ރާއްޖެއިން ތައިލެންޑަށް ކަނޑައަޅުއްވާފައިވާ ސަފީރުކަމަށް. އިލެކްޝަންސް ކޮމިޝަން (އީސީ)ގެ ކުރީގެ ރައީސް ފުއާދު ތައުފީގު އައްޔަނުކުރުމަށް ރައްޔިތުންގެ މަޖިލީހުގެ ޚާރިޖީ ގުޅުންތަކުގެ ކޮމިޓީން މިއަދު ފާސްކޮށްފިއެވެ.
އީސީގައި ފުއާދުގެ ދައުރު ހަމަވެފައި ވަނީ ނިމިދިޔަ ނޮވެމްބަރު މަހުގެ 23 ވަނަ ދުވަހަށެވެ.
އީސީގެ ގަވާއިދު ބުނާގޮތުން ދެ ދައުރަށް ވުރެ އިތުރަށް އެ ކޮމިޝަންގެ މެންބަރު ކަމުގައި ނުހުންނެވޭނެއެވެ. އެހެންކަމުން ދައުރު ހަމަވުމާ އެކު ފުއާދު ޖެހިވަޑައިގަތީ އެ ކޮމިޝަންގެ ވަޒީފާއިން ވަކިވެވަޑައިގަންނަވާށެވެ.
ފުއާދުގެ ދައުރު ހަމަވުމަށްފަހު، ރައީސް ޑރ. މުހައްމަދު މުއިއްޒު ވަނީ ކިންގްޑަމް އޮފް ތައިލެންޑްގެ ސަފީރުކަމަށް ފުއާދުގެ ނަން މަޖިލީހަށް ހުށަހަޅުއްވާފައެވެ. އެއާއެކު ނޮވެމްބަރު 25 ވަނަ ދުވަހު އޮތް ޖަލްސާގައި އެ މައްސަލަ ދިރާސާކުރުމަށް ޚާރިޖީ ގުޅުންތަކުގެ ކޮމިޓީއަށް ފޮނުވިއެވެ.
މިއަދު އެ ކޮމިޓީގެ ބައްދަލުވުމުގައި ނިންމީ ތައިލެންޑު ސަފީރުކަމަށް ފުއާދުގެ ޝަރުތު ހަމަވާ ކަމަށެވެ. އެއާއެކު ކޮމިޓީގެ އިއްތިފާގުން، ނުވަ މެންބަރުންގެ ވޯޓާއެކު ފުއާދު އެ މަގާމަށް އައްޔަނުކުރުމަށް ވަނީ ރުހުން ދީފައެވެ.
ނަވާރަސަތޭކަ ހަތް ދިހަ އަށްވަނަ އަހަރުން ފެށިގެން އެކިއެކި އިންތިޚާބުތައް ބޭއްވުމުގެ މަސައްކަތުގައި ހަރަކާތްތެރިވެވަޑައިގަންނަވަމުން އަންނަ ފުއާދު އީސީގެ މެންބަރު ކަމަށް އެންމެ ފުރަތަމަ އައްޔަންކުރެއްވީ އާ ގާނޫނޫއަސާސީގެ ދަށުން ފުރަތަމަ އެކުލަވާލި ކޮމިޝަނަށް 2008 ވަނަ އަހަރެވެ.
ފުއާދަކީ އޭރު ރާއްޖޭގައި ހިންގަމުން ދިޔަ ހުރިހާ ސިޔާސީ ޕާޓީއަކުން ރުހިގެން އެ ފަހަރު ކޮމިޝަނަށް އައްޔަންކުރެއްވި މެންބަރެކެވެ. ފުއާދަކީ މީގެ ކުރިން ފޮރިން މިނިސްޓްރީއާއި ސާކްގައި ވެސް މަސައްކަތް ކުރައްވާފައިވާ ބޭފުޅެކެވެ.
ފާހަގަކޮށްލެވޭ ގޮތުގައި ފުއާދުގެ އިތުރުން އީސީގެ މެންބަރުކަމުގެ ދެ މަގާމެއް ވެސް ވަނީ ހުސްވެފައެވެ. އެއީ އީސީގެ ނައިބު ރައީސް އަލީ ނަޝާތާއި އީސީގެ މެންބަރު މުހައްމަދު އާސިފް ވަކިކުރުމަށް ރައްޔިތުންގެ މަޖިލީހުން ފާސްކުރުމުންނެވެ.
އެއާއެކު އެ ކޮމިޝަނަށް ދެ މެންބަރުން އައްޔަން ކުރެއްވުމަށް، މެންބަރުކަމުގެ މަގާމަށް ކުރިމަތިލުމުގެ ފުރުސަތު ރައީސް އޮފީހުން ވަނީ މިހާރު ހުޅުވާލާފައެވެ.