ޔުނައިޓެޑް ހެލްތުކެއާގެ ސީއީއޯ، ބްރެއިން ތޮމްޕްސަން މަރާލި ކަމަށް ތުހުމަތު ކުރެވޭ މީހާ ނިއު ޔޯކު ސިޓީން ފިލައިގެން ގޮސްފައިވާ ކަމަށް ބެލެވޭ ކަމަށް ފުލުހުންނާ ހަވާލާދީ މީޑިއާތަކުން ރިޕޯޓުކޮށްފިއެވެ.
ނިއުޔޯކް ޕޮލިސް ޑިޕާޓްމަންޓުގެ ކޮމިޝަނަރު ޖެސިކާ ޓިޝް ވިދާޅުވީ ޤާތިލު މިހާރު ނިއުޔޯކުގައި ނެތް ކަމަށް ޑިޓެކްޓިވުންނަށް ޤަބޫލުކުރާ ސަބަބެއް އެބައޮތް ކަމަށެވެ.
ފުލުހުން ވަނީ ތޮމްޕްސަން މަރާލާތަން ފެންނަ ސީސީޓީވީ ފޫޓޭޖާއި، ގާތިލު ކަމަށް ޝައްކު ކުރެވޭ މީހާ ދޫކޮށްލި ފެންފުޅިއެއްގެ ޑީއެންއޭ ހެކިތަކާއި، ބާނާ ފޯނެއް ވެސް ހޯދާފައެވެ. އަދި ބަޑިޖެހި މީހާގެ މޫނުގެ ފޮޓޯތައް ވެސް އެބަހުއްޓެވެ.
ނަމަވެސް ތޮމްޕްސަން މަރާލި ފަހުން ތިން ދުވަސްވީއިރު ވެސް އެއްވެސް މީހަކު މިހާތަނަށް ހައްޔަރެއް ނުކުރެއެވެ.
ބަޑިޖެހުމަށް ފަހު ޤާތިލު ފިލައިގެން ދިޔައީ ހިނގާފައި ކަމަށާއި، އޭގެ ފަހުން އީ-ސައިކަލަކަށް އަރައިގެން ހަ ވަނަ އެވޭނޫއިން ސެންޓްރަލް ޕާކަށް ވަދެގެން ދިޔަ ކަމަށް ވެސް ފުލުހުން ބުނެފައިވެއެވެ. އަދި ފަހުން ޓެކްސީއެއްގައި ބަސް ސްޓޭޝަނަށް ގޮސްފައިވާ ކަމަށާއި، ބަސް ޓާމިނަލަށް ވަނުމަށްފަހު، ބޭރަށް ނުކުމެފައި ނުވާ ކަމަށް ނިއުޔޯކުގެ ޗީފް އޮފް ޑިޓެކްޓިވްސް ޖޯ ކެނީ ވިދާޅުވިއެވެ.
"އެ ބަސްތަކަކީ އިންޓަސްޓޭޓް ބަސްތަކެއް." ކެނީ ވިދާޅުވިއެވެ. "އެހެންވެ އަހަރެމެން ގަބޫލުކުރާ ގޮތުގައި އޭނާ ނިއުޔޯކް ސިޓީ ދޫކޮށް ދިޔައީ ކަމަށް ވެދާނެ."
ރިޕޯޓްތައް ބުނާ ގޮތުގައި ފުލުހުންނަށް ވަނީ ސެންޓްރަލް ޕާކު ތެރެއިން ދަބަހެއް ފެނިފައެވެ. އަދި އެއީ ގާތިލު ކަމަށް ޝައްކު ކުރެވޭ މީހާގެ ދަބަސް ކަމަށް ބެލެވޭ ކަމަށްވެސް ފުލުހުން ބުނެފައިވެއެވެ. ދަބަހުގައި އެއީ ކާކުކަން ދެނެގަތުމަށް އެހީތެރިވެދޭނެ މުހިންމު ހެކިތައް ހުރެދާނެ ކަމަށް ފުލުހުން ބުނެފައިވެއެވެ.
ކެނީ ދަ ނިއުޔޯކް ޕޯސްޓަށް ވިދާޅުވި ގޮތުގައި ތޮމްޕްސަންގެ ގާތިލު ކަމަށް ޝައްކު ކުރެވޭ މީހާއަކީ ޔުނައިޓެޑްހެލްތްކެއާއާމެދު ހިތްހަމަނުޖެހޭ އެތަނުގެ މުވައްޒަފަކަށް ނުވަތަ ހިތްހަމަނުޖެހޭ ކްލަޔަންޓެއް ކަމަށް ވެދާނެއެވެ.
ކެނީ އިތުރަށް ވިދާޅުވީ ތޮމްޕްސަން މަރާލުމުގެ 10 ދުވަސް ކުރިން އޭނާ ހިލްޓަން ހޮޓެލް ބެލި ކަން އޮފިސަރުންނަށް ފާހަގަވެފައިވާ ކަމަށެވެ. އޭނާ ނިއުޔޯކަށް ދިޔައީ ނޮވެމްބަރު 24ވަނަ ދުވަހު ޖޯޖިއާގެ އެޓްލާންޓާ އިން ފުރައިގެން ދިޔަ ކްރޮސް ކަންޓްރީ ބަހެއްގައި ރޭގަނޑު 9 ޖަހާ އެހާކަންހާއިރު ކަމަށްވެސް ފުލުހުން ބުނެއެވެ. ނޮވެމްބަރު 29ގެ ނިޔަލަށް އޭނާ މަޑުކޮށްގެން ހުރީ ނިއު ޔޯކު ސިޓީ ހޮސްޓެލްގައެވެ.
ނޮވެމްބަރު 29 އިން ފެށިގެން ޑިސެމްބަރު މަހުގެ ހަތަރު ވަނަ ދުވަހުގެ ނިޔަލަށް އޭނާ ކުރި ކަމެއް ނޭނގޭ ކަމަށް ފުލުހުންނާ ހަވާލާދީ ނިއުޔޯކް ޓައިމްސް އިން ބުނެއެވެ.
އެތަނުގައި ހުރި ދުވަސްވަރު ކެއުމުގެ ވަގުތުތަކުގައާއި އެނޫން ހުރިހާ ވަގުތެއްގައި ވެސް އޭނާ އުޅުނީ މާސްކް އަޅައިގެންނެވެ. ޚިދުމަތް ހޯދުމަށްފަހު ބިލް ދައްކާފައި ވަނީ ފައިސާއިން ކަމަށް ވެސް ފުލުހުން ބުނެއެވެ.
އުމުރުން 50 އަހަރުގެ ތޮމްޕްސަން މަރާލާފައި ވަނީ ބުދަ ދުވަހުގެ ހެނދުނުގެ ވަގުތެއްގައި ނިއުޔޯކް ހިލްޓަން މިޑްޓައުން ހޮޓަލުގެ ބޭރުގައި ދިން ހަމަލާއެއްގައެވެ.
ތޮމްޕްސަން ޔުނައިޓެޑްހެލްތުކެއާއާ ގުޅުނީ 2004ވަނަ އަހަރުއެވެ. ކުންފުނީގެ ސީއީއޯގެ މަގާމު އަދާކުރަން ފެށީ 2021ވަނަ އަހަރުން ފެށިގެންނެވެ. އޭނާއަކީ ކުންފުނީގެ އެކްޒެކްޓިވުންގެ ތެރެއިން އެންމެ ބޮޑު އާމްދަނީއެއް ލިބޭ އެކަކެވެ.
ޔުނައިޓެޑްހެލްތްކެއާ އަކީ އެމެރިކާގެ އެންމެ ބޮޑު އެއް ހެލްތު އިންޝުއަރެންސް ކުންފުންޏެވެ. އެ ކުންފުނިން އެމެރިކާގެ 49 މިލިއަނަށް ވުރެ ގިނަ މީހުންނަށް ހެލްތު ކަވަރޭޖް ފޯރުކޮށްދެއެވެ.