ޗާގޯސްގެ ރަށްތައް މޮރިޝަސްއަށް ދޭން އިނގިރޭސިވިލާތުން އެއްބަސްވުމާ ގުޅިގެން ރައީސް ޑރ. މުޙައްމަދު މުއިއްޒު އިނގިރޭސި ސަރުކާރަށް ފޮނުއްވި ސިޓީފުޅު ހާމަނުކުރެވޭނެކަމަށް ސަރުކާރުން ބުނެފިއެވެ.
އެ މައްސަލާގައި އިނގިރޭސި ވިލާތަށް ސިޓީއެއް ފޮނުއްވިކަން އެ މަނިކުފާނު ހާމަކުރެއްވީ، ޖުމްހޫރީ ދުވަހުގެ ރަސްމީ ޖަލްސާގައި ނޮވެމްބަރު 10ވަނަ ދުވަހެވެ.
ރައީސް ވިދާޅުވީ، ޗާގޯސްއަކީ ރާއްޖެއާ ގުޅިފައި އޮތް ތަނަކަށްވާ ކަމަށް ލިޔެކިޔުންތަކުން ފެންނަން ހުރުމުން އެތަން އެހެން ގައުމަކަށް ލިބުމަށް ވުރެ ރާއްޖެއަށް ލިބުން އައުލާކަން ބޮޑު ކަމަށެވެ.
"އިނގިރޭސި ސަރުކާރުން މޮރިޝަސްއަށް ޗާގޯސް ހަވާލުކުރާ ވާހަކަތައް ދެކެވުނީމަ، އަޅުގަނޑުމެންގެ ތާރީހު ގުޅުން ވަރަށް ބޮޑަށް އޮތް ތަނަކަށް އެތަން ވާތީވެ، ރަސްމީކޮށް ލިޔެކިޔުމުން ސިޓީން، ދިވެހި ސަރުކާރުން ވާނީ އިނގިރޭސި ސަރުކާރަށް ސިޓީއެއް ފޮނުވާފައި،" އެ ރޭ ރައީސް ވިދާޅުވިއެވެ.
އެ ސިޓީފުޅުގެ ކޮޕީއަކާއި، އެ ސިޓީގައި ރައީސް އެދިވަޑައިގެންނެވި ކަންކަން ހާމަކޮށްދިނުމަށް، މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން "ސަން"އިން ވާނީ އެދިފައެވެ.
އެ ސިޓީއަށް ދެއްވި ޖަވާބުގައި ރައީސް އޮފީހުން ބުނީ އެ މައުލޫމާތަކީ މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ 31ވަނަ މާއްދާގެ ދަށުން ދެވެން ނެތް މައުލޫމާތެއް ކަމަށެވެ.
އެހެންވެ އެ ސިޓީފުޅާ ގުޅޭ އެއްވެސް މައުލޫމާތެއް ނުލިބެއެވެ.
ސިޓީފުޅު ހާމަނުކުރާން ސަރުކާރުން ނިންމިއިރު، ކުރީގެ ރައީސް އިބްރާހިމް މުޙައްމަދު ޞާލިހު މޮރިޝަސްގެ ބޮޑުވަޒީރަށް ކަނޑުގެ މައްސަލައިގައި ފޮނުއްވި ސިޓީފުޅެއް ހާމަނުކުރައްވައިގެން ވެސް އެއިރު އިދިކޮޅުގައި ތިއްބަވައިގެން މިހާރުގެ ސަރުކާރުގެ ވެރީން ނުރުހުން ފާޅުކުރެއްވިއެވެ.