ބާރަ ސަތޭހައެއްހާ މީހުން ދިރިއުޅޭ, އަދި ވަރަށް ފުޅާ ދާއިރާއެއްގައި ލޯކަލް ޓޫރިޒަމްގެ ޚިދުމަތް ދެމުން އަންނަ ކ. ދިއްފުށީގައި ގާއިމުކުރި ޕޮލިސް ޕޯސްޓު ހުޅުވައި ފުލުހުން އެ ރަށުގައި ގާއިމުވެތިބެ ޚިދުމަތްދޭން ފަށައިފިއެވެ.
އިއްޔެ ބޭއްވި ރަސްމިއްޔާތުގައި، ދިއްފުށި ޕޮލިސް ޕޯސްޓު ހުޅުވައިދެއްވީ ކޮމިޝަނާ އޮފް ޕޮލިސް ޢަލީ ޝުޖާޢު އާއި ދިއްފުށީ ކައުންސިލު ރައީސް އިބްރާހީމް ސުނިލްއެވެ.
ޕޮލިސް ޕޯސްޓު ހުޅުވުމަށް ބޭއްވި ރަސްމިއްޔާތުގައި، ޑެޕިއުޓީ ކޮމިޝަނާ އޮފް ޕޮލިސް ފަރުހާދު ފިކުރީއާއި ފުލުހުންގެ އެގްޒެކެޓިވް ބައެއް އޮފިސަރުންނާއި ކޮމިޝަންގެ އޮފިސަރުންނާއި އެހެނިހެން ފުލުހުންގެ އިތުރުން ދިއްފުށި ކައުންސިލާއި މުއައްސަސާތަކުގެ މުވައްޒަފުންނާއި އާންމު ބައެއް ރައްޔިތުން ބައިވެރިވެލެއްވިއެވެ.
މިދިޔަ އަހަރުގެ ޑިސެމްބަރު މަހުން ފެށިގެން މިހާތަނަށް، ރާއްޖޭގެ އެކި ރަށްރަށުގައި ޖުމުލަ 19 އަށްވުރެ ގިނަ ޕޮލިސް ޕޯސްޓު ވަނީ ހުޅުވައިފައެވެ.
މި ރަށްތަކުގައި ޕޮލިސް ޕޯސްޓު ހުޅުވުމަށްފަހު އެ ތަނުގައި ވަނީ ގައުމީ ދިދައާއި ފުލުހުންގެ ދިދަ ނަގާފައެވެ.
ފުލުހުން ބުނީ، ލާމަރުކަޒީކޮށް ރައްޔިތުންނާ ގާތުން ފުލުހުންގެ ޚިދުމަތް ދިނުމަށް ކުރާ މަސައްކަތްތަކުގެ ތެރެއިން ރަށްރަށުގައި އަވައްޓެރި ފުލުހުންގެ ޚިދުމަތް ގާއިމުކުރުމަށް މަސައްކަތް ކުރަމުން އަންނަ ކަމަށެވެ. އަދި ފުލުހުންގެ ޚިދުމަތް މިހާތަނަށް ގާއިމުވެފައި ނުވާ ރަށްރަށުގައި ފުލުހުންގެ ޚިދުމަތް ގާއިމުކުރުމުގެ މަސައްކަތް މެދުކެނޑުމެއްނެތި ކުރާ ކަމަށް ވެސް ފުލުހުން ވަނީ ބުނެފައެވެ.