ނިޔުޔޯކް (4 ޑިސެންބަރު 2024) : ސޫރިޔާގެ އިދިކޮޅު ހަނގުރާމަވެރިން ހަތިޔާރާއެކު ކުއްލިއަކަށް ހަރަކާތްތެރިވެ ސޫރިޔާގެ އުތުރާއި އިރުމަތީ ބައެއް ސިޓީތަކާއި ވިލެޖްތައް ހިފައި ހަނގުރާމަ ފުޅާކުރަމުން ގެންދާ މައްސަލާގައި ބޭއްވި އދ. ގެ ސަލާމަތީ މަޖިލީހުގެ ކުއްލި ބައްދަލުވުމުގައި ރަޝިއާއާއި އެމެރިކާ، އެއްގައުމު އަނެއް ގައުމަށް ބަހުގެ ހަމަލާތައްދީ ޓެރަރިސްޓުންނަށް ވާގިވެރިވާ ކަމުގެ ތުހުމަތު އެއްގައުމު އަނެއް ގައުމުގެ މައްޗަށް ކޮށްފިއެވެ.
ސަލާމަތީ މަޖިލީހުގެ މި ކުއްލި ބައްދަލުވުން ބޭއްވީ ސޫރިޔާގެ އިދިކޮޅު ފަރާތްތަކުގެ ކުއްލި ހަމަލާތަކާއެކު ހޫނުވެގެންދިޔަ ސޫރިޔާގެ މަސްރަހު ފިނިކުރުމާބެހޭގޮތުން މަޝްވަރާކުރުމަށެވެ. ނަމަވެސް ބައްދަލުވުމުގައި އޮތީ އެމެރިކާއާއި ރަޝިއާގެ ކޯޅުންތަކާއި ބަހުގެ ހަމަލާތައް ބަދަލުކުރުމެވެ.
ސޫރިޔާގެ ވެރިކަން ވައްޓާލަން މަސައްކަތްކުރާ ޖަމާއަތްތަކުގެ ތެރެއިން "ހައިއަތު ތަޙްރީރް އައްޝާމް" ޖަމާއަތުގެ ހަނގުރާމަވެރިން ވަނީ ފާއިތުވި ހަތަރު ވަރަކަށް ދުވަހުގެ ތެރޭގައި ސޫރިޔާގެ އުތުރުގެ ހަލަބް ޕްރޮވިންސަށް ކުއްލި ހަމަލާތަކެއްދީ އެތަނުގައި ތިބި ސޫރިޔާގެ ސިފައިން ބަލިކޮށް އެމީހުން ފަހަތަށް ޖައްސައި، ހަލަބުގެ ވިލެޖްތަކާއި ހަލްބް ސިޓީ އާއި އެސިޓީގެ މައި އެއާޕޯޓުވެސް އެމީހުންގެ ބާރުގެ ދަށަށް ގެނަސްފައެވެ.
މީގެއިތުރުން "ހައިއަތު ތަޙްރީރް އައްޝާމް" ގެ ހަނގުރާމަވެރިން ވަނީ ސޫރިޔާގެ އިދްލިބް ޕްރޮވިންސް ވެސް އެއްކޮށް އެމީހުންގެ ބާރުގެ ދަށަށްގެނެސް ސޫރިޔާ ސިފައިންގެ ކޮންޓްރޯލް އޮންނަ އެހެން ސަރަހައްދެއް ކަމަށްވާ ހަމާ ގެ ބައެއް ވިލެޖްތަކަށް ވެސް ވަދެގެންފައެވެ. ރިޕޯޓްތައް ބުނާގޮތުން މިހާރު ސޫރިޔާގެ އިދިކޮޅު ހަނގުރާމަވެރިން ތިބީ ހަމާ ސިޓީއާ ކައިރި ހިސާބެއްގައެވެ.
"ހައިއަތު ތަޙްރީރް އައްޝާމް" ކުރިން "ޖަބްހަތުއްނުސްރާ" ގެ ނަމުގައި ހަރަކާތްތެރިވި ޖަމާއަތެކެވެ. އެއީ "އަލްގާއިދާ" އިން ވެކިވެގަނެގެން އުޅޭ ތަކްފީރީ ވިސްނުމުގެ ހަނގުރާމަ ވެރި ޖަމާއަތެކެވެ.
ސޫރިޔާ ސަރުކާރު ތުހުމަތު ކުރާގޮތުގައި "ހައިއަތު ތަޙްރީރް އައްޝާމް" ގެ ހަނގުރާމަވެރިން ގެ ކުއްލި މި ކުރިއެރުންތަކުގެ ފަހަތުގައި އޮތީ ސޫރިޔާގެ އުތުރުގެ ސަރަހައްދުތަކަށް ވަދެގަނެގެން އުޅޭ ތުރުކީއެވެ. ތުރުކީ ވަނީ "ހައިއަތު ތަޙްރީރް އައްޝާމް" ގެ ހަނގުރާމަވެރިންނަށް ގިނަ އަދަދަކަށް ޒަމާނީ ހަތިޔާރު ފޯރުކޮށްދީފައެވެ.
ސޫރިޔާ ސަރުކާރު ބުނާގޮތުން ތުރުކީގެ ބޭނުމަކީ މި ހަނގުރާމަވެރިންގެ އެހީގައި ސޫރިޔާއާއި ތުރުކީ އާ ދެމެދު ސޫރިޔާ ތެރެއިން ބަފަޒޯނެއް ނުވަތަ ތުރުކީއަށް ރައްކާތެރި ސަރަހައްދެއް ގާއިމްކުރުމެވެ. މީގެއިތުރުން މިއީ ސޫރިޔާ ސަރުކާރު ވައްޓާލުމަށްޓަކައި އިސްރާއީލާއި އެމެރިކާ އަޑީގައި ތިބެގެން ހިންގާ ކަންތައްގަނޑެއްކަމަށް ވެސް ސޫރިޔާ ސަރުކާރުން ތުހުމަތު ކުރެއެވެ.
ސޫރިޔާގެ އިދިކޮޅު ޖަމާއަތްތައް ބޭނުންކޮށްގެން ސޫރިޔާ ސަރުކާރު ވައްޓާލައި އެމެރިކާއަށް ތާއީދުކުރާ ސަރުކާރެއް ސޫރިޔާގައި އުފެއްދުމުގައި އެމެރިކާއާއި އިސްރާއީލުގެ ބޭނުމަކީ އީރާނާއި އިރާގު ގެ ތެރެއިން ސޫރިޔާ ހުރަސްކޮށް ލުބްނާނުގެ ހިޒްބުﷲ ޖަމާއަތަށް ލިބޭ ހަތިޔާރު ގެ ސަޕްލައި އަށް ހުރަސްއެޅުން ކަމަށް އީރާނާއި ސޫރިޔާ ދެކެއެވެ. މިއީ ކުރިންވެސް ކުރަންއުޅެ އެމެރިކާއާއި އިސްރާއީލަށް ނުކުރެވި އޮތްކަމެކެވެ.
މިކަން ފެއިލްކޮށް ސޫރިޔާގެ ސަރުކާރު ދެމެހެއްޓީ އީރާނާއި ރަޝިއާ އަދި އީރާންގެ މަދަދު ލިބޭ ލުބްނާނުގެ ހިޒްބުﷲ ޖަމާއަތް މި ހަނގުރާމައިގެ ތެރެއަށް ވަދެގެންނެވެ. ހިޒްބުﷲ ގެ ހަތިޔާރުގެ ސަޕްލައި ކަނޑާލެވިއްޖެނަމަ ހިޒްބުﷲ ބަލިކޮށްލަން އިސްރާއީލަށް ފަސޭހަވާނެއެވެ.
ހިޒްބުﷲ ބަލިކުރުމަށްފަހު އެމެރިކާގެ އެހީގައި ދެން އިސްރާއީލު ދިމާކުރާނީ އީރާނަށްކަން އީރާނަށް ރަނގަނޅަށް އެނގެއެވެ. ބޭނުމަކީ އިސްރާއީލަށް ނުރައްކާވާ ހުރިހާ ރެސިސްޓެންސް (ޖިހާދުގެ) ހަރަކާތްތަކެއް މުޅި މެދުއިރުމަތިން ނައްތާލުމެވެ. އެއީ އެނޫންގޮތަކަށް ފަލަސްތީނު އިސްތިއުމާރު ކޮށްގެން އިސްރާއީލަށް އަމާންކަމުގައި ނޯވެވޭނެކަން އިސްރާއީލަށް މިހާރު ޔަގީންވެފައިވާތީއެވެ.
ނަމަވެސް މި ހާލަތަށް ދިޔުމުގެ ކުރިން އީރާނުގެ އަމިއްލަ ރައްކާތެރި ކަމަށް ޓަކައި އެގައުމުން ނިއުކްލިޔާ ހަތިޔާރު އުފައްދާނެކަމަށް ހުޅަނގުގެ ޖާސޫސީ ރިޕޯޓުތައް ބުނެއެވެ. އީރާން ދާދިފަހުންވަނީ ބޭނުންވެއްޖެ ހާލަތެއްގައި އެގައުމުގެ ނިއުކްލިޔާ އަގީދާ (ޑޮކްޓްރިން) ބަދަލުކުރަން ޖެހިދާނެކަމަށް ބުނެފައެވެ.
ސޫރިޔާގެ އިދިކޮޅު ހަނގުރާމަވެރިންގެ ކުއްލި ހަމަލާތަކާ ގުޅިގެން ކަންބޮޑުވެ އީރާންގެ ޚާރިޖީ ވަޒީރު ވަނީ ސޫރިޔާ އާއި ތުރުކީއަށް ކުއްލި ޒިޔާރަތެއް ކުރައްވާފައެވެ.
ސޫރިޔާގެ އުތުރުގައި ކުއްލި ގޮތަކަށް ފެށިގެން އުޅޭ ހަނގުރާމައާ ބެހޭގޮތުން ސަލާމަތީ މަޖިލީހުން އިއްޔެ ބޭއްވި ބައްދަލުވުމުގައި އެމެރިކާގެ މަންދޫބު ރޮބަޓް ވުޑް ވަނީ ސޫރިޔާގެ އިދިކޮޅު ހަނގުރާމަވެރިން ގެ ކުރިއެރުން ހުއްޓުވުމަށްޓަކައި ރަޝިއާއާއި ސޫރިގެ ވައިގެ ސިފައިން ފައިޓާ ޖެޓްތަކުން ދޭ ވަރުގަދަ ހަމަލާތައް ކުށްވެރިކޮށް ފައެވެ.
ރަޝިއާއާއި ސޫރިއާގެ ވައިގެ ސިފައިން ހަމަލާދެނީ ހަނގުރާމަވެރިންނަށް ތާއީދުކުރާ އާންމުންނަށާ އަދި ހަނގުރާމަވެރިންގެ އަތްދަށުގައިވާ ސްކޫލްތަކާއި ހޮސްޕިޓަލްފަދަ މަދަނީ ތަންތަނަށް ކަމަށް ބުނެ މިއީ ހަނގުރާމައިގެ ޖަރީމާ ކަމަށް އެމެރިކާގެ މަންދޫބު ސިފަކުރެއްވިއެވެ.
ރަޝިއާއާއި ސޫރިޔާގެ ވައިގެ ހަމަލާތަކުގައި އާންމުންގެ އެތަށް ސަތޭކަ ބަޔަކު މަރުވެފައިވާ ކަމަށާ ހަނގުރާމައިގައި އާންމުންނަށް ހަމަލާދީ އާންމުން މެރުމަކީ އެމެރިކާ ގަބޫލު ކުރާނެ ކަމެއް ނޫންކަމާއި އެއީ ބޮޑު ޖަރީމާއެއް ކަމަށް އެމެރިކާގެ މަންދޫބު ރޮބަޓް ވުޑް ވަނީ ސިފަކުރައްވާފައެވެ.
އަދި ސޫރިޔާގެ ރައީސް ބައްޝާރުލް އަސަދުގެ ޚުދުމުޚްތާރު ވެރިކަމުގެ ނިޒާމު ދިފާއުކުރަން މަސައްކަތްކުރަނީ ރަޝިއާ ކަމަށްވެސް އެމެރިކާގެ މަންދޫބު ތުހުމަތު ކުރެއްވިއެވެ.
އެމެރިކާގެ މަންދޫބަށް ރައްދު ދެއްވަމުން ރަޝިއާގެ މަންދޫބު ވެސީލީ ނިޕިންޒިޔާ ވިދާޅުވީ ހަނގުރާމައިގައި މަދަނީ ތަންތަނަށާއި މަދަނީންނަށް ހަމަލާދޭވާހަކަ ދައްކަން އެމެރިކާ ލަދުނުގަނޭތޯ އަދި އެމެރިކާގެ ލަދު ކޮބައިތޯ ވިދާޅުވެ ސުވާލު އުފައްދަވާފައެވެ.
ސޫރިޔާގެ ދާޚިލީ ހަނގުރާމައިގެ ތެރެއަށް ބޭރުގެ ޓެރަރިސްޓް ޖަމާއަތްތަކާއި ބޭރުގައުމުތަކުގެ މުޖްރިމުންނާއި ޓެރަރިސްޓުން ސޫރިޔާއަށް ވެއްދީ އެމެރިކާ އަޑީގައި އޮވެގެން ކަމަށާ އެޓެރަރިސްޓް ޖަމާއަތްތަކުގެ ފަހުގައި ވަނީ އެމެރިކާގެ ޖާސޫސީ އިދާރާތައްކަމަށް ވެސް ރަޝިއާގެ މަންދޫބު ތުހުމަތުކުރެއްވިއެވެ.
މީގެއިތުރުން އެމެރިކާ ސިފައިން ސޫރިޔާއަށް އަރައިތިބީ ސޫރިޔާ ސަރުކާރުގެ ހުއްދައަކާ ނުލައި ގަވައިދާ ޚިލާފަށްކަމަށާ އެމެރިކާ ސޫރިޔާއަށް ވަދެގަނެގެން ކުޅޭކުޅިގަނޑަކީ ސިއްރިޔާތުގައި (ފަރުދާގެ އަނެއް ފަރާތުން) ސޫރިޔާގެ އިދިކޮޅު ހަނގުރާމަވެރިނަށާއި އެމީހުންނާ ގުޅިފައިވާ ޓެރަރިސްޓް ތަކްފީރީ ޖަމާއަތްތަކަށް އެހީތެރިވުންކަމަށް ވެސް ރަޝިއާގެ މަންދޫބު ތުހުމަތުކުރެއްވިއެވެ.
މިތުހުމަތުތަކާ ގުޅިގެން ރުޅިގަދަވެ އެމެރިކާ މަންދޫބު ވަނީ އެމެރިކާއަކީ ޓެރަރިޒަމާ ދެކޮޅަށް 20 އަހަރުގެ ހަނގުރާމައެއް ކޮށްފައިވާ ގައުމެއްކަމާއި ނަމަވެސް ދުނިޔޭގެ ކަންކޮޅުތަކުގައި ހަކަރާތްތެރިވާ ހުރިހާ ޓެރަރިސްޓް ޖަމާއަތްތަކަށް ވާގިވެރިވަނީ ރަޝިއާ ކަމަށް ތުހުމަތު ކުރައްވާފައެވެ.