ކަމަށާއި ނަމަވެސް ސީރިއާގެ ހާލަތު ގާތުން ބަލަމުން އަންނަ ކަމަށެވެ. އަދި އެގައުމުން އިދިކޮޅު ފަރާތްތަކާ ވެސް ވާހަކަ ދައްކަމުން އަންނަ ކަމަށާއި ސީރިއާގެ ހަނގުރާމަ ނިމުމަކަށް ގެނައުމާ ގުޅޭ ގޮތުން އދ.އިން 2015ގައި ފާސްކޮށްފައިވާ ގަރާރާ އެއްގޮތަށް ސިޔާސީ މާހައުލަށް ބަދަލު ގެނައުމަށް އެއްބާރުލުން ދޭނެ ކަމަށް ރަޝިއާއިން ބުނެފައިވެއެވެ.
ސީރިއާގެ އިދިކޮޅު ހަނގުރާމަވެރިން ރޭ ދިމިޝްގަށް ވަދެގަތުމާއެކު ބައްޝާރު، އާއިލާއާއެކު ފިއްލަވައިފައިވާ ކަމަށް ރިޕޯޓުތަކުގައިވެއެވެ. ނަމަވެސް ވަޑައިގަތީ ކޮން ގައުމަކަށް ކަމެއް އެއްވެސް ފަރާތަކުން މިހާތަނަށް ބުނެފައިނުވެއެވެ.
ސީރިއާގެ ސަރުކާރާއި އިދިކޮޅު ފަރާތްތަކާ ދެމެދު ހަނގުރާމަ ކުރާތާ މިހާރު 13 އަހަރަށް ވުރެ ދިގު މުއްދަތެއް ވެފައިވާއިރު، މީގެ 10 ވަރަކަށް ދުވަސް ކުރިން ހަނގުރާމަވެރިން ވަނީ ކުއްލި ގޮތަކަށް ހަމަލާތައް ވަރުގަދަކޮށްފައެވެ. އެގޮތުން ގިނަ އަދަދެއްގެ ޒަމާނީ ހަތިޔާރާއި ހަނގުރާމައިގެ ވަސީލަތްތައް ބޭނުންކޮށްގެން އެ ފައުޖުތަކުން ވަނީ ސީރިއާގެ އުތުރުގެ ބޮޑު ދެ ޕްރޮވިންސް ކަމަށްވާ އިދްލިބްއާއި ހަލަބް އެމީހުންގެ ކޮންޓްރޯލްގެ ދަށަށް ގެންގޮސްފައެވެ.
ސީރިއާގެ ރައީސް ކަމަށް ބައްޝާރު ވަޑައިގަތީ 2000 ވަނަ އަހަރެވެ. އެއީ އޭގެ ކުރިން ވެރިކަމުގައި ހުންނެވި ބައްޕާފުޅު، ހާފިޒް އަލް އަސަދު އަވަހާރަވުމާ ގުޅިގެންނެވެ. އުމުރުން 69 އަހަރުގައި ހާފިޒް ހާޓް އެޓޭކެއް ޖެހިގެން އަވަހާރަވީ ވެރިކަން ކުރައްވާތާ 29 އަހަރުވީ ފަހުންނެވެ.
ސީރިއާގެ ދާޚިލީ ހަނގުރާމަ ފެށުނީ އެގައުމަށް ޑިމޮކްރަސީ ގެނައުމަށް ގޮވާލައި ސަރުކާރާ ދެކޮޅަށް ފެށި މުޒާހަރާތައް ބާރުގެ ބޭނުން ކޮށްގެން ރޫޅާލައި، އެ ހަމަނުޖެހުންތަކުގައި އެތައް ހާސް މީހުން މަރުވުމާ ގުޅިގެންނެވެ.
އެ ހަނގުރާމަ ހިނގަމުންދިޔައިރު ރަޝިއާއަކީ ސީރިއާ ސަރުކާރަށް އެންމެ ބޮޑަށް ވާގިވެރިވެ، ވެރިކަން ދެމެހެއްޓުމުގައި އިސް ދައުރެއް އަދާކުރި އެއް ގައުމެވެ.