ދޫނިދޫ ކަސްޓޯޑިއަލްގައި ބަންދުކޮށްފައި ހުރި ގައިދީއެއްގެ ނަމުގައި ޕޯސްޓު މެދުވެރިކޮށް ގެނައި ޕެކޭޖަކުން 980 ގްރާމްގެ މަސްތުވާތަކެތި ހޯދައި، އެ ޕެކޭޖާ ހަވާލުވި މީހާ 20 ދުވަހަށް ބަންދުކުރަން ކްރިމިނަލް ކޯޓުން އިއްޔެ އަމުރުކޮށްފިއެވެ.
މި މައްސަލައިގައި ބަންދުގެ މުއްދަތު ޖަހާފައިވަނީ 40 އަހަރުގެ ދިވެހި ފިރިހެނަކަށެވެ. އެ މީހާއަކީ ވެސް މަސްތުވާތަކެތީގެ މައްސަލަތަކުގެ ރިކޯޑު އޮތް މީހެއް ކަމަށް ކޯޓު އަމުރުގައިވެއެވެ.
އޭނާގެ މައްޗަށް ކުރަނީ މަސްތުވާތަކެތި ބޭނުންކުރުމާއި، ގެންގުޅުމާއި، ޓްރެފިކްކުރުމުގެ ތުހުމަތެވެ.
ކްރިމިނަލް ކޯޓުގެ އަމުރުގައި ބުނެފައިވާ ގޮތުގައި އޭނާ ހަވާލުވާން ދިޔަ ޕެކޭޖު އެޑްރެސްކޮށްފައިވާ މީހާއަކީ އެ މުއްދަތުގައި ދޫނިދޫ ޖަލުގައި ހުރި މީހެކެވެ. އެ ޕެކޭޖުން 980 ގުރާމުގެ މަސްތުވާތަކެތި ފެނިފައިވާކަމަށް ކޯޓު އަމުރުގައިވެއެވެ.
ކުރިއަށް އޮތް ހަފުތާ ތެރޭގައި އެ މައްސަލައިގެ ތަހުގީގު ނިންމާ ޕްރޮސިކިއުޓާ ޖެނެރަލް އޮފީހަށް މައްސަލަ ހުށަހަޅާނެ ކަމަށް އައިއޯ ފާހަގަކުރައްވާފައިވާއިރު، މައްސަލައިގެ ތަހުގީގު އަވަސްކުރުމަށް ވީހާވެސް ކުރު މުއްދަތެއް ދިނުމަށް ދިފާއުން އެދުނު ކަމަށް ކޯޓު އަމުރުގައިވެއެވެ.
އޭނާގެ މައްޗަށް ތުހުމަތުކޮށްފައިވާ ކުށް، އޭނާ ކުރިކަމަށް ތުހުމަތުކުރެވޭ މިންވަރަށް ހެއްކާއި ގަރީނާ ހުށަހަޅާފައިވާ ކަމަށް ކޯޓު އަމުރުގައި ބުނެފައިވެއެވެ. އެގޮތުން، ހެކީގެ ގޮތުގައި ސީނަށް ދިޔަ ފުލުހެއްގެ ބަޔާނާއި، މަސްތުވާތަކެތީގެ ތަހުލީލު ރިޕޯޓުގެ އިތުރުން އެ މީހާގެ ކުޑަކަމުދާތަކެތީގެ ރިޕޯޓު ހުށަހަޅާފައިވާ ކަމަށް ކޯޓު އަމުރުގައި ވަނީ ބުނެފައެވެ.
އޭނާ ބަންދުގައި ބަހައްޓަންޖެހޭ ހާލަތެއްގެ ގޮތުގައި ކޯޓު އަމުރުގައި ފާހަގަކޮށްފައިވަނީ މުޖުތަމައުގެ ސަލާމަތާއި ރައްކާތެރިކަމަށްޓަކައެވެ.