މި ދުވަސްވަރު ރަސްފަންނުން މޫދުން ފެންނަ ވިހަ ބާވަތެއްގެ ދިރުމެއްކަމަށްވާ 'ވެނޯމަސް ކޯން ސްނެއިލް' ފެންނާތީ އެ ކަމަށް ސަމާލުވާން އޯޝެނޯހޯލިކް މޯލްޑިވްސްއިން އެދެފިއެވެ.
ކޯން ސްނެއިލްއަކީ އާދައިގެ ބޮއްޔެއް ފަދައިން ފެންނަ އެއްޗެއް ނަމަވެސް އެތެރޭގައި ކުޑަ ދިރޭ އެއްޗެއް އޮންނަ އެއްޗެކެވެ. އޭގެ ވާސިލްވަނީ އޭގެ ދަތް ޖެހުމުންނެވެ. މި ދަތަށް ކިޔަނީ ރެޑިއުލާއެވެ.
އޯޝެނޯހޯލިކް މޯލްޑިވްސްއިން މިއަދު ކޮށްފައިވާ ޕޯސްޓެއްގައިވަނީ މި ދުވަސްވަރު ރަސްފަންނުން ވިހަ އެކުލެވޭ ކޯން ސްނެއިލް ފެންނަމުން އަންނަ ކަމަށެވެ.
އާންމުކޮށް ކޯން ސްނެއިލް ފެންނަން ހުންނަނީ އިރުއޮއްސެން ކައިރިވުމުން ކަމަށާއި، އެހެންކަމުން ހަވީރާއި ރޭގަނޑު އެ ސަރަހައްދަށް މޫދަން އެރެން ދާނަމަ ސަމާލުވާން ވަނީ އެދިފައެވެ.
ޚާއްސަކޮށް ކުޑަކުދިން، މޫދުގައި އަރައި ފައިވާނަށް އެރުމާއި، ވެލިގަނޑުގައި ހުސްފަޔާ ނުހިނގުން ހިމެނެއެވެ.
ކޯން ސްނެއިލްގެ ބާވަތުން، އެ ހަމުގައި ޖެހުމުން ކުރާ އަސަރު ތަފާތުވެއެވެ. ބައެއް ފަހަރު ވިހަވާއިރު އަނެއްބައި ފަހަރު އޭގެން ކުރާ އަސަރު ވަރަށް ބޮޑުވެއެވެ.
ކަނޑުގެ ދިރުންތަކާ ގުޅޭ މައުލޫމާތު ހާމަކުރާ އެކުއާ މެޑްގައިވާ ގޮތުން ކޯން ސްނެއިލްއެއްގެ ވިހައަކީ އެކި ވިހަ މާއްދާތައް ހިމެނޭ ކޮނޯޓޮކްސިންއެކެވެ. އޭގެ އަސަރުކޮށްފިނަމަ ނާރުގެ އެކި މައްސަލަތައް ދިމާވެއެވެ. އޭގެ ސަބަބުން ޕެރަލައިޒްވުން ފަދަ ކަންކަން ވެސް ކުރިމަތިވެއެވެ.