ގްލޯބަލް ޕާޓްނަޝިޕް ފޯ އެޑިޔުކޭޝަންގެ ބޯޑް އޮފް ޑިރެކްޓާސްގެ ބައްދަލުވުމުގައި އެޑިޔުކޭޝަން މިނިސްޓަރު ޑރ. އިސްމާއީލް ޝަފީޢު ބައިވެރިވެ ވަޑައިގެންފިއެވެ.
އެޑިއުކޭޝަން މިނިސްޓްރީން ބުނީ، މި ބައްދަލުވުމުގައި މިނިސްޓަރު ބައިވެރިވެ ވަޑައިގެންނެވީ އޭޝިއާ އަދި ޕެސިފިކް ދާއިރާ ތަމްސީލު ކުރައްވާ ބޯޑް މެންބަރުގެ ހައިސިއްޔަތުންނެވެ.
މިދިޔަ އަންގާރަ ދުވަހުން ފެށިގެން އިއްޔެގެ ނިޔަލަށް ދުބާއީގައި ކުރިއަށްގެންދިޔަ މި ބައްދަލުވުމުގައި ޖީޕީއީގެ ހިންގުމާ ގުޅުން ހުރި ގިނަ ނިންމުންތަކާއި ކުރިގެންދަން ރާވާ ހަރަކާތްތަކާއި ކުރިއަށް އޮތް ތިން އަހަރަށް ލަފާކުރާ ބަޖެޓު ކަނޑައަޅަން ކުރިއަށް ގެންދިޔަ މަޝްވަރާތަކުގައި މިނިސްޓަރު ވަނީ ބައިވެރިވެޑައިގެންފައެވެ.
މި ބައްދަލުވުމުގައި މިނިސްޓަރުގެ އަރިހުގައި ސްޓޭޓް މިނިސްޓަރު އަދި ޓެކްނިކަލް އެޑްވައިޒަރު ޑރ. އަޙުމަދު މުޙައްމަދު ބައިވެރިވެ ވަޑައިގެންނެވިއެވެ.
ޖީޕީއީއަކީ ތަރައްގީވަމުން އަންނަ ޤައުމުތަކުގެ ތަޢުލީމީ ނިޒާމު ކުރިއެރުވުމަށް ހިލޭ އެހީ ދޭ ބައިނަލްއަޤްވާމީ އެންމެ ބޮޑު އެއް ފަންޑެވެ. ޖީޕީއީގެ މެންބަރު ގައުމަކަށް ރާއްޖެ ވީ 2019 ވަނަ އަހަރުގެ ތެރޭގައެވެ.
އޭގެ ފަހުން ޖީޕީއީ އިން ވަނީ ރާއްޖޭގެ ތަޢުލީމީ ނިޒާމު ކުރިއެރުވުމަށް ގިނަ މަސައްކަތްތަކެއް ކޮށްދެއްވާފައެވެ. އެގޮތުން ޖީޕީއީގެ 9.5 މިލިއަން އެމެރިކާ ޑޮލަރުގެ އެހީއާއެކު ތައުލީމީ ނިޒާމަށް އިންގިލާބީ ހެޔޮ ބަދަލެއް ގެނައުމަށްޓަކައި "ތައިބަ" ގެ ނަމުގައި އެޑިޔުކޭޝަން މިނިސްޓްރީގައި ހާއްސަ ޕްރޮޖެކްޓެއް ގާއިމުކުރެވި، އޭގެ މަސައްކަތް ކުރިއަށްދެއެވެ.